SE KA THUSANG LELAPA | LENYALO
Na le Lokela ho Dula Mmoho Pele le Nyalana?
Batho ba bangata ba leferehong ba kgetha ho dula mmoho pele ba nyalana. Ba etsa sena e le hore ba bone hore na ba a tshwanelana le hore na ba ka ba le lenyalo le atlehileng. Empa na ho molemo hore batho ba dule mmoho pele ba nyalana?
Seo re tlo ithuta sona sehloohong sena
Bibele e reng?
Bibele e kgahlanong le batho ba etsang thobalano ba sa nyalana. Ka mohlala, e re: “Le se ke la etsa boitshwaro bo bobe bo amanang le thobalano.” (1 Bathesalonika 4:3; 1 Bakorinthe 6:18) Taba ena e akareletsa thobalano e etswang ke batho ba dulang mmoho empa ba sa nyalana le hoja ba rera ho nyalana hamorao. a Melao ya Bibele e thusa batho ba leferehong hore ba se ke ba ba le bana ka ntle ho lenyalo le ho ba qobisa mathata a ka bang teng ha ba dula mmoho pele ba nyalana.
Lenyalo ke tokisetso e tswang ho Modimo. Ha a ne a theha lenyalo o ile a re: ‘Monna o tla siya ntate wa hae le mme wa hae mme a kgomarele mosadi wa hae, bobedi ba bona e tla ba nama e le nngwe.’ (Genese 2:24) Ha monna le mosadi ba tshepahalla dikano tsa bona tsa lenyalo ba tla etsa hore lelapa la bona e be le thabileng le le tsitsitseng.
Na ho dula mmoho pele le nyalana ho tla le thusa ho itokisetsa lenyalo?
Batho ba bang ba nahana jwalo. Ba dumela hore ha batho ba babedi ba leng leferehong ba etsa mesebetsi ya ka tlung mmoho ebile ba sheba tsela eo e mong a itshwarang ka yona, ba tla tsebana hamolemo pele ba nyalana. Le ha ho le jwalo, ntho ya bohlokwa e etsang hore lenyalo le atlehe ke haeba banyalani ba tshepahalla dikano tsa bona.
Keng e tla thusa batho ba rerang ho nyalana hore ba dule ba tshehetsana ha ho theosetsa kapa ho nyolosetsa lenyalong la bona? Ba tla thuswa ke haeba ka bobedi ba tshepahallana ebile ba sebetsa mmoho ho rarolla mathata. Ho dula mmoho pele ba nyalana ho ke ke ha ba thusa hobane ha ba nke kamano ya bona e le ya bohlokwa mme e mong le e mong o na le bolokolohi ba ho itsamaela neng le neng ha a batla. Ka hoo seo se ke ke sa etsa lenyalo le atlehileng.
Ntlha ya bohlokwa: Ha batho ba leferehong ba dula mmoho ba ka qetella ba arohane le pele ba nyalana.
Molaomotheo: “Motho e mong le e mong o tla kotula seo a se jetseng.”—Bagalata 6:7.
Na ho dula mmoho pele le nyalana ho ka le thusa hore le boloke tjhelete?
Batho ba bang ba nahana jwalo. Dipatlisiso tse entsweng ke mokgatlo wa Pew Research Center di bontsha hore United States feela, hoo e ka bang batho ba bane ho ba leshome ba ile ba dula mmoho pele ba nyalana. Ba entse jwalo hobane ba nahana ho tla ba thusa ho boloka tjhelete. Le ha ho le jwalo, ka mora nako ba dutse mmoho ba bang ba ile ba bona hore mathata a ditjhelete a ile a ba mangata le ho feta mme seo sa etsa hore ba utlwe ba e so lokele ho nyalana.
Ha batho ba dula mmoho pele ba nyalana, nakong eo ba etsang qeto ya ho arohana, ho ba le ditlamorao tse bohloko tse amang bomme hobane ke bona hangata ba nkang boikarabelo ba ho hlokomela le ho hodisa bana ba le bang.
Ntlha ya bohlokwa: Ha batho ba dula mmoho pele ba nyalana ho ba le ditlamorao tse ngata tse bohloko.
Molaomotheo: “Nna Jehova ke Modimo wa hao ya o rutang dintho tse tswelang wena molemo.”—Esaia 48:17.
Na ho dula mmoho pele le nyalana ho ka le thusa hore le qobe ho nyalana le motho ya fosahetseng?
Batho ba bang ba nahana jwalo. Buka ya Fighting for Your Marriage e re: “Batho ba dulang mmoho pele ba nyalana hangata ha ba hlokomele hore ho ka ba thata hore ba arohane.” Hobaneng? Bafuputsi ba fumane hore batho ba dulang mmoho ba eso nyalane ba a mamella le ha ba se ba sa bone dintho ka tsela e tshwanang hobane feela ba kopanetse thepa, ba rekile ntlo mmoho kapa ba tlo ba le ngwana ba sa lebella. b Buka ya Fighting for Your Marriage e boetse e re: “Le hoja batho ba dulang mmoho pele ba nyalana ba ne ba ka arohana, ba se ba etsa qeto ya ho nyalana hobane feela ba se ba tlwaelane.”
Ntlha ya bohlokwa: Ho dula mmoho pele le nyalana ho tla etsa hore ho be thata hore le arohane le ha le bona hore ha le ka nyalana, lenyalo la lona le ke ke la atleha.
Molaomotheo: “Ya bohlale o bona kotsi ebe o a ipata empa ba se nang kelello ha ba ipate ebe ba fumana ditholwana tse bosula.”—Diproverbia 22:3.
Keng e ka le thusang hore le be le lenyalo le atlehileng?
Keng e ka le thusang ho qoba mathata a tliswang ke ho dula mmoho pele le nyalana le ho le thusa hore le tle le be le lenyalo le atlehileng? Ntho e ka thusang ke ho latela melao ya Bibele ka lenyalo. Le boetse le lokela ho ipha nako ya ho tsebana pele le ka etsa qeto ya ho dula mmoho le le monna le mosadi ba nyalaneng. Ha o kgetha motho eo o tla nyalana le yena, o lokela ho sheba hore na le dumellana ka dintho tsa bohlokwa bophelong le hore na tumelo ya lona e a tshwana, eseng feela ho ameha ka ho kgotsofatsa takatso ya hao ya ho etsa thobalano.
Bibele e fana ka keletso e ka o thusang hore o tle o thabe lenyalong le hore lenyalo la hao le tshwarelle. c Ka mohlala, Bibele e na le melaomotheo e ka o thusang hore o tle o . . .
qobe ho se tshepahale lenyalong
be molekane ya molemo wa lenyalo
hlokomele matshwao a lemosang dikotsi tse itseng ka motho eo o ratanang le yena
Ho ithuta ho iketsehileng ka dihlooho tsena sheba karolo ya “Lenyalo le Lelapa” e hlahang ho jw.org/st-za.
Molaomotheo: “Mangolo ohle a halalelang a tswa ho Modimo. A molemo hobane a a ruta.”—2 Timothea 3:16.
a Sheba sehlooho se reng: “Na ho Ratana ho Lokafatsa ho Kopanela Liphate Pele ho Lenyalo?”
b Sheba sehlooho se reng: “Sliding Versus Deciding: Inertia and the Premarital Cohabitation Effect” se ngotsweng ke Scott M. Stanley, Galena Kline Rhoades le Howard J. Markman, se hatisitsweng bukaneng ya Family Relations.
c Ditsong tse ding ho tlwaelehile hore batswadi ba kgethele bana ba bona balekane ba lenyalo. Le maemong a jwalo, Bibele e ka thusa batswadi hore ba shebe makgabane ao motho ya nyalanang le ngwana wa bona a lokelang ho ba le wona.
O ka Nna wa Rata le Tsena
DIPOTSO TSA BIBELE DI A ARAJWA
Bibele e Reng ka Batho ba Dulang ha Mmoho Pele ba Nyalana?
Ditaelo tsa Modimo le tsona di a bontsha hore na o ka etsang e le hore lelapa la hao le thabe mme melao ya hae e tswela batho ba dulang ba e boloka molemo.