Buka ya Bobedi ya Dikronike 3:1-17
3 Solomone a hahela Jehova ntlo+ Jerusalema Thabeng ya Moria+ moo Jehova a ileng a hlaha ho ntate wa hae Davida,+ sebakeng seo Davida a neng a se lokisitse seotlong sa Ornane+ wa Mojebuse.
2 A qala ho haha ka letsatsi la bobedi la kgwedi ya bobedi, ha a ne a ena le dilemo tse nne a busa.
3 Motheo oo Solomone a ileng a o etsa bakeng sa ho haha ntlo ya Modimo wa nnete o ne o le bolelele ba dimithara tse ka bang 27* mme o le bophara ba dimithara tse ka bang robong,*+ ho ya ka tsela ya kgale ya ho lekanya.*
4 Foranta e ka pele e ne e le bolelele ba dimithara tse ka bang robong,* e lekana le bophara ba ntlo mme bophahamo ba yona e le 120.* A e kwahela ka kgauta e hlwekileng ka hare.+
5 A kwahela ntlo e kgolo ka lepolanka la junipere. Ka mora moo, a e kwahela ka kgauta ya boleng bo botle+ mme a e kgabisa ka ditshwantsho tsa sefate sa palema+ le ka diketane.+
6 Ho feta moo, a kgabisa ntlo ka majwe a matle a bohlokwa.+ Kgauta+ eo a neng a e sebedisa e ne e tswa Parevaime.
7 A kwahela ntlo, mapolanka, mabota a yona le mamati a yona ka kgauta+ mme a fata ditshwantsho tsa dikerubime maboteng.+
8 A etsa kamore* ya Sehalaledisiso.+ Bolelele ba yona bo ne bo lekana le bophara ba ntlo, e le dimithara tse ka bang robong* mme bophara ba yona e le dimithara tse ka bang robong.* A e kwahela ka kgauta ya boleng bo botle e boima ba dikhilokramo tse 20 520.*+
9 Boima ba kgauta ya dipekere e ne e le dikramo tse 570.* A kwahela dikamore tse ka hodimo ka kgauta.
10 A etsa ditshwantsho tse pedi tsa dikerubime ka kamoreng* ya Sehalaledisiso mme a di kwahela ka kgauta.+
11 Bolelele ba mapheo ohle a dikerubime+ e ne e le dimithara tse ka bang robong.* Lepheo le leng la kerubime ya pele le ne le le bolelele ba dimithara tse ka bang pedi* mme le thetsa lebota la ntlo. Lepheo le leng le lona le ne le le bolelele ba dimithara tse ka bang pedi* mme le thetsa lepheo la kerubime e nngwe.
12 Lepheo le leng la kerubime e nngwe le ne le le bolelele ba dimithara tse ka bang pedi* mme le thetsa lebota le leng la ntlo. Lepheo le leng la yona le ne le le bolelele ba dimithara tse ka bang pedi* mme le thetsa lepheo la kerubime ya pele.
13 Ha mapheo a dikerubime tsena a phukalletse a ne a etsa dimithara tse ka bang robong.* Di ne di eme ka maoto mme di shebile ka Sehalalelong.
14 A boela a etsa kgaretene+ ka kgwele e putswa, ulu e pherese, e kgubedu le ka lesela la boleng bo botle mme a e kgabisa ka dikerubime.+
15 Ka mora moo, a etsa dipilara tse pedi+ ka pela ntlo tse bolelele ba dimithara tse ka bang 16.* Hlooho e ka hodima pilara e nngwe le e nngwe e ne e le dimithara tse ka bang pedi.*+
16 A etsa diketane tse kang difaha mme a di beha karolong e hodimo ya dipilara. A etsa le dikgarenate tse 100 mme a di beha hodima diketane.
17 A hloma dipilara tseo ka pela tempele. E nngwe ka letsohong le letona* mme a e reha Jakine,* e nngwe ka ho le letshehadi* mme a e reha Boase.*
Dintlha tse qetellong ya sehloho
^ Ka Seheberu: “ditswe tse 60.”
^ Ka Seheberu: “ditswe tse 20.”
^ Setswe se lekana le disenthimithara tse 44,5 empa ba bang ba nahana hore “tsela ya kgale ya ho lekanya” e bolela setswe se selelele se lekanang le disenthimithara tse 51,8. Sheba Ntlha ya B14.
^ Ka Seheberu: “ditswe tse 20.”
^ Tekanyo ya yona ha e tsejwe hantle.
^ Ka Seheberu: “ditalenta tse 600.” Talenta e lekana le dikhilokramo tse 34,2. Sheba Ntlha ya B14.
^ Ka Seheberu: “ditswe tse 20.”
^ Ka Seheberu: “ditswe tse 20.”
^ Ka Seheberu: “ntlo.”
^ Ka Seheberu: “dishekele tse 50.” Shekele e lekana le dikramo tse 11,4. Sheba Ntlha ya B14.
^ Ka Seheberu: “ntlong.”
^ Ka Seheberu: “ditswe tse 20.”
^ Ka Seheberu: “ditswe tse hlano.”
^ Ka Seheberu: “ditswe tse hlano.”
^ Ka Seheberu: “ditswe tse hlano.”
^ Ka Seheberu: “ditswe tse hlano.”
^ Ka Seheberu: “ditswe tse 20.”
^ Ka Seheberu: “ditswe tse 35.”
^ Ka Seheberu: “ditswe tse hlano.”
^ Kapa: “borwa.”
^ E bolelang “E se Eka [Jehova] a ka Tiisa ka Thata.”
^ Kapa: “leboya.”
^ Mohlomong e bolela “Ka Matla.”
