Buka ya Bobedi ya Marena 5:1-27
5 Naamane e ne e le molaodi wa masole a morena wa Siria eo morena a neng a mo nka e le motho wa bohlokwa hobane Jehova o ile a sebedisa yena hore Siria e hlole* ntweng. E ne e le monna ya matla a bile a le sebete le hoja a ne a tshwerwe ke lepera.*
2 Ka letsatsi le leng ha Basiria ba tswa hlasela Iseraele, ba tla ba hapile ngwanana e monyenyane mme a sebeletsa mosadi wa Naamane.
3 Ngwanana eo a re ho mosadi wa Naamane: “Haeba morenaka a ne a ka ya Samaria, moprofeta+ ya Samaria o ne a ka mo fodisa lepera.”+
4 A* bolella morena wa hae hore na ngwanana wa Moiseraele o itseng.
5 Morena wa Siria a re ho Naamane: “Tsamaya. Ke tla romella morena wa Iseraele lengolo.” A tsamaya a nkile silevera ya boima ba dikhilokramo tse 342,* dikotwana tse 6 000 tsa kgauta le diaparo tse leshome.
6 A romella morena wa Iseraele lengolo le reng: “Ke romela lengolo lena le mohlanka wa ka Naamane hore o mo fodise.”
7 Ka mora hore morena wa Iseraele a bale lengolo, a tabola diaparo tsa hae mme a re: “Ke hobaneng ha a romela monna eo ho nna hore ke tlo mo fodisa lepera? Na ke nna Modimo mme na ke na le matla a ho bolaya kapa a ho phedisa?+ Le lona le a bona hore o batla re qabane.”
8 Empa ha mohlanka wa Modimo wa nnete e leng Elisha a utlwa hore morena wa Iseraele o tabotse diaparo tsa hae, a romela molaetsa ho yena a re: “Ke hobaneng ha o tabotse diaparo tsa hao? Ke kopa o mo dumelle a tle ho nna a tle a tsebe hore ho na le moprofeta Iseraele.”+
9 Naamane a ya ho Elisha ka dipere le ka dikariki tsa hae tsa ntwa mme a fihla a ema pela monyako wa ntlo ya hae.
10 Elisha a roma moromuwa hore a re ho Naamane: “Tsamaya o yo hlapa ka makgetlo a supileng+ Jordane+ mme o tla fola o be o hlweke.”
11 Naamane a halefa, a tsamaya a ntse a re: “Ke ne ke nahanne hore o tla tla ho nna, a rapele Jehova Modimo wa hae a ntse a isa letsoho kwana le kwana moo ke nang le lepera e le hore a le fodise.
12 Na metsi a dinoka tsa Damaseka+ e leng Abana le Parpare ha a molemo ho feta metsi ohle a Iseraele? Na nke ke ka hlweka ha nka hlapela ho tsona?” A tsamaya a halefile.
13 Bahlanka ba hae ba ya ho yena ba re: “Monghadi, na ha se nnete hore haeba moprofeta a ne a itse o etse ntho e kgolo o ne o tla e etsa? Empa o itse o etse ntho e bonolo feela ya hore o hlape mme o hlweke.”
14 Naamane a theohela nokeng ya Jordane a itahlela ka ho yona ka makgetlo a supileng ho ya ka seo mohlanka wa Modimo wa nnete a se buileng.+ A fola mme letlalo* la hae la eba jwalo ka la moshanyana+ mme a hlweka.+
15 Ka mora moo, Naamane a tsamaya le masole ohle a hae a ya ho mohlanka wa Modimo wa nnete+ a fihla a re: “Ka nnete ke a tseba hore ha ho na Modimo kae kapa kae ntle le Iseraele.+ Ke kopa o amohele mpho* ena e tswang ho nna mohlanka wa hao.”
16 Elisha a re: “Ke hlapanya ka Jehova Modimo ya phelang eo ke mo sebeletsang* hore nke ke ka e amohela.”+ Naamane a mo phehella empa Elisha a nna a hana.
17 Naamane a re: “Haeba o sa nke mpho ya ka, ke kopa ho fuwa mobu wa Iseraele o ka jarwang ke dimmoulo tse pedi hobane ha ke sa tla hlola ke etsetsa medimo le ha e le efe nyehelo ya setjheso kapa mahlabelo ntle le Jehova.
18 E se eka Jehova a ka ntshwarela hobane ha morena wa Siria a ya tempeleng* ho ya kgumamela* Rimone, o itshwarelletsa ka nna ebe le nna ke a kgumama. E se eka Jehova a ka ntshwarela ha ke kgumama tempeleng ya Rimone.”
19 Elisha a re ho yena: “Tsamaya ka kgotso.” Naamane a tloha ho yena mme ha a se a tsamaile sebaka se itseng,
20 Gehazi+ mohlanka wa Elisha mohlanka wa Modimo wa nnete+ a bua a le mong a re: ‘Morenaka o tlohetse Naamane wa Mosiria+ hore a tsamaye mme ha a amohela mpho eo a neng a mo tliseditse yona. Ke hlapanya ka Jehova Modimo ya phelang hore ke tla matha ka mora hae mme ke nke dintho tse ding ho yena.’
21 Gehazi a lelekisa Naamane. Ha Naamane a bona hore ho na le motho ya tlang ka mora hae, a theoha kariki ya hae mme a re ho yena: “Keng, ho etsahalang?”
22 Gehazi a re: “Ha ho na letho. Mongaka o re ho na le bara ba baprofeta ba babedi ba qetang ho fihla ba tswang dithabeng tsa Efraime. O kopa hore o ba fe silevera ya boima bo ka etsang dikhilokramo tse 34* le diaparo tse pedi.”+
23 Naamane a re: “Ho lokile. Nka silevera ya boima bo ka etsang dikhilokramo tse ka bang 68.”* A phehella Gehazi hore a e nke+ yaba o mo kenyetsa silevera le diaparo tse pedi ka mekotleng e mmedi, a di fa bahlanka ba hae ba babedi hore ba mo jarele tsona.
24 Ha a fihla Ofele,* a di nka ho bona mme a di beha ka tlung yaba o re bahlanka bao ba tsamaye. Ha ba qeta ho tsamaya,
25 a kgutlela ho monga hae. Elisha a re ho yena: “Gehazi o tswa hokae?” Gehazi a re: “Ha ho na moo ke tswang teng.”+
26 Elisha a re ho yena: “O nahana ha ke tsebe hore o ile wa sala monna eo morao mme a theoha kariki ya hae ho ya kopana le wena? Na ke nako ya ho amohela silevera, diaparo, difate tsa mehlwaare, dirapa tsa morara, dinku, dikgomo le basebeletsi ba banna kapa ba basadi?+
27 Lepera la Naamane le tla tshwara wena+ le ditloholo tsa hao ka ho sa feleng.” Ka yona nako eo a tloha ka pela Elisha e le molepera, a le mosweu jwalo ka lehlwa.+
Dintlha tse qetellong ya sehloho
^ Kapa: “pholohe.”
^ Kapa: “a ena le bolwetse ba letlalo.”
^ Ho ka etsahala hore ho buuwa ka Naamane.
^ Ka Seheberu: “ditalenta tse leshome.” Talenta e lekana le dikhilokramo tse 34,2. Sheba Ntlha ya B14.
^ Ka Seheberu: “nama.”
^ Ka Seheberu: “tlhohonolofatso.”
^ Ka Seheberu: “eo ke emeng ka pela hae.”
^ Kapa: “ntlong.”
^ A thetsitse fatshe ka hlooho.
^ Ka Seheberu: “talenta e le nngwe.” Talenta e lekana le dikhilokramo tse 34,2. Sheba Ntlha ya B14.
^ Ka Seheberu: “ditalenta tse pedi.”
^ Sebaka se Samaria, mohlomong e ne e le leralleng kapa sebakeng se sireletsehileng.
