Buka ya Bobedi ya Marena 21:1-26
21 Manase+ o ne a le dilemo di 12 ha e eba morena mme a busa Jerusalema ka dilemo tse 55.+ Lebitso la mme wa hae e ne e le Hefziba.
2 O ile a etsa dintho tse sa thabiseng Jehova ka hore a etse dintho tse nyonyehang tse neng di etswa ke ditjhaba+ tseo Jehova a neng a di lelekile ha Baiseraele ba hapa naha.+
3 A haha botjha dibaka tse phahameng tseo ntate wa hae Ezekiase a neng a di sentse+ mme a etsetsa Baale dialetare le palo e halalelang*+ feela jwalo ka ha Akabe morena wa Iseraele a ne a entse.+ O ile a inamela makgotla ohle a lehodimo le ho a sebeletsa.+
4 Manase a boela a haha dialetare ka tlung ya Jehova+ eo Jehova a ileng a re ka yona: “Lebitso la ka le tla ba Jerusalema.”+
5 A hahela makgotla ohle a lehodimo dialetare+ ka hara mabala a mabedi a ntlo ya Jehova.+
6 A tjhesa* mora wa hae, a sebedisa boselamose, a batla dipontsho tsa se tlang,+ a batla thuso ho batho ba reng ba buisana le badimo le ho batho ba reng ba bolela diketsahalo esale pele.*+ A etsa dintho tse mpe ka ho fetisisa, a utlwisa Jehova bohloko.
7 O ile a beha setshwantsho se betlilweng sa palo e halalelang*+ seo a neng a se entse ka tlung eo ka yona Jehova a ileng a re ho Davida le ho mora wa hae Solomone: “Ke tla beha lebitso la ka ka ho sa feleng ka tlung ena le Jerusalema eo ke e kgethileng malokong ohle a Iseraele.+
8 Haeba Baiseraele ba mamela ditaelo tsa ka tseo ke ba fileng tsona le Molao wohle oo mohlanka wa ka Moshe a itseng ba o latele,+ nke ke ka ba tlosa hape naheng eo ke e fileng baholoholo ba bona.”+
9 Empa Baiseraele ha ba a ka ba mamela, Manase o ile a ba kgelosa, a etsa hore ba etse dintho tse mpe ho feta tse neng di etswa ke ditjhaba tseo Jehova a neng a di fedisitse ha Baiseraele ba hapa naha.+
10 Jehova a sebedisa bahlanka ba hae e leng baprofeta+ a re:
11 “Manase morena wa Juda o ile a etsa dintho tsena tsohle tse nyonyehang.* O ile a etsa dintho tse mpe ho feta Baamore+ ba bileng teng pele ho yena+ mme a etsa hore Juda e etse sebe ka ditshwantsho tse rapelwang tse nyonyehang.
12 Ka lebaka leo Jehova Modimo wa Iseraele o re: ‘Ke tlisa tlokotsi Jerusalema+ le Juda mme bohle ba utlwang ka yona ba tla tshoha.*+
13 Ke tla ahlola Jerusalema jwalo ka ha ke ile ka ahlola*+ Samaria+ le ba lelapa la Akabe.+ Ke tla hlakola Jerusalema feela jwalo ka ha motho a hlakola sejana le ho se shebisa fatshe.+
14 Ke tla lahla ba setseng lefeng la ka+ mme ke etse hore dira tsa bona di ba hlole, di tla ba hapa mme e be thepa ya tsona+
15 hobane ba entse dintho tse sa nthabiseng le ho nkutlwisa bohloko, ho tloha letsatsing leo ka lona baholoholo ba bona ba ileng ba tswa Egepeta ho fihlela letsatsing lena.’”+
16 Ntle le sebe seo Manase a ileng a etsa hore Bajuda ba se etse ka hore ba fosetse Jehova, o ile a bolaya batho ba bangata haholo ba se nang molato. A bolaya batho ho tloha qalong ya Jerusalema ho ya qetellong ya yona.+
17 Histori yohle ya Manase, dintho tsohle tseo a ileng a di etsa le dibe tsohle tseo a di entseng di ngotswe bukeng ya histori ya marena a Juda.
18 Manase a shwa* mme a patelwa serapeng sa ntlo ya hae seo e neng e le sa Uza.+ Mora wa hae Amone ya eba morena.
19 Amone+ o ne a le dilemo di 22 ha e eba morena mme a busa Jerusalema ka dilemo tse pedi.+ Lebitso la mme wa hae e ne e le Meshulemethe moradi wa Haruze ya tswang Jotba.
20 O ile a nna a etsa dintho tse sa thabiseng Jehova jwalo ka ntate wa hae Manase.+
21 A nna a etsa dintho tsohle tseo ntate wa hae a neng a di etsa, a sebeletsa le ho kgumamela ditshwantsho tse rapelwang jwalo ka ha ntate wa hae a ne a etsa.+
22 O ile a tlohela Jehova Modimo wa baholoholo ba hae mme ha a ka a mamela Jehova.+
23 Bahlanka ba morena Amone ba mo rerela bolotsana mme ba mo bolaela ka tlung ya hae.
24 Empa baahi ba naha ba bolaya batho bohle ba ileng ba rerela Morena Amone bolotsana. Ba etsa mora wa hae Josiase morena.+
25 Histori yohle ya Amone le dintho tsohle tseo a ileng a di etsa, di ngotswe bukeng ya histori ya marena a Juda.
26 Ba mo patela lebitleng la hae le neng le le serapeng sa Uza+ mme mora wa hae Josiase+ ya eba morena.
Dintlha tse qetellong ya sehloho
^ Ka Seheberu: “fetisa mollong.”
^ Kapa: “mathuela.”
^ Polelo ena ya Seheberu e ka amana le lentswe “bolokwe” mme e sebediseditswe ho bontsha ho hloya.
^ Ka Seheberu: “ditsebe tsa bona di tla hlohlona.”
^ Ka Seheberu e re Modimo o ahlola batho ba hae a sebedisa disebediswa tseo sehahi se methang ka tsona.
^ Ka Seheberu: “a patwa jwalo ka baholoholo ba hae.”
