Lengolo la Pele la Petrose 1:1-25
1 Nna Petrose, moapostola+ wa Jesu Kreste, ke ngolla ba kgethilweng bao e leng baahi ba nakwana ba hasaneng dibakeng tsa Pontase, Galatia, Kapadosia,+ Asia le Bithinia.
2 Modimo Ntate wa rona o ile a le kgetha hobane a rerile esale pele.+ O ile a le kgetha ka ho le halaletsa ka moya o halalelang+ e le hore le mo mamele, a ba a le hlwekisa ka madi a Jesu Kreste.+
E se eka Modimo a ka le bontsha mosa* o mongata a be a le fe le kgotso e ngata.
3 Ho roriswe Modimo, Ntate wa Morena wa rona Jesu Kreste hobane ka lebaka la mohau wa hae re ile ra tswalwa botjha+ ha a tsosa Jesu Kreste bafung+ e le hore re be le tshepo e sa feleng.+
4 Modimo o le fa lefa le ke keng la senyeha kapa la fela.+ O le boloketse lefa leo lehodimong.+
5 O le boloketse lona bao a sebedisang matla a hae ho le sireletsa hobane le ena le tumelo. Tshireletso eo e tla bonahatswa nakong ya bofelo.
6 Ke ka lebaka leo le thabileng le hoja ka nakwana le utlwiswa bohloko ke diteko tse fapaneng hona jwale. Empa ho a hlokahala hore le fete ditekong tsena+
7 e le hore tumelo ya lona e be matla le ho feta. Le hlahelwa ke dintho tsena e le hore ho bonahale hore na tumelo ya lona e matla hakae.+ Tumelo ena e bohlokwa ho feta kgauta hobane le hoja kgauta e ka mamella mollo, qetellong e ntse e ka senyeha. Empa ha le ena le tumelo ena, le tla roriswa, le hlomphuwe le ho fuwa tlotla mohla Jesu Kreste a bonahatswang.+
8 Le hoja le eso ka le mo bona, le a mo rata ebile le a bontsha hore le dumela ho yena. Thabo eo le nang le yona ke e sa hlaloseheng.
9 Le thabile hobane le tla pholoswa ka lebaka la tumelo ya lona.+
10 Baprofeta ba buileng ka mosa oo Modimo a le bontshitseng wona ba ile ba botsa le ho batlisisa ka taba ena ya ho pholoswa.+
11 Moya o halalelang o ile wa bolela esale pele hore Kreste o tla utlwa bohloko+ ebe ka mora moo o a phahamiswa. Baprofeta ba ile ba batlana le matshwao ao moya o halalelang o neng o fana ka ona a hore na dintho tsena di tla etsahala neng.+
12 Modimo o ile a etsa hore baprofeta ba hlokomele hore dintho tseo ba neng ba di profeta, ba ne ba di profeta bakeng sa lona eseng bona. Baprofeta ba ile ba ngola ka dintho tseo le di boleletsweng ke batho ba phatlalatsang ditaba tse monate ka thuso ya moya o halalelang o tswang lehodimong.+ Mangeloi a lakatsa ho utlwisisa dintho tsena.
13 Ikemisetseng ho sebetsa, le bule dikelello+ le be le tshepe hore le tla bontshwa mosa mohla Jesu Kreste a bonahatswang.
14 Le se le le bana ba Modimo ba mamelang. Ka hoo, le kgaotse ho etsa dintho le susumetswa ke ditakatso tse fosahetseng tseo le neng le ena le tsona pele le tseba Modimo.
15 Le halalele dinthong tsohle tseo le di etsang jwalo ka ha ya le bitsitseng a halalela.+
16 Mangolo a re: “Le halalele hobane ke a halalela.”+
17 Ha le kopa dintho ho Ntate wa lona ya ahlolang bohle ka toka+ ho ya ka mesebetsi ya bona, le bontshe hore le a mo hlompha+ ha le sa ntse le le lefatsheng.
18 Le a tseba hore ha le a lopollwa ka dintho tse senyehang tse kang silevera le kgauta+ bophelong ba lona bo se nang thuso boo le bo fetiseditsweng ke baholoholo ba lona.
19 Le lopolotswe ka madi a bohlokwa+ a Kreste+ a jwalo ka a konyana e phetseng hantle, e hlwekileng.+
20 Ke nnete hore Kreste o ile a kgethwa pele lefatshe le thehwa+ empa o ile a bonahatswa nakong ya bofelo molemong wa lona.+
21 Ka lebaka la hae, le ile la dumela ho Modimo.+ O ile a mo tsosa bafung+ a ba a mo tlotlisa+ e le hore le ka dumela ho Modimo le be le mo tshepe.
22 Ka ha le mametse lentswe la Modimo, le hlwekisitswe. Ka lebaka leo, le ratana e le ka nnete.+ Ratanang ka pelo yohle.+
23 Le tswetswe botjha+ ka lentswe la Modimo ya phelang, ya dulang a le teng+ eseng ka peo e senyehang.+
24 “Batho bohle ba tshwana le jwang. Botle ba bona bo tshwana le ba palesa ya naheng. Jwang bo a omella, palesa yona e a foforeha.
25 Empa lentswe la Jehova* le tshwarella ka ho sa feleng.”+ “Lentswe” lena ke ditaba tse monate tseo le ileng la di bolellwa.+
