E, e ka thusa. Modimo o tsotella bahlanka ba hae ba kulang. Mabapi le mohlanka ya tshepahalang, Bibele e re: “Jehova o tla mo tshehetsa hodima setulo sa hae se kang moalo sa ho kula.” (Pesaleme ya 41:3) Haeba o phela le bolwetse bo sa phekoleheng, dintlha tse latelang tse tharo di ka o thusa ho sebetsana le bona:

1.   Rapella matla a ho mamella. O ka fumana “kgotso ya Modimo e fetang monahano wohle,” e ka o fokoletsang ho tshwenyeha le ho o thusa hore o mamelle.​—Bafilipi 4:6, 7.

2.   Eba le boikutlo bo nepahetseng. Bibele e re: “Pelo e thabileng e tseba ho fodisa, empa moya o hlorileng o tepelletsa mmele.” (Liproverbia 17:22, Bibele​—Phetolelo e Ncha) Ithute ho swaswa ka dintho tse o hlahelang, ka ha sena se tla o imolla dinakong tse thata mme se ntlafatse bophelo ba hao.

3.   Matlafatsa tshepo ya hao ka bokamoso. Tshepo e ka o thusa ho dula o na le thabo ho sa tsotellehe bolwetse bo sa phekoleheng boo o nang le bona. (Baroma 12:12) Bibele e bolela esale pele ka nako eo ka yona ho seng “moahi ya tla re: ‘Ke a kula.’” (Esaia 33:24) Ka nako eo, Modimo o tla phekola malwetse ao mekgwa ya kajeno ya saense e sitwang ho a phekola. Ka mohlala, Bibele e hlalosa hore Modimo o tla fedisa botsofadi, e re: “Nama ya hae e ke e ntjhafale ho feta botjheng, a ke a kgutlele matsatsing a mahlahahlaha a hae a botjha.”​—Jobo 33:25.

 Tlhokomediso: Le hoja Dipaki Tsa Jehova di lemoha thuso eo Modimo a fanang ka yona, di boetse di batla thuso ya dingaka ha di tshwerwe ke malwetse a sa phekoleheng. (Mareka 2:17) Le ha ho le jwalo, ha re buelle mofuta o itseng wa phekolo ka ho kgetheha, re dumela hore motho e mong le e mong o lokela ho iketsetsa qeto ka ditaba tse amanang le bophelo ba hae.