Buka ya Bobedi ya Marena 9:1-37
9 Moprofeta Elisha a bitsa e mong wa bara ba baprofeta a re ho yena: “Tlama diaparo tsa hao thekeng mme ka potlako o nke botlolo ena ya oli o ye Ramothe-gileade.+
2 Ha o fihla moo, o batle Jehu+ mora wa Josafate e leng mora wa Nimshi. O mo tlose ho bana babo o ye le yena kamoreng e ka harehare.
3 O mo tshele hloohong ka oli e ka hara botlolo mme o mo bolelle hore Jehova o re ho yena: ‘Ke o kgethile hore o be morena wa Iseraele.’+ Ka mora moo, o bule monyako mme o balehe.”
4 Mora eo wa moprofeta a ya Ramothe-gileade.
5 Ha a fihla moo, a fumana balaodi ba masole ba dutse ka ntle yaba o re: “Ke na le molaetsa wa hao morenaka.” Jehu a re: “O bua le ofe hara rona?” A re: “Ke bua le wena morenaka.”
6 Jehu a ya le yena ka tlung mme mora eo wa moprofeta a mo tshela ka oli hloohong mme a mo bolella hore Jehova Modimo wa Iseraele o re: “Ke o kgetha hore o be morena ho batho ba Jehova e leng Baiseraele.+
7 O bolaye ba lelapa la Akabe morena wa hao. Ke tla iphetetsa ka lebaka la madi a baprofeta le bahlanka ba bang bohle ba Jehova bao Jezebele a ileng a ba bolaya.+
8 Ke tla bolaya bohle ba lelapa la Akabe, ke bolaye bohle ba batona* ba lelapa la hae ho akarelletsa le ba se nang thuso le ba se nang matla Iseraele.+
9 Hape ke tla etsa hore ba lelapa la Akabe ba tshwane le ba lelapa la Jeroboame+ mora wa Nebate le ba lelapa la Basha+ mora wa Akija.
10 Ha e le Jezebele, o tla jewa ke dintja tshimong e Jezriele+ mme ha ho na motho ya tla mo pata.” Ka mora moo, a bula lemati mme a baleha.+
11 Ha Jehu a kgutlela ho balaodi ba masole ba re ho yena: “Na dintho di hantle? Monna eo wa lehlanya o batlang ho wena?” Jehu a re ho bona: “Le a tseba hore o a hlanya le dintho tseo a di buang ha di utlwahale.”
12 Empa ba re: “Seo ha se nnete, re bolelle hore na o itseng.” Jehu a ba bolella hore na monna eo o itseng le hore Jehova o itse ho yena: “Ke o kgetha hore o be morena wa Iseraele.”+
13 Ha ba utlwa sena ka potlako ba hlobola diaparo tsa bona mme ba mo alla tsona ditepising+ yaba ba letsa lenaka ba re: “Jehu ke morena!”+
14 Jehu+ mora wa Josafate e leng mora wa Nimshi a rerela Jorame bolotsana.
Jorame le masole a Iseraele ba ne ba le Ramothe-gileade+ ho sireletsa Iseraele e le hore Morena Hazaele+ wa Siria a se ke a e hlasela.
15 Ha morao Morena Jorame a kgutlela Jezriele+ ho yo oka maqeba ao Basiria ba mo ntshitseng ona ha a ne a lwana le Hazaele wa Siria.+
Jehu a re: “Haeba le le ka lehlakoreng la ka, le se ke la dumella motho le ha e le ofe hore a tswe motseng ho ya tlaleha taba ena Jezriele.”
16 Jehu a palama kariki ya hae ya ntwa a ya Jezriele ka ha Jorame o ne a le moo a lemetse mme morena Akazia wa Juda o ne a yo mo bona.
17 Ha molebedi a ntse a eme hodima tora Jezriele, a bona banna ba Jehu ba tla ba le bangata. A re: “Ke bona banna ba bangata.” Jorame a re: “Roma e mong wa bapalami ba dipere hore a yo ba botsa hore na ba tla ka kgotso.”
18 Mopalami eo wa pere a fihla ho bona mme a re: “Morena o re ke le botse hore na le tla ka kgotso.” Empa Jehu a re: “Ke hobaneng ha o bua ka kgotso? Ntshale morao.”
Molebedi a re ho morena: “Moromuwa o fihlile ho bona empa ha a eso kgutle.”
19 A romela mopalami wa pere wa bobedi mme ha a fihla ho bona a re: “Morena o re ke le botse hore na le tla ka kgotso.” Empa Jehu a re: “Ke hobaneng ha o bua ka kgotso? Ntshale morao.”
20 Molebedi a re ho morena: “O fihlile ho bona empa ha a eso kgutle. Motho ya kgannang kariki ya ntwa, o kganna jwalo ka Jehu setloholo* sa Nimshi hobane o kganna jwalo ka lehlanya.”
21 Jorame a re: “Lokisang kariki ya ntwa.” Ba lokisa kariki ya hae ya ntwa mme Jorame morena wa Iseraele le Akazia+ morena wa Juda ba tsamaya ka dikariki tsa bona tsa ntwa ho ya kopana le Jehu. Ba kopana le yena tshimong ya Nabothe+ wa Mojezriele.
22 Hang ha Jorame a bona Jehu a re ho yena: “Na o tla ka kgotso Jehu?” Empa Jehu a re: “Ho tla ba le kgotso jwang ho tletse botekatse le boloi ba mme wa hao Jezebele?”+
23 Jorame a tjekisa kariki ya hae e le hore a balehe mme a re ho Akazia: “Re wetse lerabeng.”
24 Jehu a nka seqha a betsa Jorame pakeng tsa mahetla mme motsu wa tswa le pelong ya hae yaba Jorame o wela ka hara kariki ya hae ya ntwa.
25 Jehu a re ho Bidkare e leng molaodi wa masole a hae: “Mo nke o mo lahlele tshimong ya Nabothe wa Mojezriele.+ Hopola hore re ne re palame kariki e ka mora ya ntate wa hae Akabe ha Jehova a mo ahlola.+
26 Jehova o ile a re ho yena, ‘Maobane ke bone madi a Nabothe+ le a bara ba hae.’ Hape Jehova o itse, ‘Ke tla pheteletsa madi a bona+ tshimong ena.’ Mo nke o mo lahlele tshimong ho ya ka seo Jehova a se buileng.”+
27 Ha Morena Akazia+ wa Juda a bona se etsahalang, a baleha ka tsela e yang serapeng sa ntlo. (Ha morao Jehu a mo lelekisa mme a re: “Le yena mo bolayeng!” Ba mo hlasela ka kariking ya hae ya ntwa ha a ya Gure e haufi le Ibleame.+ Empa a nna a baleha ho fihlela Megido mme a shwella teng.
28 Bahlanka ba hae ba mo nka ka kariki ba mo isa Jerusalema mme ba mo pata* lebitleng la hae Motseng wa Davida.+
29 Akazia+ e bile morena wa Juda ha Jorame mora wa Akabe a ena le dilemo tse 11 a busa.)
30 Ha Jehu a fihla Jezriele,+ Jezebele+ a utlwa hore o teng. A tlotsa mahlo a hae ka setlolo se setsho, a lokisa moriri wa hae yaba o hlaha ka fensetere.
31 Ha Jehu a kena ka keiti ya motse, Jezebele a re: “O a hopola hore na ho ile ha etsahalang ka Zimri ya ileng a bolaya morena wa hae?”+
32 Jehu a sheba hodimo fensetereng yaba o re: “Ke mang ya ka lehlakoreng la ka? Ke mang?”+ Hanghang balaodi ba babedi kapa ba bararo ba lekgotla ba mo sheba a le tlase.
33 Jehu a re ho bona: “Lahlelang Jezebele fatshe!” Ba mo lahlela fatshe mme madi a mang a hae a qaphaletsa lebota le dipere yaba di mo hata hodimo.
34 Ka mora moo, Jehu a tsamaya a yo ja le ho nwa. A re: “Ke kopa le nke mosadi eo ya nyonyehang le yo mo pata ka ha ke moradi wa morena.”+
35 Ha ba ne ba yo mo pata ha ba a ka ba fumana letho haese lehata, maoto le matsoho a hae.+
36 Ha ba kgutla mme ba mo bolella, Jehu a re: “Sena se phethahatsa seo Jehova a se buileng+ a sebedisa mohlanka wa hae Elia wa Motishba ha a re, ‘Tshimong ya Jezriele dintja di tla ja nama ya Jezebele.+
37 Setopo sa Jezebele se tla ba jwalo ka manyolo tshimong e Jezriele e le hore batho ba se ke ba bona hore ke Jezebele.’”
Dintlha tse qetellong ya sehloho
^ Ka Seheberu: “mang kapa mang ya ntshetsang metsi lerakong.” Ona ke mokgabopuo wa Seheberu o sebediswang ho nyatsa banna.
^ Ka Seheberu: “mora.”
^ Ka Seheberu: “a patwa jwalo ka baholoholo ba hae.”
