Amose 5:1-27
5 Utlwang lona Baiseraele, ena ke kodiyamalla* eo ke le binelang yona:
2 ‘Morwetsana Iseraele o wele naheng ya habo,Ha a kgone ho phahama.
Motho e mong le e mong o mo lahlile kgerehlwa,Ha ho na ya batlang ho mo phahamisa.’
3 Jehova Mmusi wa Dintho Tsohle o re:
‘Motse o neng o futuha ka bahlabani ba sekete o tla sallwa ke ba lekgolo feela,O neng o futuha ka ba lekgolo wona o sallwe ke ba leshome feela. Ena ke yona ntho e tla hlahela bana ba Iseraele.’+
4 Jehova o itse ho bana ba Iseraele:
‘Ha le ka kgutlela ho nna le tla phela.+
5 Le se ke la ya Bethele+ le re le yo ntshebeletsa,Le se ke la leka ho ya Gilgale+ kapa ho fetela Beersheba+Ka ha Gilgale e tla haptjwa,+Bethele yona ha e sa tla ba teng.*
6 Kgutlelang ho Jehova le tle le phele+E le hore a se ke a ikakgela ka hara ntlo ya Josefa,A tjhesa Bethele yaba ha ho motho ya ka e timang.
7 Le etsa hore toka e babe jwalo ka lengana hore bophelo ba batho bo be bosula,Le e lahlela fatshe hore batho ba e hatakele.+
8 Sebeletsang Modimo ya bopileng sehlopha sa dinaledi sa Kima* le sa Kesile,*+Ya etsang hore lefifi e be meso,Ya etsang hore motshehare o be lefifi jwalo ka bosiu,+Ya bokellang metsi a lewatleE le hore a nosetse lefatshe ka ona.+
Lebitso la hae ke Jehova.
9 O dihela koduwa hodima dinatla,Metse e sireleditsweng o e etsa lesupi.
10 Le hloile baahlodi ba le kgalemelangHape le nyonya batho ba buang nnete.+
11 Le hirisetsa bafutsana masimo*Hape le ba patadisa lekgetho ka dijo.*+
Le ke ke la dula ka hara matlo ano a lona ao le a hahileng ka majwe.+
Le masimo a morara o motle le a lemme empa le ke ke la nwa veine ya wona.+
12 Dibe* tsa lona ke di tseba ka paloLe hore na di kgolo hakae.
Le hlekefetsa batho ba lokileng,Le nka tjotjo,Le hatakela ditokelo tsa bafutsana ha le ahlola.+
13 Ka nako eo, ba bohlale ba tla itholelaHobane e tla be e le nako ya tlokotsi.+
14 Etsang dintho tse nepahetseng eseng tse fosahetseng+E le hore le tle le phele.+
Ha le etsa jwalo, Jehova Modimo wa mabotho o tla ba le lonaJwalo ka ha le bolela.+
15 Hloyang dintho tse fosahetseng le rate tse nepahetseng,+Baahlodi ba metse ya lona ba ke ba ahlole ka toka.+
Mohlomong Jehova Modimo wa mabothoO tla hauhela ditloholo tse setseng tsa Josefa.’+
16 Jehova Modimo wa mabotho, yena Jehova o re:
‘Ho tla utlwahala seboko diterateng tse kgolo,Batho ba tsamaye diterateng ba ntse ba re: “Jowe! Jowe!”
Ba tla bitsa dihwai hore di tlo lla,Ba hire le batho ba llang.
17 Masimong ohle a morara ho tla lluwa+Hobane ke tla feta hara lona, ke Jehova ya tjhong.
18 ‘Ho madimabe ba emetseng letsatsi la Jehova.+
Le ka lebella hore ho etsahaleng letsatsing la Jehova?+
Letsatsi leo e tla ba la lefifi eseng lesedi.+
19 Ho tla ba jwalo ka ha motho a baleha tau ebe o kopana le bere,E re ha a kena ka tlung a itshwareletsa ka lebota, noha e mo lome.
20 Letsatsi la Jehova e tla ba la lefifi eseng lesedi,E be la botsho eseng kganya.
21 Ke hloile mekete ya lona ebile ke a e nyonya+Le monko wa mahlabelo ao le a etsang diphuthehong tsa lona ha ke o thabele.
22 Le ha le ka nketsetsa mahlabelo a setjheso kapa la ntlisetsa dimpho,Nke ke ka di amohela+Le mahlabelo a lona a kopanetsweng a entsweng ka diphoofolo tse nontshitsweng, nke ke ka a amohela.+
23 Tlohelang ho nketsetsa lerata ka dipina tsena tsa lona,Ha ke batle le ho utlwa ha le letsa diharepa.*+
24 Toka e ke e phalle jwalo ka metsi naheng ya lona+Le ho loka ho be jwalo ka molapo o dulang o phalla.
25 Lona Baiseraele, na le ile la nketsetsa mahlabelo kapa la ntlisetsa dimphoKa dilemo tse 40 tseo le di qetileng lefeelleng?+
26 Le tla lokela ho nka Sakuthe le Kaiwane,*E leng ditshwantsho tseo le iketseditseng tsona tseo le di sebedisang ho rapela modimo wa lona wa naledi.
27 Le tla ba batshwaruwa ka nqane ho Damaseka,’+ ke Modimo wa mabotho eo lebitso la hae e leng Jehova ya tjhong.+
Dintlha tse qetellong ya sehloho
^ Kapa: “pina e binwang ka lebaka la ho utlwa bohloko.”
^ Kapa mohlomong: “e tla ba sebaka se tletseng boloi.”
^ Ho ka etsahala hore ebe ke sehlopha sa dinaledi sa Makolobe.
^ Ho ka etsahala hore ebe ke sehlopha sa dinaledi sa Selemela.
^ Kapa: “Le patadisa bafutsana lekgetho la mobu.”
^ Kapa: “Diphoso.”
^ Kapa: “diletsa tse dikgwele.”
^ Ho ka etsahala hore ebe Sakuthe le Kaiwane ke mabitso a polanete e bitswang Saturn eo batho ba neng ba e rapela.
