Lengolo la Pele la Johanne 3:1-24
3 Bonang hore na Ntate o re rata hakaakang!+ O re bitsa bana ba hae*+ mme re fela re le bona. Empa lefatshe ha le re tsebe+ hobane ha le tsebe Ntate.+
2 Baratuwa, le hoja re le bana ba Modimo,+ ha re eso tsebe hore na re tla ba jwang ka moso.+ Empa re a tseba hore mohla a iponahatsang re tla tshwana le yena hobane re tla mo bona ka tsela eo a leng ka yona.
3 E mong le e mong ya mo tshepileng o a itlhwekisa+ ka ha le yena o hlwekile.
4 Sebe ke tlolo ya molao. Ka hoo, e mong le e mong ya tlwaetseng ho etsa sebe o tlwaetse ho etsa tlolo ya molao.
5 Le lona le a tseba hore o ile a bonahatswa hore a tlose dibe+ tsa rona empa yena ha a na sebe.
6 E mong le e mong ya dulang a momahane le yena ha a tlwaela ho etsa sebe.+ Ya tlwaetseng ho etsa sebe ha a eso mo bone ebile ha a mo tsebe.
7 Bana ba ka, le se ke la thetswa hobane motho ya tlwaetseng ho etsa dintho tse lokileng, o lokile feela jwalo ka ha Jesu a lokile.
8 Ya tlwaetseng ho etsa sebe o tswa ho Diabolose hobane haesale Diabolose a etsa sebe ho tloha qalong.+ Mora wa Modimo o ile a bonahatswa hore a senye mesebetsi ya Diabolose.+
9 Bana ba Modimo ha ba itlwaetse ho etsa sebe+ hobane moya wa hae o halalelang* o dula ho bona. Ba ke ke ba tlwaela ho etsa sebe hobane ba tswetswe ke Modimo.+
10 Bana ba Modimo le bana ba Diabolose ba bonahala ka tsela ena: E mong le e mong ya sa etseng dintho tse lokileng le ya sa rateng ngwanabo, ha se ngwana Modimo.+
11 Ho tloha qalong le tsebile molao o reng re lokela ho ratana.+
12 Re se ke ra tshwana le Kaine, ya ileng a etsisa Diabolose* yaba o bolaya ngwanabo.+ O ile a mo bolaya hobane mesebetsi ya hae e ne e le mebe+ empa ya ngwanabo e le metle.+
13 Bana beso, le se ke la makala ha batho ba lefatshe lena ba le hloile.+
14 Re a tseba hore re tlositswe lefung ra iswa bophelong+ hobane re rata bana ba bo rona.+ Ya se nang lerato o ntse a shwele.+
15 E mong le e mong ya hloileng ngwanabo ke mmolai+ mme le a tseba hore ha ho mmolai ya tla fumana bophelo bo sa feleng.+
16 Re a tseba hore na lerato keng hobane Jesu o ile a tela bophelo ba hae bakeng sa rona,+ le rona re tlameha ho tela bophelo ba rona molemong wa bana ba bo rona.+
17 Haeba mang kapa mang a ena le dintho tse lekaneng hore a ka iphedisa mme a bona hore ngwanabo o a hloka ebe ha a mo bontshe mohau, na a ka re o rata Modimo?+
18 Bana ba ka, re se ke ra bua feela hore re rata batho ba bang+ empa re bontshe le ka diketso hore re a ba rata+ hape lerato la rona e be la nnete.+
19 Ka tsela eo, re tla tseba hore re na le nnete mme re tla ikgodisa hore Modimo o a re rata.
20 Le ha dipelo tsa rona di ka re qosa ka ntho efe kapa efe, re dule re hopola hore Modimo o moholo ho dipelo tsa rona ebile o tseba dintho tsohle.+
21 Baratuwa, haeba dipelo tsa rona di sa re qose, re ka bua le Modimo ka bolokolohi.+
22 O tla re fa eng kapa eng eo re e kopang+ hobane re mamela ditaelo tsa hae hape re etsa dintho tse mo kgahlisang.
23 O re laetse hore re dumele lebitsong la Mora wa hae Jesu Kreste+ le hore re ratane.+
24 Ho feta moo, ya mamelang ditaelo tsa Modimo o tla dula a momahane le Modimo, le Modimo o tla dula a momahane le yena.+ Ka ha o re file moya wa hae, re a tseba hore o tla dula a momahane le rona.+
Dintlha tse qetellong ya sehloho
^ Ka Segerike: “bana ba Modimo.”
^ Ka Segerike: “peo ya Hae.”
^ Ka Segerike: “ya kgopo.”
