25 FEBRUARY 2022
FRANCE
Buka ya Matheu e Lokollotswe ka Puo ya Matsoho ya Sefora
Ka la 19 February 2022, Mora wa bo rona Didier Koehler, setho sa komiti ea lekala la Fora, o ile a lokolla Bibele—kosepele ya Matheu ka puo ya matsoho ya Sefora (LSF). Bibele ena e se e fumaneha ho jw.org le ho app ya JW Library Sign Language. Ena ke buka ya pele ya Phetolelo ya Lefatše le Lecha ya Mangolo a Halalelang eo Dipaki Tsa Jehova di e lokolotseng ka puo ya matsoho ya Sefora (LSF).
Batho ba ka bang 1 500 ba ile ba shebella kgaso ya lenaneo la ho lokolloa ha Bibele ena. Puong ya hae, Mora bo rona Koehler o ile a hlalosa: “Kaha puo ya matsoho ea Sefora ke puo e bonwang, molaetsa o fetisoa ka ho sebelisa matsoho. Sefahleho, mahlo le mmele di bontsha maikutlo a batho bao ho buuwang ka bona. Re bona ntho e ngwe le e ngwe! Sena se etsa hore ho be bonolo haholo ho utlwisisa kapa ho bona ka ho hlaka ditlaleho tse tswang Bibeleng!”
Dipaki Tsa Jehova di ile tsa hlophisa mosebetsi wa boboledi wa puo ya matsoho ya Sefora (LSF) ho tloha bofelong ba lilemo tsa bo 1960. Ka bo 1972, ho ile ha thehwa phutheho ya pele ya puo ya matsoho ya Sefora (LSF) motseng o Paris, Vincennes, Fora. Hoo e ka bang ka selemo sa 2002 Sehlopha se Busang se ile sa fa Komiti ya Lekala la Fora tumello ya ho theha ofisi ya phetolelo ya puo ya matsoho ya Sefora (LSF). Ka 2019, nakwana pele ho sewa sena, sehlopha sa bafetoledi se ile sa fallela Bethele e Louviers, Fora. Kajeno ho na le diphutheho tse 11 tsa puo ya matsoho le dihlopha tse 39 ho pholletsa le tshimo la lekala la Fora.
Se seng sa diboka tsa pele Fora, tsa phutheho ya Puo ya Matsoho ya Fora Vincennes, dilemong tsa bo 1972. Boholo ba batho ba phutheho ena ba etsa seka sedikadikwe ho ena le ho etsa mola. Sena se nolofalletsa bamamedi ho bona ditlhaloso tsa ba bang.
Mosebetsi wa ho fetolela Bibele ka puo ya matsoho ya Sefora (LSF) o ile wa qala ka tlaleho ya Kosepele ya Matheu. Kosepele ya Johanne e tla lokollwa ha morao. Ditlaleho tsena tse pedi tsa bophelo ba Jesu di tsebahala haholo,mme kaha di pheta pale, ho bonolo ho di fetolela ho feta libuka tse ling tsa Bibele. Pele buka ya Matheu e lokollwa, bahweletsi ba ne ba ena le ditemana tsa Bibele tsa puo ya matsoho ya Sefora (LSF) tse fokolang feela.
Moradi e mong wa bo rona ya sa utlweng ditsebeng eo e leng setho sa sehlopha sa bafetoledi o ile a re: “Ha ke sa le ngwana, ke ne ke sheba ditshwantsho tse bukeng ya Motho e Moholo ka ho Fetisisa ya Kileng a Phela ka makgetlo a mangata. Ha ke shebella buka ya Matheu ka puo ya matsoho ya Sefora (LSF), ditswhantsho tsena kaofela di ile tsa kgutla kelellong ya ka. Ka lekgetlo la pele bophelong ba ka, ke ile ka utlwisisa molaetsa oo ka botlalo.”
Setho se seng sa sehlopha sa bafetoledi se ile sa re: “Esale ke lakatsa eka batswadi ba ka ba sa utlweng ditsebeng ba ka ba le Bibele ya puo ya matsoho ya Sefora (LSF). Empa ha ho mohla nkileng ka nahana hore nka ba karolo ya sehlopha sa bafetoledi ba Bibele ya puo ena. Buka ena ya Matheu ya puo ya matsoho ya Sefora (LSF) ke mpho e babatsehang!”
Sehlopha sa bafetoledi ba puo ya matsoho ya Fora se rekota setudiong sa bona se Bethele e Louviers, Fora
Ho lokolloa ha buka ena ya Bibele ya puo ya matsoho ya Sefora (LSF) ho re thabisa haholo. Ke bopaki bo bong ba hore Jehova o mema batho bohle hore ba “nke metsi a bophelo ntle ho tefo.”—Tšenolo 22:17
O ka Nna wa Rata le Tsena
DIPOTSO TSE ATISANG HO BOTSWA
Na Dipaki Tsa Jehova di na le Bibele ya Tsona?
Ho sebedisa diphetolelo tse fapaneng tsa Bibele ho ka eketsa tsebo ya rona ka Bibele. Ho na le dintlha tse tharo tse ka etsang hore Phetolelo ea Lefatše le Lecha ea Mangolo a Halalelang e be e nngwe ya Dibibele tseo o batlang ho di sebedisa ha o ithuta.
KA MOO MONEHELO WA HAO O SEBEDISWANG KA TENG
Ho Hlahisa Buka ya Bohlokwa ka ho Fetisisa
Ho na le dintho tse ngata tse amehang ha ho fetolelwa, ha ho hatiswa le ha ho kopanngwa Bibele ya Phetolelo ea Lefatše le Lecha.