Buka ya Pele ya Dikronike 21:1-30
21 Satane* a lwantsha Baiseraele mme a susumelletsa Davida hore a bale Baiseraele.+
2 Davida a re ho Joabe+ le balaodi ba setjhaba: “Tsamayang le yo bala Baiseraele ho tloha Beersheba ho ya fihla Dane.+ Ka mora moo, le mpolelle e le hore ke tle ke tsebe palo ya bona.”
3 Empa Joabe a re: “E se eka Jehova a ka eketsa batho ba hae ka makgetlo a 100. Morenaka, kaofela ha bona e se e ntse e le bahlanka ba hao. Ke hobaneng ha o batla ho etsa ntho ee? Ke hobaneng ha o etsa hore Baiseraele ba be molato?”
4 Empa morena a hana ho mamela Joabe. Joabe a tloha mme a tsamaya Iseraele yohle. Ka mora moo, a fihla Jerusalema.+
5 Joabe a fa Davida palo ya batho ba neng ba ngodisitswe. Banna bohle ba Iseraele ba tshwarang disabole ba ne ba le 1 100 000 mme banna ba Juda ba tshwarang disabole ba le 470 000.+
6 Empa leloko la Levi le la Benjamine ha le a ka la ngodiswa hara bona+ hobane Joabe o ne a nyonya seo morena a se buileng.+
7 Modimo wa nnete ha a ka a thabela ntho ena. Ka hoo, a otla Baiseraele.
8 Davida a re ho Modimo wa nnete: “Ke entse sebe+ se seholo ka ho etsa ntho ena. Ke kopa o ntshwarele+ hobane ke entse ka bowatla.”+
9 Jehova a bua le Gade+ ya bonang dipono bakeng sa Davida a re:
10 “Tsamaya mme o re ho Davida, ‘Jehova o re: “Ke o fa dikotlo tse tharo. Ikgethele eo o e batlang.”’”
11 Gade a tla ho Davida a re ho yena: “Jehova o re, ‘Ikgethele
12 hore na ho be le dilemo tse tharo tsa tlala+ kapa dikgwedi tse tharo o bolawa ke dira tsa hao mme di o hlasela ka sabole+ kapa matsatsi a mararo a sabole ya Jehova, e leng hore lengeloi la Jehova le tlise lefu la sewa naheng yohle ya Iseraele.’+ Jwale inahane mme o mpolelle hore na ke reng ho ya nthomileng.”
13 Davida a re ho Gade: “Ke tshwenyehile haholo. Re kopa hore re se ke ra fuwa kotlo ke motho+ empa e be Jehova ya re fang kotlo hobane yena o mohau haholo.”+
14 Jehova a tlisa lefu la sewa+ Iseraele mme ha shwa batho ba 70 000 Iseraele.+
15 Ho ekelletsa moo, Modimo wa nnete a romela lengeloi hore le yo fedisa Jerusalema. Empa ha le le haufi le ho etsa jwalo, Jehova a bona seo yaba o utlwa bohloko* ka lebaka la tlokotsi eo.+ A re ho lengeloi le neng le tlo fedisa batho: “Ho lekane!+ Theola letsoho la hao.” Lengeloi la Jehova le ne le eme haufi le seotlo sa Ornane+ wa Mojebuse.+
16 Ha Davida a sheba hodimo, a bona lengeloi la Jehova le eme sepakapakeng le tshwere sabole+ mme le supile Jerusalema ka yona. Hanghang Davida le baholo ba itihela fatshe, ba inama+ ba ikwahetse ka masela a hwashang.*+
17 Davida a re ho Modimo wa nnete: “Na ha se nna ya itseng ho balwe batho? Ke nna ya entseng sebe mme ke nna ya entseng phoso+ empa dinku tsee tsona di entseng? Jehova Modimo wa ka, ke kopa hore o tlise kotlo ena ho nna le ho ba lelapa la ntate wa ka empa o se ke wa otla setjhaba sa hao.”+
18 Lengeloi la Jehova la re Gade+ a bolelle Davida hore a nyolohe a yo etsetsa Jehova aletare seotlong sa Ornane wa Mojebuse.+
19 Yaba Davida o a nyoloha ka mora hore moprofeta Gade a mo bolelle seo Jehova a se buileng.
20 Ka nako eo, Ornane o ne a ntse a pola koro. Ha a hetla, a bona lengeloi. Bara ba hae ba bane ba neng ba ena le yena ba ipata.
21 Ha Davida a tla ho yena, Ornane a mo bona mme hanghang a tswa seotlong a inamela Davida sefahleho sa hae se shebile fatshe.
22 Davida a re ho Ornane: “Nthekisetse* sebaka sena sa seotlo e le hore nka hahela Jehova aletare ho sona. Nthekisetse sona ka tjhelete e feletseng hore bolwetse bona bo tshwereng batho bo tle bo fediswe.”+
23 Empa Ornane a re ho Davida: “Inkele sona morenaka mme o etse seo o bonang se le molemo. Dikgomo tsa nyehelo ya setjheso ke tsena ke fana ka tsona le selei+ sa ho pola* bakeng sa patsi ha mmoho le koro bakeng sa nyehelo ya dijo.* Ke fana ka tsona kaofela.”
24 Le ha ho le jwalo, Morena Davida a re ho Ornane: “Tjhe, ke lokela ho se reka ka tjhelete e feletseng hobane nke ke ka nka dintho tsa hao ebe ke di fa Jehova kapa ka nyehela mahlabelo a setjheso ka dintho tseo ke di fumaneng mahala.”+
25 Davida a fa Ornane dikotwana* tsa kgauta tse 600 bakeng sa sebaka seo.
26 Davida a hahela Jehova aletare+ moo mme a nyehela mahlabelo a setjheso le mahlabelo a kopanetsweng, a rapela Jehova yaba o mo arabela ka ho theolela mollo+ o tswang lehodimong hodima aletare ya nyehelo ya setjheso.
27 Yaba Jehova o laela lengeloi+ hore le kgutlisetse sabole ya lona selateng* sa yona.
28 Ka nako eo, ha Davida a bona hore Jehova o mo arabetse seotlong sa Ornane wa Mojebuse, a dula a etsetsa mahlabelo moo.
29 Empa ka nako eo, tabernakele ya Jehova eo Moshe a neng a e entse lefeelleng le aletare ya nyehelo ya setjheso di ne di le sebakeng se phahameng Gibeone.+
30 Empa Davida o ne a sa ka a kgona ho ya ka pela yona ho ya bua le Modimo hobane o ne a tshositswe ke sabole ya lengeloi la Jehova.
Dintlha tse qetellong ya sehloho
^ Kapa mohlomong: “Mohanyetsi.”
^ Kapa: “a swaba.”
^ Ka Seheberu: “Mphe.”
^ Ka Seheberu: “dishekele.” Shekele e lekana le dikramo tse 11,4. Sheba Ntlha ya B14.
^ Sepatjhe sa sabole se entsweng ka letlalo.