Modimo ha a bake dikoduwa tsa tlhaho tse etsahalang kajeno, ho ena le hoo o amehile ka batho ba angwang ke tsona. Dikoduwa tsa tlhaho ke a mang a mathata ao Mmuso wa Modimo o tla a fedisa. Hona jwale, Modimo o tshedisa batho ba anngweng ke dikoduwa tsa tlhaho.—2 Bakorinthe 1:3.

•  Ke hobaneng ha re ka kgodiseha hore dikoduwa tsa tlhaho ha se kotlo e tswang ho Modimo?

•  Na dikoduwa tsa tlhaho di a bontsha hore re phela mehleng ya bofelo?

•  Modimo o thusa batho ba anngweng ke dikoduwa tsa tlhaho jwang?

•  Na Bibele e ka re thusa hore re itokisetse dikoduwa tsa tlhaho?

•  Ditemana tse kgothatsang ba anngweng ke dikoduwa tsa tlhaho

 Bibele e bontsha hore tsela eo Modimo a sebedisang matla a hae ho fana ka kahlolo ka yona e fapane hole le eo dikoduwa tsa tlhaho di etsahalang ka yona.

•   Dikoduwa tsa tlhaho ha di kgethe hore na di bolaya kapa ho lematsa bo mang. Ho ena le hoo, ha Modimo a ne a sebedisa matla a tlhaho ho fana ka kahlolo, o ne a etsa bonnete ba hore o fedisa batho ba kgopo. Ka mohlala, ha Modimo a fedisa metse ya Sodoma le Gomora, o ile a etsa bonnete ba hore Lota le baradi ba hae ba babedi ba a pholoha. (Genese 19:29, 30) Modimo o ile a bona se ka dipelong tsa batho ba mehleng eo mme a fedisa feela bao a neng a ba nka ba le kgopo.—Genese 18:23-32; 1 Samuele 16:7.

•   Dikoduwa tsa tlhaho di hlaha feela di sa rerisa. Ka lehlakoreng le leng, Modimo o ile a lemosa batho ba kgopo pele a sebedisa matla a tlhaho kgahlanong le bona. Batho ba ileng ba mamela temoso eo ba ile ba eba le monyetla wa ho baleha koduwa eo.—Genese 7:1-5; Matheu 24:38, 39.

•   Ho isa boholeng bo itseng, batho ba kentse letsoho hore dikoduwa tsa tlhaho di be teng. Jwang? Ba sentse tikoloho le ho haha dibakeng tse ratwang ke ditshisinyeho tsa lefatshe, merwallo le maemo a lehodimo a kotsi. (Tshenolo 11:18) Ka hoo, re ke ke ra beha Modimo molato ka diqeto tse etswang ke batho.—Diproverbia 19:3.

 E, boprofeta ba Bibele bo bontsha hore ho tla ba le dikoduwa ha ‘lefatshe le fela’ kapa “mehleng ya bofelo.” (Matheu 24:3; 2 Timothea 3:1) Ka mohlala, ha Jesu a ne a bua ka mehla ya rona, o ile a re: “Ho tla ba le tlala le ditshisinyeho tsa lefatshe sebakeng se seng ka mora se seng.” (Matheu 24:7) Haufinyane, Modimo o tla fedisa dintho tsohle tse etsang hore re utlwe bohloko ho akareletsa le dikoduwa tsa tlhaho.—Tshenolo 21:3, 4.

•   Modimo o ba kgothatsa ka Lentswe la hae, Bibele. Bibele e a re kgodisa hore Modimo o a re tsotella ebile o utlwa bohloko ha re hlahelwa ke mathata. (Esaia 63:9; 1 Petrose 5:6, 7) E boetse e bontsha hore o re tshepisa nako eo ka yona dikoduwa tsa tlhaho di tla beng di fedile.—Sheba lebokose le reng: “ Ditemana tse kgothatsang ba anngweng ke dikoduwa tsa tlhaho.”

•   Modimo o sebedisa barapedi ba hae ho ba thusa. Boprofeta bo ile ba bontsha hore Jesu o ne a tla tshedisa “ba robehileng dipelo” le “bohle ba utlwileng bohloko.” (Esaia 61:1, 2) Ka hoo, Modimo o sebedisa barapedi ba hae hore ba etsise mohlala wa Jesu.—Johanne 13:15.

   Modimo o boetse o sebedisa barapedi ba hae ho re ba thuse batho ba anngweng ke dikoduwa tsa tlhaho ka dintho tseo ba di hlokang.—Diketso 11:28-30; Bagalata 6:10.

 E. Le hoja Bibele e sa ngolwa ka morero wa hore re itokisetse dikoduwa, melaomotheo ya yona e ka re thusa. Ka mohlala:

•   Nahana hore o tla etsang ha ho ka ba le koduwa. Bibele e re: “Ya bohlale o bona kotsi ebe o a ipata.” (Diproverbia 22:3) Ha re nahana hore re tla etsang pele koduwa e hlaha, re a bontsha hore re bohlale. Re lokela ho ba le mokotla o dutseng o le malalaalaotswe, o tshetseng dintho tseo re tla di hloka maemong a tshohanyetso mme re hle re itokise hore na re tla kopana hokae haeba ho ka ba le koduwa.

•   Bophelo bo bohlokwa ho feta dintho tseo o nang le tsona. Bibele e bontsha hore “ha re a tlisa letho lefatsheng ebile re ke ke ra tloha ho lona re nkile letho.” (1 Timothea 6:7, 8) Re lokela ho ikemisetsa ho siya matlo a rona le dintho tseo re nang le tsona e le hore re pholohe koduwa. Re etsa hantle ha re hopola hore bophelo ba rona bo bohlokwa ho feta eng kapa eng eo re nang le yona.—Matheu 6:25.