E se e le nako jwale le ratana empa o se o qala ho ba le dipelaelo. Na le lokela ho tswela pele le ratana kapa le lokela ho arohana? Sehlooho sena se ka o thusa hore o etse qeto e nepahetseng.

Seo re tlo ithuta sona sehloohong sena

•  Ho sebetsana le dipelaelo

•  Ho etsa qeto e nepahetseng

•  Haeba o etsa qeto ya hore le arohane

 Ka mora ho ratana ka nakwana, mohlankana le morwetsana ba ka nna ba hlokomela hore ha ba tshwane jwalo ka ha ba ne ba nahana. Ka mohlala:

•   E mong o rata ho ya mawatleng ha e mong yena a rata ho hlwa dithaba.

•   E mong ke motho wa batho ha e mong yena a thabela ho ba mong.

•   E mong boholo ba nako ha a tshepahale ha e mong yena a dula a tshepahala.

 Hlokomela hore maemo ana kaofela a fapane. Boemo ba pele bo akaretsa dithahasello tse fapaneng, boemo ba bobedi bo akaretsa mekgwa e fapaneng, ha boemo ba boraro bona bo akaretsa ho se nke melao ya Bibele ya boitshwaro ka tsela e tshwanang.

 Seo o ka nahanang ka sona: Hara maemo aa a mararo, ke boemo bofe boo o bonang e ka ho ka ba thata ho bo mamella ha le ne le ka nyalana? Hona ke bofe boo le neng le ka tenyetseha ho bona?

 Monna le mosadi ba ntse ba ka thaba lenyalong le ha ba ena le dithahasello kapa mekgwa e fapaneng. Ho bua nnete feela, hore le tshwanelehe ho nyalana ha ho bolele hore le lokela ho tshwana ka dintho tsohle. Maemong a mang, monna le mosadi ba ka thabela dintho tseo e mong a di thabelang le ho rua molemo tseleng eo e mong a etsang dintho ka yona. a

 Ka lehlakoreng le leng, ke ha bohlokwa hore motho eo o tla nyalana le yena a nke melao ya Bibele ya boitshwaro ka ho teba jwalo ka wena. Haeba a sa etse jwalo, seo ke letshwao la hore le lokela ho arohana.

 Ka mohlala, nahana haeba le le bodumeding bo fapaneng. Buka ya Fighting for Your Marriage e re: “Dipatlisiso di bontsha hore hangata ha monna le mosadi ba le bodumeding bo fapaneng ba qetella ba hlalane.”

 Molaomotheo wa Bibele: ‘Le se ke la kena jokong le batho bao e seng badumedi. Ha se ntho e ka etsahalang kapa lesedi le lefifi di kopana hokae?’​—2 Bakorinthe 6:14.

 Bibele e re batho ba kenang lenyalong “ba tla ba le mathata a mangata.” (1 Bakorinthe 7:​28) Ka hona o se ke wa makala haeba le ena le mathata hona jwale leferehong la lona.

 O se ke wa nahana hore diqabang tse nyenyane tseo le bang le tsona di bolela hore le lokela ho arohana. Taba ya bohlokwa ke hore na le tla kgona ho di rarolla. Le tla lokela ho ba le bokgoni ba ho rarolla diqabang ha le se le nyalane.

 Molaomotheo wa Bibele: “Le bontshane mosa, le be le qenehelo le be le tshwarelane ka bolokolohi.”​—Baefese 4:32.

 Ka lehlakoreng le leng, haeba le dula le eba le diqabang tse kgolo sena se ka bontsha hore ehlile ha le tshwanelane. Haeba ho jwalo, ho ka ba molemo hore le bone pele le nyalana hore na le a tshwanelana kapa tjhe.

 Ntlha ya bohlokwa: Haeba o ena le dipelaelo ka motho eo o ratanang le yena kapa o sa kgodiseha hore na o se o loketse ho kena lenyalong, o se ke wa iphapanyetsa taba eo.

 Molaomotheo wa Bibele: “Ya bohlale o bona kotsi ebe o a ipata empa ba se nang kelello ha ba ipate ebe ba fumana ditholwana tse bosula.”​—Diproverbia 22:3.

 Ho arohana le motho eo o ratanang le yena ho ka nna ha o utlwisa bohloko. Le ha ho le jwalo, haeba e mong wa lona kapa le le babedi le dula le ena le dipelaelo ka lefereho la lona, ho ka ba molemo hore le arohane.

 Le ka etsang haeba le nka qeto ya ho arohana? Ntle le haeba ho ena le lebaka le utlwahalang, ho ka ba molemo hore le se ke la arohana ka ho romela melaetsa kapa le letsetsana. Ho ena le hoo, kgethang nako le sebaka se nepahetseng hore le buisane ka taba ena.

 Molaomotheo wa Bibele: “Le bolellane nnete.”​—Zakaria 8:16.

 Na ho arohana le motho eo o ratanang le yena ho bolela hore o ke ke wa hlola o fumana motho e mong? Ha ho jwalo. Hopola hore lefereho ke lona le o thusang ho bona hore na o ka nyalana le motho eo o ratanang le yena kapa tjhe. Ka hona le haeba lefereho la lona le ka fela, o ntse o ka ithuta dintho tsa bohlokwa ho se etsahetseng.

 Ipotse: ‘Ke ne ke le motho ya jwang ha ke ntse ke le leferehong leo? Na ho na le dintho tseo ke lokelang ho ntlafatsa ho tsona pele nka kena lenyalong? Nka etsa dintho ha molemo jwang haeba ke etsa qeto ya ho ratana hape?’