Buka ya Bobedi ya Dikronike 4:1-22
4 Solomone a etsa aletare ya koporo+ e bolelele ba dimithara tse ka bang robong,* e bophara ba dimithara tse ka bang robong* le bophahamo ba dimithara tse ka bang nne.*
2 A etsa le Tanka*+ e sedikadikwe ka tshepe. Boahlamo ba yona e ne e ka ba dimithara tse nne* mme bophahamo ba yona e le dimithara tse ka bang pedi.* E ne e ka potapotwa ke kgwele e lekanyang e bolelele ba dimithara tse ka bang 13.*+
3 Ho ne ho ena le mekgabiso ya mehope+ tlasa molomo wa Tanka e o potapotileng. Ho potoloha Tanka,* disenthimithareng tse ding le tse ding tse ka bang 45* ho ne ho ena le mekgabiso e leshome. Mekgabiso eo e ne e le mela e mmedi.
4 Tanka* e ne e le hodima dipoho tsa koporo tse 12,+ tse tharo di shebile leboya, tse tharo bophirimela, tse tharo borwa, tse tharo botjhabela mme kaofela di furallane.
5 Botenya ba yona e le disenthimithara tse ka bang supa* mme molomo wa yona o entswe jwalo ka molomo wa kopi, o jwalo ka thunthung ya kgahla.* E ne e ka tshela dilithara tse 66 000* tsa metsi.
6 Hape a etsa dibeisine tse leshome tsa ho hlatswetsa mme a beha tse hlano ka lehlakoreng le letona le tse hlano ka lehlakoreng le letshehadi.+ Ba ne ba hlatswetsa dintho tse sebedisetswang ho etsa nyehelo ya setjheso ho tsona.+ Empa Tanka* e ne e sebediswa ke baprista bakeng sa ho itlhatswa.+
7 A etsa didulwana tsa mabone tsa kgauta+ tse leshome ho ya ka moo di neng di tshwanetse ho ba ka teng+ mme a di beha ka tempeleng. A beha tse hlano ka lehlakoreng le letona le tse hlano ka lehlakoreng le letshehadi.+
8 A boela a etsa ditafole tse leshome mme a di beha ka tempeleng. A beha tse hlano ka lehlakoreng le letona le tse hlano ka lehlakoreng le letshehadi.+ A etsa le dikotlolo tsa kgauta tse 100.
9 A etsa lebala+ la baprista+ le lebala le leholo+ yaba o etsa mamati bakeng sa mabala ao mme o a kwahela ka koporo.
10 A beha Tanka* ka lehlakoreng le letona la ntlo ho elella ka borwabotjhabela.+
11 Hirame a boela a etsa dinkgo, dikgarafu le dijana.+
A qeta mosebetsi oo a neng a o etsetsa Morena Solomone bakeng sa ntlo ya Modimo wa nnete:+
12 Dipilara tse pedi+ le dihlooho tse bopehileng jwalo ka sejana tse neng di le hodima dipilara tseo, disefe+ tse pedi ho kwahela dihlooho tseo,
13 dikgarenate tse 400+ bakeng sa disefe tse pedi, mela e mmedi ya dikgarenate bakeng sa sefe ka nngwe, ho kwahela dihlooho tseo tse pedi,+
14 diteroli* tse leshome le dibeisine tse leshome hodima diteroli,+
15 Tanka* le dipoho tse 12 tse tlasa yona,+
16 dinkgo, dikgarafu, difereko+ le disebediswa tse ding tsohle tseo Hirame-abive+ a di etseditseng Morena Solomone ka koporo e bentshitsweng bakeng sa ntlo ya Jehova.
17 Morena a di etsetsa letsopeng seterekeng sa Jordane pakeng tsa Sukothe+ le Zereda.
18 Solomone a etsa disebediswa tsena tsohle di le ngata haholo. Boima ba koporo ha bo a ka ba tsebahala.+
19 Solomone a etsa disebediswa+ tsohle bakeng sa ntlo ya Modimo wa nnete e leng aletare ya kgauta,+ ditafole+ tse behang bohobe ba pontsho,+
20 didulwana tsa mabone le mabone a tsona a kgauta e hlwekileng+ e le hore a kgantshe ka pela kamore e ka harehare jwalo ka ha ho ne ho laetswe
21 le dithunthung, mabone le ditong* tsa kgauta e hlwekileng ka ho fetisisa,
22 dintho tse timang mollo, dijana, dikopi le dipane tsa mollo tsa kgauta e hlwekileng, a kwahela mamati a Sehalaledisiso+ le mamati a tempele ka kgauta.+
Dintlha tse qetellong ya sehloho
^ Ka Seheberu: “ditswe tse 20.” Setswe se lekana le disenthimithara tse 44,5. Sheba Ntlha ya B14.
^ Ka Seheberu: “ditswe tse 20.” Sheba Ntlha ya B14.
^ Ka Seheberu: “ditswe tse leshome.”
^ Ka Seheberu: “Lewatle.” Kapa: “Letsha.”
^ Ka Seheberu: “ditswe tse leshome.”
^ Ka Seheberu: “ditswe tse hlano.”
^ Ka Seheberu: “ditswe tse 30.”
^ Ka Seheberu: “Lewatle.”
^ Kapa: “setsweng se seng le se seng.”
^ Ka Seheberu: “Lewatle.”
^ Ka Seheberu: “bophara ba seatla.” Sheba Ntlha ya B14.
^ Kapa: “palesa.”
^ Ka Seheberu: “dibate tse 3 000.” Bate e lekana le dilithara tse 22. Sheba Ntlha ya B14.
^ Ka Seheberu: “Lewatle.”
^ Ka Seheberu: “Lewatle.”
^ Kapa: “diteroli tsa metsi.”
^ Ka Seheberu: “Lewatle.”
