NEW YORK-ka September 2017 Dipaki Tsa Jehova di ile tsa leka ka hohle ho phallela dibaka tse otlilweng ke Mahodiotswana a bitswang Irma le Maria a sentseng dibaka tse sehlekehleng sa Caribbean le dibaka tse haufi le sona. Tlaleho e latelang e tswang diofising tsa makala a Barbados, Cuba, Dominican Republic, France le United States e fana ka dintlha tse bontshang ka moo Dipaki di ileng tsa thusa ka teng.

Dikomiti tse tharo tsa diphallelo tse akarelletsang e ileng ya thehwa lekaleng la France, di ile tsa sebetsa ha mmoho ho hlophisa bara le baradibabo rona ba dibakeng tse haufi hore ba thuse ka ho fana ka ditlhoko tsa motheo ho bahweletsi ba anngweng ke mahodiotswana. Mosebetsi wa ho lokisa dibaka tse tlasa lekala la Barbados o tla hloka tjhelete e ka etsang didolara tse dimilione tse 2.4 mme o tla akaretsa ho lokisa Diholo Tsa Mmuso tse 8 le matlo a bara le baradibabo rona a 122. Matlo a mang a 19 a tla hloka ho hahwa botjha.

Lekala le tlalehile hore bahweletsi ba anngweng ke Lehodiotswana le bitswang Irma ba fumana thuso eo ba e hlokang. Thuso ena e akaretsa maeto a bodisa a etswang ke baemedi ba ofisi ya lekala.

Dikomiti tsena tse tharo tsa diphallelo di ile tsa etsa bonnete ba hore bahweletsi ba 57 ba anngweng ke mahodiotswana ba a hlokomelwa. Bara le baradibabo rona ba haufi ba ile ba fana ka dijo, metsi, diaparo le dintho tse ding tse hlokahalang. Ha kgwedi ya October e fela, matlo ohle a neng senyehile a ne a hlwekisitswe a bile a lokisitswe mme boholo ba mosebetsi oo o entswe ke Dipaki tsa moo tse neng di ithaopile.

Lekala le ile la theha Komiti ya Diphallelo sehlekehlekeng sa St. Martin, la boela la etsa sebaka sehlekehlekeng sa Guadeloupe bakeng sa diphallelo le ho hlokomela mosebetsi wa ho lokisa dibaka tse senyehileng o neng o tla hloka tjhelete e ka etsang didolara tse dimilione tse 1.4. Mosebetsi ona o akarelletsa ho lokisa Diholo Tsa Mmuso tse 12 Guadeloupe tse pedi St. Martin le matlo a 24 a bara le baradibabo rona. Baithaopi ba 22 ba kaho ba tswang France, Guadeloupe le Martinique ba tla thusa ka mosebetsi ona wa diphallelo.

Bahweletsi ba ka hodimo ho 13 000 ba tlasa lekala lena ba ile ba angwa ke mahodiotswana. Hona jwale, Dikomiti Tsa Diphallelo tse nne di thusa bara le baradibabo rona mme di se di qetile karolo ya pele ya mosebetsi wa tsona o akarelletsang ho lokisa mehaho e neng e senyehile ya bara le baradibabo rona e ka bang diphesente tse fetang 95 le ho fana ka dintho tseo ba neng ba di hloka tse kang dijo le metsi. Mosebetsi wa ho lokisa o sa ntse o tswela pele Puerto Rico, British le Dihlekehleke Tsa U.S. Virgin.

Baithaopi ba ka bang 450 ba tswang dihlekehlekeng le ba 240 ba tswang Florida le Georgia ba thusa ho lokisa Diholo Tsa Mmuso le matlo a bara le baradibabo rona mme kaofela ha bona ba 690. Ho bonahala mosebetsi ona wa diphallelo o hloka tjhelete e ka hodimo ho didolara tse dimilione tse 30 mme o akarelletsa mesebetsi e latelang:

• British le Dihlekehleke Tsa U.S. Virgin – Diholo Tsa Mmuso tse 5 le matlo a 190

• Florida – Diholo Tsa Mmuso tse 40 le matlo a 1 174

• Puerto Rico – Diholo Tsa Mmuso tse 106, Diholo tse pedi tsa Dikopano, le matlo a 1 216

• Turks le Caicos – Diholo Tsa Mmuso tse pedi le matlo a 56

Re rapela Jehova hore a matlafatse boiteko ba bara le baradibabo rona ba thusang ka mosebetsi ona. Re kgodisehile hore mosebetsi ona wa diphallelo ha mmoho le ho matlafatswa tumelong ho tla thusa bara le baradibabo rona hore ba thobehe maikutlo mme ba tswele pele ho sebeletsa Modimo e moholo Jehova.—Nehemia 2:18.

Media Contacts:

International: Mzamo Goloda, Office of Public Information, +27 11-761-1000

Barbados: John Medford, +1-246-438-0655

Dominican Republic: Josué Féliz, +1-809-595-4007

France: Guy Canonici, +33-2-32-25-55-55