Lengolo la Pele la Johanne 2:1-29
2 Bana ba ka bao ke ba ratang, ke le ngolla dintho tsena hore le se ke la etsa sebe. Le ha ho le jwalo, haeba mang kapa mang a etsa sebe, re na le mothusi* ya lokileng+ ya ho Ntate, e leng Jesu Kreste.+
2 Ke sehlabelo+ se hlakolang dibe tsa rona+ e le hore re ka boelana le Modimo, eseng dibe tsa rona feela empa le tsa lefatshe lohle.+
3 Haeba re tswela pele ho mamela ditaelo tsa hae, ho tla bonahala hore re a mo tseba.
4 Ya reng: “Ke a mo tseba” empa a sa mamele ditaelo tsa hae o leshano ebile ha a na nnete.
5 Empa haeba motho a mamela ditaelo tsa hae, ho tla bonahala hore ka nnete o rata Modimo.+ Ha re etsa jwalo, re tla be re bontsha hore re momahane le yena.+
6 Ya reng o momahane le yena o tlameha ho tswela pele a mo etsisa.*+
7 Baratuwa, ha ke le ngolle taelo e ntjha empa ke le ngolla taelo ya kgale eo esale le ena le yona ho tloha qalong.+ Taelo ena ya kgale ke lentswe leo le ileng la le utlwa.
8 Hape, ke le ngolla taelo e ntjha. Ke taelo eo Jesu a ileng a e mamela le eo le ileng la e mamela hobane lefifi le a feta mme lesedi la nnete le se le ntse le kganya.+
9 Ya reng o leseding empa a hloile+ ngwanabo o ntse a le lefifing.+
10 Ya ratang ngwanabo o dula leseding+ mme ha a etse sebe.*
11 Ya hloileng ngwanabo o lefifing, o tsamaya lefifing+ ebile ha a tsebe moo a yang+ hobane lefifi le mo foufaditse.
12 Bana ba ka, ke le ngolla hobane le tshwaretswe dibe ka lebaka la lebitso la Jesu.+
13 Bontate, ke le ngolla hobane le tseba Jesu eo esale a le teng ho tloha qalong. Bahlankana, ke le ngolla hobane le hlotse Satane.*+ Bana ba ka, ke le ngolla hobane le tseba Ntate.+
14 Bontate, ke le ngolla hobane le tseba Jesu eo esale a le teng ho tloha qalong. Bahlankana, ke le ngolla hobane le matla,+ le dumela lentswe la Modimo+ ebile le hlotse Satane.*+
15 Le se ke la rata lefatshe kapa dintho tse lefatsheng.+ Haeba motho a rata lefatshe, ha a rate Ntate+
16 hobane dintho tsohle tse lefatsheng e leng ditakatso tse fosahetseng,+ ho lakatsa dintho tseo re di bonang+ le ho ithorisa ka* dintho tseo re nang le tsona, ha di tswe ho Ntate empa di tswa lefatsheng.
17 Lefatshe le dintho tsohle tse ho lona tseo batho ba di lakatsang di tla fela+ empa ya etsang thato ya Modimo o tla phela ka ho sa feleng.+
18 Bana ba ka, re se re le horeng ya ho qetela. Le utlwile hore mohanyetsi wa Kreste o a tla,+ le hona jwale ho se ho ena le bahanyetsi ba Kreste ba bangata+ e leng ntho e pakang hore re se re le horeng ya ho qetela.
19 Ba ile ba ikarola ho rona hobane e se karolo ya rona.+ Hoja e ne e le karolo ya rona, ba ka be ba dutse le rona. Empa ba ile ba ikarola ho rona e le hore ho bonahale hore ha se bohle bao e leng karolo ya rona.+
20 Le kgethilwe ke mohalaledi+ mme kaofela ha lona le na le tsebo.
21 Ha ke le ngolle hobane le sa tsebe nnete+ empa hobane le e tseba le hobane ha ho leshano le ka tswang nneteng.+
22 Ya latolang hore Jesu ke Kreste ke yena ya leshano.+ Ya latolang Ntate le Mora ke mohanyetsi wa Kreste.+
23 E mong le e mong ya latolang Mora ha a amohelwe ke Ntate.+ Empa ya bolelang hore o dumela ho Mora+ o amohelwa ke Ntate.+
24 Le dule le etsa dintho tseo le di utlwileng ho tloha qalong.+ Haeba le di etsa, le tla dula le momahane le Ntate le Mora.
25 Hape Modimo o re tshepisitse bophelo bo sa feleng.+
26 Ke le ngolla dintho tsena hobane ho na le batho ba lekang ho le kgelosa.
27 Ka ha Modimo o le kgethile ka moya o halalelang+ mme moya oo o dutse ho lona, ha le hloke ho rutwa ke motho e mong. Moya oo o le ruta dintho tsohle,+ o na le nnete ebile ha o na leshano. Le dule le momahane le eo moya o halalelang o tswang ho yena feela jwalo ka ha moya o le rutile.+
28 Bana ba ka, le dule le momahane le yena e le hore ha a bonahatswa re ka bua ka bolokolohi+ mme re se ke ra ikgula ho yena re swabile nakong eo a seng a le teng.
29 Haeba le tseba hore o lokile, le boetse le a tseba hore e mong le e mong ya etsang dintho tse lokileng ke ngwana hae.+
Dintlha tse qetellong ya sehloho
^ Kapa: “mmuelli.”
^ Ka Segerike: “ho tsamaya feela jwalo ka ha eo a ile a tsamaya.”
^ Kapa mohlomong: “ha a dihele ba bang hore ba etse sebe.”
^ Ka Segerike: “ya kgopo.”
^ Ka Segerike: “ya kgopo.”
^ Kapa: “ho batla hore batho ba bone.”
