Buka ya Bobedi ya Bakorinthe 6:1-18
6 Ka ha re basebetsimmoho le Modimo,+ re le kopa hore le se ke la amohela mosa* wa Modimo ebe ha le etse letho ka wona+
2 ka ha Modimo o re: “Ke ile ka o utlwa ka nako ya hore ke o bontshe mosa mme ka o thusa ka letsatsi la poloko.”+ Hona jwale ke nako ya hore a re bontshe mosa, ke letsatsi la poloko.
3 Ha re kgopise motho le ha e le ofe e le hore ho se ke ha eba le motho ya buang hampe ka mosebetsi oo re o etsetsang Modimo+
4 empa re a bontsha hore re basebeletsi ba Modimo ka ditsela tsohle.+ Re mameletse dintho tse ngata, matshwenyeho, ho hloka le mathata.+
5 Re ne re otlwa, re kwallwa diteronkong,+ re hlaselwa ke matshwele a batho, re sebetsa ka thata, re sa robale bosiu ebile re hloka dijo.+
6 Re phela bophelo bo hlwekileng, re tseba nnete, re a mamella,+ re mosa,+ re dumella moya o halalelang hore o re tataise hape re ratana ho tswa pelong.+
7 Re bolella batho nnete, re tshepa matla a Modimo,+ re tshwara dibetsa tsa ho loka+ ka letsohong le letona* le le letshehadi.*
8 Re a hlomphuwa ebile re a hlomphollwa, re buuwa hampe ebile re a roriswa, batho ba re re bua leshano empa re bua nnete.
9 Batho ba re nka re sa tsejwe empa Modimo o a re tseba, ho bona re bonahala eka re a shwa* empa re ntse re phela,+ ba re fa kotlo empa ha ba re bolaye.+
10 Batho ba nahana hore ha re a thaba empa re dula re thabile, ba nahana hore re futsanehile empa re fa batho ba bangata dintho tse molemo, ba nahana hore ha re na letho empa re na le dintho tsohle.+
11 Bana beso ba Korinthe, re bua le lona re phutholohile mme re le rata haholo.*
12 Le ha ho le jwalo, lona ha le re rate ka tsela eo re le ratang ka yona.+
13 Ke bua le lona jwalo ka ha ke bua le bana ba ka, le re rate jwalo ka ha le rona re le rata, le eketse lerato leo le re ratang ka lona.+
14 Le se ke la kena jokong* le batho bao e seng badumedi.+ Ho loka le tlolo ya molao di kopana hokae?+ Hona lesedi le lefifi di kopana hokae?+
15 Na ho na le ntho eo Kreste le Beliale*+ ba ka dumellanang ka yona? Kapa na ho na le ntho eo motho ya dumelang ho Kreste* le ya sa dumeleng ho Kreste ba tshwanang ka yona?+
16 Na ho a kgoneha hore ditshwantsho tse rapelwang di be ka tempeleng ya Modimo?+ Re tempele ya Modimo ya phelang+ jwalo ka ha Modimo a itse: “Ke tla dula le bona+ mme ke tsamaye hara bona. Ke tla ba Modimo wa bona mme bona e tla ba setjhaba sa ka.”+
17 “‘Ka hona tswang hara bona, le ikarole ho bona,’ ke Jehova ya tjhong,* ‘le kgaotse ho tshwara ntho e sa hlwekang’”+ “‘mme ke tla le amohela.’”+
18 “‘Ke tla ba ntate wa lona+ mme le tla ba bana ba ka,’+ ke Jehova* Ya Matla Ohle ya tjhong.”
Dintlha tse qetellong ya sehloho
^ Mohlomong bakeng sa ho hlasela.
^ Mohlomong ho itshireletsa.
^ Kapa: “re tshwanelwa ke ho shwa.”
^ Kapa: “re le buletse dipelo.”
^ Kapa: “la itswakanya.”
^ E tswa lentsweng la Seheberu le bolelang “Ya se Nang Thuso.” Lentswe lena le sebediswa ha ho buuwa ka Satane.
^ Kapa: “motho ya tshepahalang.”
^ Sheba Ntlha ya A5.
^ Sheba Ntlha ya A5.
