Lengolo la Pele la Johanne 5:1-21
5 Motho e mong le e mong ya dumelang hore Jesu ke Kreste, ke ngwana Modimo.+ E mong le e mong ya ratang Ntate e leng Modimo, o rata le bana ba Modimo.
2 Re a tseba hore re rata bana ba Modimo+ ha re rata Modimo ebile re mamela ditaelo tsa hae.
3 Ha re rata Modimo re tla mamela ditaelo tsa hae+ hobane ditaelo tsa hae ha di boima.+
4 Bana ba Modimo ba hlola lefatshe.+ Ntho e re thusitseng hore re hlole lefatshe ke tumelo ya rona.+
5 Ke mang ya ka hlolang lefatshe+ haese ya nang le tumelo ya hore Jesu ke Mora wa Modimo?+
6 Jesu Kreste o tlile ka metsi le madi eseng ka metsi feela+ empa ka metsi le ka madi.+ Moya o a e paka taba ena+ hobane moya ke nnete.
7 Ho na le dipaki tse tharo,
8 ke moya,+ metsi+ le madi+ mme di le tharo jwalo di a dumellana.
9 Haeba re amohela bopaki boo batho ba fanang ka bona, bopaki boo Modimo a fanang ka bona bo matla le ho feta hobane Modimo ka boyena o fana ka bopaki bo mabapi le Mora wa hae.
10 Motho ya dumelang ho Mora wa Modimo o bontsha hore o dumela seo Modimo a mo rutileng sona. Motho ya sa dumeleng ho Modimo o re Modimo o leshano+ hobane ha a dumele bopaki boo Modimo a faneng ka bona mabapi le Mora wa hae.
11 Bona ke bopaki boo Modimo a re fileng bona: O re file bophelo bo sa feleng+ mme re bo fumana ka lebaka la Mora wa hae.+
12 Motho ya amohelang Mora o na le bophelo boo, ya sa amoheleng Mora wa Modimo ha a na bona.+
13 Ke le ngolla dintho tsena e le hore le tsebe hore ha le eba le tumelo lebitsong la Mora wa Modimo,+ le tla ba le bophelo bo sa feleng.+
14 Re kgodisehile* hore ho sa tsotellehe hore na re kopa eng ho Modimo,+ ha feela e le tumellanong le thato ya hae, o tla re utlwa.+
15 Ka ha o a re utlwa ho sa tsotellehe hore na re kopa eng, re a tseba hore o tla re fa dintho tseo re di kopang hobane re mo kopile.+
16 Haeba motho a bona ngwanabo a etsa sebe se sa lebiseng lefung, a rapelle ngwanabo mme Modimo o tla mo fa bophelo.+ Taba ena e sebetsa ho batho ba etsang sebe se sa lebiseng lefung.+ Le ha ho le jwalo, ho na le sebe se lebisang lefung. Ha ke re a rapelle motho ya entseng sebe se jwalo.
17 Dintho tsohle tse sa lokang ke sebe.+ Le ha ho le jwalo, ho na le sebe se sa lebiseng lefung.
18 Re a tseba hore bana ba Modimo ha ba itlwaetsa ho etsa sebe hobane Mora wa Modimo* o a ba hlokomela mme ya kgopo a ke ke a ba etsa letho.+
19 Re a tseba hore re ba Modimo empa lefatshe lohle le buswa ke Satane.*+
20 Re a tseba hore Mora wa Modimo o tlile lefatsheng+ mme o re file kutlwisiso e le hore re ka tseba Modimo wa nnete. Ka lebaka la Mora wa hae Jesu Kreste, re momahane le yena.+ Ke Modimo wa nnete ebile ke mohlodi wa bophelo bo sa feleng.+
21 Bana ba ka, suthelang hole le ditshwantsho tse rapelwang.+
Dintlha tse qetellong ya sehloho
^ Kapa: “Re bua le Modimo re sa tshabe letho.”
^ E leng Jesu Kreste.
^ Ka Segerike: “ke ya kgopo.”
