Na ke Lokela ho ba e Mong wa Dipaki Tsa Jehova Haeba ke Dumela ho Ithuta le Bona Bibele?
Tjhe, ha se setlamo. Batho ba dimillione ba thabela ho ithuta Bibele le rona empa e sa be Dipaki Tsa Jehova. a Morero wa thuto ena ke ho thusa batho ho tseba hore ke eng seo Bibele e se rutang. Ho tswa ho wena hore na o etsang eng ka tsebo eo o ithutileng yona. Re ya hlokomela hore motho o lokela ho iketsetsa qeto ya hore o tla dumela eng.—Joshua 24:15.
Na nka sebedisa Bibele ya ka ha ke ithuta Bibele?
E. Le hoja re thabela ho sebedisa Phetolelo ea Lefatše le Lecha ea Mangolo a Halalelang le ho e fa batho mahala haeba ba e batla, re ka thaba haholo haeba o ka sebedisa Bibele ya hao. O ka kgona ho ithuta molaetsa wa Bibele o fanang ka tshepo le poloko phetolelong e nngwe le e nngwe.
Ke hobaneng ha o lokela ho ithuta le batho ba sa dumeleng seo o se dumelang?
-
Ntho ya bohlokwa bophelong ba rona ke lerato leo re nang le lona ho Jehova Modimo, ya batlang hore Bakreste ba rute ba bang seo ba ithutileng sona. (Matheu 22:37, 38; 28:19, 20) Re ikutlwa re le motlotlo hore e be re “basebetsi mmoho le Modimo” ka ho thusa batho hore ba ithute Lentswe la hae e leng Bibele.—1 Bakorinthe 3:6-9.
-
Hape re etsa sena hobane re rata baahelani ba rona. (Matheu 22:39) Re fumana thabo ka ho arolelana le ba bang seo re ithutileng sona.—Liketso 20:35.
a Ha re sheba palo ya batho bao re ithutang Bibele le bona, selemong sa 2023 re thutile Bibele le batho ba 7 281 212 kgwedi le kgwedi, bao boholo ba bona re ithutang le bona ka nako e le nngwe. Le ha ho le jwalo ke batho ba 269 517 feela ba ileng ba kolobetswa e le Dipaki Tsa Jehova selemong seo.
O ka Nna wa Rata le Tsena
MABAPI LE RONA
Ho Etsahala Eng Thutong ya Bibele?
Lefatsheng ka bophara, Dipaki Tsa Jehova di tsebahala ka ho ithaopela ho ithuta Bibele le batho mahala. Shebella hore na sena se etswa jwang.