Ho tloha ka December 2017, dintwa tse teng pakeng tsa batho ba Hema le Lendu provenseng ya Ituri e Democratic Republic of Congo, di entse hore batho ba bangata ba shwe mme ba dikete ba balehele dibakeng tse ding. Bara le baradibabo rona ba hara batho ba anngweng ke dintwa tseo tse ntseng di mpefala.

Batho ba diketekete ba tswang Congo ba balehetse Uganda mme ba akarelletsa bahweletsi ba 192 ba dulang dikampong tse pedi tsa batho ba balehileng tse haufi le moedi wa Congo. Ho tloha ka June 2018, Dipaki tse ding tse 1 098 di balehetse Bunia, e leng motse o moholo wa Ituri. Ka maswabi, banyalani ba bang le bana ba bararo bao batswadi ba bona e leng Dipaki, ba ile ba shwa ka lebaka la ho kula. Le ha ho le jwalo, ha hona bara kapa baradi babo rona ba ileng ba bolawa ntweng eo e mahlo mafubedu.

Matlo a barababo rona ba bangata ba ileng ba baleha ntwa ena, a ile a senngwa le ho tjheswa. Ho feta moo, masimo ao barababo rona ba ileng ba a sebeletsa ka thata bakeng sa ho iphedisa a ile a senngwa.

Haesale ntwa ena e qala, barababo rona ba tswang moo ho senang di ntwa ba thusa barababo rona ka dintho tseo ba di hlokang. Ba bang ba ile ba sebedisa dipalangwang tsa bona ho isa barababo rona dibakeng tse sireletsehileng (sheba setshwantsho se qalong). Ho feta moo, le hoja malapa a Dipaki a 205 a Bunia a ne a e na le ho honyenyane, a ile a fana ka tjhelete, dijo le bodulo bakeng sa barababo rona ba balehileng. Le hoja ho na le dikampo Bunia, bahweletsi kaofela ba ile malapeng a Dipaki tse ding.—Liproverbia 17:17.

Komiti ya Lekala ya Congo e ile ya theha Komiti ya Diphallelo, ho thusa bara le baradibabo rona ka ditlhoko tsa bona. Baemedi ba lekala ba ile ba etela barababo rona ho ba ho ba kgothatsa ka Bibele.

Bara le baradibabo rona ba ileng ba balehela Bunia le dibakeng tse ding, ba ntse ba tswela pele ho ya dibokeng le ho bolella ba bang ditaba tse molemo ho sa tsotellehe maemo ao ba leng ho ona. Ho tloha ka February ho fihlela ka April 2018, barababo rona ba ile ba qala ho kganna dithuto tsa Bibele tse 270 dikampong tsa batho ba balehileng.

E se e ka Jehova a ka tswela pele ho thusa bara le baradi ba bo rona ba Congo hore ba be le kgotso mme a hlohonolofatse le boiteko bo ntseng bo etswa ke bara le baradi ba bo rona ba ho ba thusa. Kaofela ha rona re lebelletse ka mahlo a ntjhotjho ha Modimo a tlisa Mmuso wa hae mme a fana ka tshireletso e sa feleng “sebakeng sa bodulo sa kgotso” bakeng sa batho bohle ba hae.—Esaia 32:17, 18.