Lengolo la Pele la Johanne 4:1-21
4 Baratuwa, le se ke la kgolwa motho e mong le e mong ya reng molaetsa wa hae o tswa ho Modimo.+ Le hlahlobe hore na molaetsa oo o tswa ho Modimo+ hobane hohle lefatsheng ho tletse baprofeta ba bohata.+
2 Ena ke tsela eo ka yona le tla tseba hore molaetsa oo le o utlwang o tswa ho Modimo: Molaetsa o reng Jesu Kreste o ile a tla lefatsheng e le motho o tswa ho Modimo.+
3 Empa molaetsa o reng Jesu ha a tla lefatsheng e le motho ha o tswe ho Modimo.+ Ona ke molaetsa wa mohanyetsi wa Kreste oo le utlwileng hore o a tla+ mme molaetsa ona o se o le teng lefatsheng.+
4 Bana ba ka, le tswa ho Modimo mme le hlotse baprofeta ba bohata+ hobane ya nang le lona+ o matla ho feta ya nang le batho ba lefatshe.+
5 Baprofeta bana ba bohata ba tswa lefatsheng.+ Ka hoo, ba bua dintho tseo lefatshe le di buang. Ke ka hoo lefatshe le ba mamelang.+
6 Rona re tswa ho Modimo. Ya tsebang Modimo o a re mamela,+ ya sa tsweng ho Modimo ha a re mamele.+ Ena ke tsela eo ka yona re tla bona phapang pakeng tsa molaetsa wa nnete o tswang ho Modimo le molaetsa wa leshano.+
7 Baratuwa, a re duleng re ratana+ hobane lerato le tswa ho Modimo. E mong le e mong ya nang le lerato ke ngwana Modimo mme o tseba Modimo.+
8 Motho ya se nang lerato ha a tsebe Modimo hobane Modimo ke lerato.+
9 Modimo o ile a re bontsha hore o a re rata ka hore a romele Mora wa hae ya mong*+ lefatsheng e le hore re ka fumana bophelo ka yena.+
10 O ile a romela Mora wa hae e le sehlabelo se hlakolang dibe tsa rona+ e le hore re ka boelana le yena.+ O entse jwalo hobane a re ratile eseng hobane re mo ratile.
11 Baratuwa, haeba Modimo o re ratile jwalo, le rona re tlameha ho ratana.+
12 Ha ho na motho ya kileng a bona Modimo le ka mohla.+ Haeba re tswela pele ho ratana, Modimo o tla dula a ena le rona mme lerato la hae le tla bonahala ka tsela e phethahetseng ho rona.+
13 Re a tseba hore re dula re momahane le yena mme le yena o momahane le rona hobane o re file moya wa hae.
14 Hape re bone ebile re a paka hore Ntate o rometse Mora wa hae e le mopholosi wa lefatshe.+
15 Mang kapa mang ya dumelang hore Jesu ke Mora wa Modimo+ o dula a momahane le Modimo, le Modimo o dula a momahane le yena.+
16 Re a tseba ebile re a dumela hore Modimo o a re rata.+
Modimo ke lerato+ mme motho ya lerato ka dinako tsohle o dula a momahane le Modimo, le Modimo o dula a momahane le yena.+
17 Ona ke mokgwa oo ka wona lerato le bonahetseng ka tsela e phethahetseng ho rona e le hore re ka bua ka sebete+ ka letsatsi la kahlolo hobane bophelo ba rona lefatsheng lena bo tshwana le ba Kreste.
18 Motho ya ratang Modimo ha a tshohe.+ Lerato le phethahetseng le etsa hore re se ke ra tshoha hobane ho tshoha ho re sitisa ho etsa dintho tse ngata. Motho ya letswalo ha a na lerato le phethahetseng.+
19 Re bontsha lerato hobane Modimo o ile a re rata pele.+
20 Motho ya reng: “Ke rata Modimo” empa a hloile ngwanabo o leshano.+ Motho a ka rata Modimo eo a eso mo bone+ jwang empa a sa rate ngwanabo+ eo a mo bonang?
21 Taelo eo re e filweng ke yena ke ena, hore ya ratang Modimo o lokela ho rata le ngwanabo.+
Dintlha tse qetellong ya sehloho
^ Ka Segerike: “ya tswetsweng a nnotshi.”
