Ha o ne o emolwa, o qadile o le sele e nyenyane haholo e bitswang zygote, sele eo e nyenyane haholo hoo o ka e bonang feela ha o sebedisa microscope. Dikgwedi tse mmalwa ka mora moo, o ile wa hlaha o se o le lesea. Sele eo e le nngwe e ile ya ikatisa mme ya eba disele tse ka hodimo ho 200 tse sa tshwaneng ka sebopeho le boholo mme di etsa mesebetsi e sa tshwaneng.

 Nahana ka sena: Zygote e etsa DNA e tshwanang le yona ebe e ikarola habedi. Disele tseo le tsona di ikatisa ka tsela e tshwanang ka makgetlo a mangata. Qalong, disele tseo tse ntjha kaofela ha tsona di a tshwana. Ka hara DNA ya tsona, ho na le ditaelo tsa hore na di ka etsa disele tsa mofuta ofe.

 Beke ka mora kemolo, disele di qala ho ikarola ka mefuta e mmedi e ikgethang. Disele tse ding di a ikopanya hore e be lesea le eso hlahe, ha tse ding di ikopanya hore di etse thari e kwahelang ngwana ha a le ka popelong. Ho boetse ho na le disele tse mo thusang hore a nne a hole ha a ntse a le kamoo.

 Bekeng ya boraro, disele tsa lesea le eso hlahe di ikarola ka mekgahlelo e meraro e latellanang. Disele tsa mokgahlelo o ka ntle di etsa methapo, boko, molomo, letlalo le ka ntle le disele tse ding. Disele tsa mokgahlelo o bohareng di etsa madi, masapo, diphio, mesifa le dikarolwana tse ding tsa mmele. Mokgahlelo o ka hare wa disele, o etsa ditho tse ka hare tse kang matshwafo, senya le boholo ba dintho tse thusang hore dijo di silehe.

 Ha motho e ntse e le moimana, disele tse ding tsa lesea le eso tswalwe di ka tsamaya e le sele ka nngwe kapa e le sehlopha ho tloha karolong e nngwe e itseng ya lesea ho ya ho e nngwe. Disele tse ding di a ikopanya mme di etsa sebopeho se kang maqephe, dithapo kapa masoba. Disele tsena di lokela ho sebedisana hammoho e le hore di etse dibopeho tsena. Mohlala, ha di fihla boemong bo itseng, disele tse kang maqephe di ka ikgarela mme tsa iketsa mathopo a manyane. Disele tsena di ipopa ka nako e le nngwe dikarolong tse sa tshwaneng tsa lesea le eso hlahe. Mathopo ana a a hola, a hlahisa a mang ebe hamorao a a kopana mme eba karolo ya mathopo a thusang lesea hore le kgone ho hema.

 Nakong eo ngwana a hlahang a phetse hantle ke hobane disele tse makgolo a dibilione di entse mosebetsi oo di neng di lokela ho o etsa mme e nngwe le e nngwe e ne e le sebakeng se nepahetseng ka nako e nepahetseng.

 O nahana jwang? Na sele e ikentse hore e kgone ho etsa mesebetsi ee kapa e bopilwe jwalo?