Bibele e entswe ka dibuka tse 66 tse halalelang. E nkile dilemo tse ka bang 1 600 hore e ngolwe. Bibele e na le molaetsa o tswang ho Modimo, ke ka hoo e bitswang “lentswe la Modimo.”​—⁠1 Bathesalonika 2:⁠13.

Sehloohong sena

•  Dintlha tse mabapi le Bibele

•  Bibele e na le molaetsa ofe?

•  Na molaetsa wa Bibele o fetotswe?

•  Ke hobaneng ha ho ena le diphetolelo tse ngata hakaale tsa Bibele?

•  Ke mang ya entseng qeto ya hore na ho ngolwe eng ka Bibeleng?

•  Na ho na le dikarolo tsa Bibele tse lahlehileng?

•  Re ka fumana ditemana tsa Bibele jwang?

•  Dibuka tse hlahang ka Bibeleng

•   Ke mang ya ngotseng Bibele? Modimo ke yena ya ngotseng Bibele, empa o ile a sebedisa banna ba ka bang 40 ho e ngola. Ba ne ba akarelletsa Moshe, Morena Davida, Matheu, Mareka, Luka le Johanne. a Modimo o ile a kenya molaetsa wa hae ka dikelellong tsa bona e le hore ba ka o ngola.​—⁠2 Timothea 3:⁠16.

   Ka mohlala: Ha rakgwebo a laela mongodi wa hae hore a ngole lengolo, molaetsa oo ke wa hae le hoja o ngotswe ke mongodi wa hae. Ka ho tshwanang, le hoja Modimo a sebedisitse batho ho ngola Bibele, ha e le hantle ke yena Mongodi wa Bibele.

•   Lentswe “Bibele” le bolelang? Lentswe “Bibele” le tswa lentsweng la Segerike biblia, le bolelang “dibuka tse nyane.” Ha nako e ntse e ya, biblia e ile ya hlaloswa e le dibuka tse nyenyane tseo ha di kopanngwa di etsang Bibele.

•   Bibele e ngotswe neng? Bibele e qadile ho ngolwa ka 1513 pele ho mehla ya Jesu yaba e qetwa dilemo tse ka hodimo ho 1 600 hamorao, hoo e ka bang ka selemo sa 98.

•   Bibele e ngotsweng pele ho tse ding kaofela e hokae? Bibele e ngotsweng pele ho tse ding kaofela ha e sa fumaneha hona jwale. Lebaka ke hobane bangodi ba Bibele ba ne ba ngolla hodima dintho tse senyehang habobebe tse neng di le teng ka nako eo, tse kang lodi le matlalo a ngollang. Le ha ho le jwalo, bakopitsi ba hlwahlwa ba Bibele ba ile ba dula ba kopitsa ka hloko molaetsa wa Bibele ka dilemo tse makgolo e le hore molaetsa ona o ka kgona ho balwa le nakong e tlang.

•   “Testamente ya Kgale” le “Testamente e Ntjha” ke eng? Testamente ya Kgale ke karolo ya Bibele e neng e ngotswe ka Seheberu, b mme e boetse e bitswa Mangolo a Seheberu. Karolo e bitswang Testamente e Ntjha ke e ngotsweng ka Segerike, e boetse e bitswa Mangolo a Segerike a Bakreste. Dikarolo tsena di le pedi di etsa buka e feletseng e leng Mangolo a Halalelang. c

•   Bibele e bua ka eng? Dikarolo tse fapaneng tsa Bibele di bua ka histori, melao, boprofeta, dithothokiso, maele, dipina le mangolo.​—⁠Sheba lebokose le reng “ Lethathamo la Dibuka Tsa Bibele.”

 Bibele e qala pele ka ho hlalosa kamoo Modimo ya Matla Ohle a bopileng mahodimo le lefatshe. O boetse o sebedisa Bibele ho re tsebisa lebitso la hae e leng Jehova, e le hore batho ba mo tsebe.​—⁠Pesaleme ya 83:⁠18.

 Bibele e hlalosa hore Modimo o ile a senngwa lebitso mme e hlalosa kamoo a tla ikgalaletsa kateng.

 Bibele e bua ka morero wa Modimo ka batho le ka lefatshe mme e bontsha kamoo Modimo a tla fedisa dintho tsohle tse bakelang batho mathata nakong e tlang.

 Bibele e fana ka dikeletso tseo re ka di sebedisang letsatsi le letsatsi. E meng ya mehlala ya dikeletso tseo ke ena:

•   Ho sebedisana hantle le batho ba bang. “Dintho tsohle tseo le batlang hore batho ba le etse tsona, le lona le ba etse tsona.”​—⁠Matheu 7:⁠12.

   See se bolelang? Re lokela ho tshwara batho ba bang ka tsela eo re batlang hore le bona ba re tshware ka yona.

•   Ho sebetsana le stress. “Le ka mohla le se ke la tshwenyeha ka letsatsi le hlahlamang hobane letsatsi le hlahlamang le tla ba le matshwenyeho a lona.”​—⁠Matheu 6:⁠34.

   See se bolelang? Ho ena le ho tshwenyeha haholo ka hore na ho tla etsahalang ka moso, re lokela ho sebetsana le mathata ao re tobanang le wona letsatsi ka leng.

•   Ho ba le lenyalo le thabileng. “E mong le e mong wa lona o lokela ho rata mosadi wa hae jwalo ka ha a ithata. Mosadi le yena o lokela ho hlompha monna wa hae haholo.”​—⁠Baefese 5:⁠33.

   See se bolelang? Lerato le tlhompho di bohlokwa e le hore lenyalo le atlehe.

 Tjhe. Ditsebi di ile tsa bapisa dikarolwana tsa Bibele ya boholoholo le ya hona jwale mme tsa fumana hore molaetsa wa Bibele o ngotsweng ho tloha qalong ha wa fetoha. Ena ke taba e utlwahalang hobane Modimo o batla hore batho ba bale ba be ba utlwisise molaetsa wa hae, ke ka hoo a entseng hore molaetsa wa hae o se ke wa fetoha. d​—⁠Esaia 40:⁠8.

 Batho ba bangata mehleng ena ha ba utlwisise dipuo tseo Bibele e neng e ngotswe ka tsona qalong. Le ha ho le jwalo Bibele e na le “ditaba tse monate” bakeng sa “ditjhaba tsohle, maloko ohle le dipuo tsohle.” (Tshenolo 14:⁠6) Ka lebaka leo, batho ba hloka phetolelo ya Bibele ka puo eo ba e utlwisisang le eo ba kgonang ho e bala hantle e le hore ba utlwisise molaetsa wa Modimo.

 Diphetolelo tsa Bibele di mefuta ena e meraro:

•   Phetolelo ya lentswe ka lentswe e fetolela mantswe ho ya ka tatellano ya ona.

•   Phetolelo e fetisang moelelo e sebedisa mantswe a hlalosang molaetsa wa puo ya qalong.

•   Phetolelo e nolofatsang dipolelo e etsa hore ditaba tse ngotsweng di balehe habonolo. Le ha ho le jwalo, dipolelo ha di a lokela ho nolofatswa haholo hoo di ka fetolang moelelo, hobane ho etsa jwalo ho ka lahla molaetsa o neng o fetiswa qalong ha ho ne ho ngolwa Bibele.

 Bibele e fetoletsweng ka tsela e nepahetseng e fetisetsa molaetsa wa Modimo ho batho ka tsela eo o neng o le ka yona qalong, hobane e leka-lekanya tshebediso ya lentswe ka lentswe, hape e sebedisa puo e bonolo eo batho ba e tlwaetseng. e

 Jwalo ka Mongodi wa yona, Modimo ke yena ya etsang qeto hore na ke eng se lokelang ho ba teng ka Bibeleng. O ile a qala pele ka ho kgetha setjhaba sa boholoholo sa Iseraele mme sa “fuwa melaetsa e halalelang ya Modimo” hobane Mangolo a Seheberu a ne a ngoletswe sona.​—⁠Baroma 3:⁠2.

 Tjhe. Bibele e felletse mme ha ho na dikarolo tsa yona “tse lahlehileng.” Batho ba bang ba re dibuka tse ding tsa kgale tse neng di patilwe ka nako e telele di tlameha ho kenyelletswa ka Bibeleng. f Le ha ho le jwalo, molaetsa wa Bibele kaofela o nepahetse mme re ka o tshepa. (2 Timothea 1:​13) Ka hoo, dibuka tsa Bibele di tswa ho Modimo mme kaofela ha tsona di a dumellana. Ha se seo re ka se buang ka dibuka tsa kgale tseo batho ba bang ba reng di tlameha ho kenyelletswa ka Bibeleng. g