Baahlodi 1:1-36
1 Ka mora lefu la Joshua,+ Baiseraele* ba botsa Jehova ba re:+ “Ke mang ho rona ya tla ya pele ho Bakanana ho ya ba lwantsha?”
2 Jehova a ba araba a re: “Juda o tla ya.+ Ke fana* ka naha ena letsohong la hae.”
3 Juda a re ho Simeone abuti wa hae: “A re ye sebakeng seo ke se abetsweng,*+ re yo lwantsha Bakanana. Le nna ke tla ya le wena sebakeng seo o se abetsweng.” Simeone a ya le yena.
4 Ha leloko la Juda le fihla, Jehova a nehelana ka Bakanana le Bapereze matsohong a bona+ yaba ba hlola banna ba 10 000 ba Bezeke.
5 Ba ile ba fumana Adoni-bezeke a le Bezeke jwale ba mo lwantshetsa hona moo mme ba hlola Bakanana+ le Bapereze.+
6 Ha Adoni-bezeke a baleha, ba ile ba mo lelekisa mme ba mo tshwara yaba ba mo kgaola menwana e metona ya maoto le ya matsoho.
7 Yaba Adoni-bezeke o re: “Ho na le marena a 70 a kgaotsweng menwana e metona ya maoto le ya matsoho a thonakang dijo tlasa tafole ya ka. Modimo o nkentse feela jwalo ka ha ke entse.” Ka mora moo, ba mo tlisa Jerusalema+ mme a shwella teng.
8 Ho feta moo, banna ba Juda ba lwantsha Jerusalema+ mme ba e hapa, ba lwantsha baahi ba yona ka sabole mme ba tjhesa motse.
9 Ka mora moo, banna ba Juda ba ya ho ya lwantsha Bakanana ba dulang sebakeng se dithaba le ba Negebe le ba Shefela.+
10 Ka hoo, Juda a hlasela Bakanana ba neng ba dula Hebrone (pele ho moo Hebrone e ne e bitswa Kiriathe-arba) mme ba bolaya Sheshai, Akimane le Talmai.+
11 Ho tloha moo, ba lwantsha baahi ba Debire.+ (Pele ho moo Debire e ne e bitswa Kiriathe-sefere.)+
12 Jwale Kalebe+ a re: “Monna ya tla hlasela Kiriathe-sefere mme a e hapa, ke tla mo fa moradi wa ka Aksa hore e be mosadi wa hae.”+
13 Othniele+ mora wa Kenaze,+ ngwanabo Kalebe, a e hapa. Ka hoo, a mo fa moradi wa hae Aksa hore e be mosadi wa hae.
14 Ha ba le tseleng e yang hae, Aksa a phehella monna wa hae hore a kope tshimo ho ntate wa hae. Aksa a theoha hodima tonki.* Kalebe a mo botsa a re: “O batlang?”
15 Aksa a re ho yena: “Ke kopa o ntlhohonolofatse ka ha o mphile karolo ya naha e ka borwa,* mphe le Gulothe-maime.”* Ka hoo, Kalebe a mo fa Gulothe e Hodimo le Gulothe e Tlase.
16 Jwale bana ba Mokene+ ntate wa mosadi wa Moshe,+ ba tla ba tswa motseng wa difate tsa palema*+ le batho ba Juda ho ya lefeelleng la Juda ka borwa ho Arade.+ Ba ya moo yaba ba dula le batho ba moo.+
17 Empa Juda a tsamaya le Simeone abuti wa hae, ba hlasela Bakanana ba ahileng Zefathe mme ba ba bolaya.+ Yaba ba reha motse oo lebitso la Horma.*+
18 Ka mora moo, Juda a hapa Gaza,+ Ashkelone,+ Ekrone+ le dibaka tsa tsona.
19 Jehova o ne a ena le Bajuda mme ba ile ba nka sebaka se dithaba empa ha ba a ka ba kgona ho leleka baahi ba kgohlong* hobane ba ne ba ena le dikariki tsa ntwa tse nang le mahare a tshepe.+
20 Ba ile ba fa Kalebe motse o bitswang Hebrone feela jwalo ka ha Moshe a ne a tshepisitse+ yaba ba leleka bara ba bararo ba Anake.+
21 Empa Babenjamine ha ba a ka ba leleka Bajebuse ba ahileng Jerusalema. Bajebuse ba ntse ba dula le Babenjamine Jerusalema ho fihlela letsatsing lena.+
22 Ka nako eo, ba lelapa la Josefa+ ba hlasela Bethele mme Jehova o ne a ena le bona.+
23 Ba lelapa la Josefa ba romela dihlwela Bethele (pele ho moo motse oo o ne o bitswa Luze)+
24 yaba di bona monna e mong a tswa motseng. Jwale tsa re ho yena: “Ka kopo, re bontshe tsela ya ho kena motseng mme re tla o hauhela.”*
25 Ka hoo, monna eo a di bontsha tsela ya ho kena motseng yaba di hlasela motse oo ka sabole empa tsa tlohela monna eo le lelapa lohle la hae hore ba tsamaye.+
26 Monna eo a ya naheng ya Bahethe yaba o haha motse mme o o reha Luze e leng lebitso la wona ho fihlela letsatsing lena.
27 Manase ha a ka a nka Bethe-sheane le metse e e potolohileng, Tanake+ le metse e e potolohileng, Dore le metse e e potolohileng, Ibleame le metse e e potolohileng ha mmoho le Megido le metse e e potolohileng.+ Bakanana ba ile ba phehella ho dula naheng ena.
28 Ha Baiseraele ba eba matla, ba ile ba etsa hore Bakanana ba etse mosebetsi o boima*+ empa ha ba a ka ba ba leleka kaofela.+
29 Baefraime le bona ha ba a ka ba leleka Bakanana ba neng ba dula Gezere. Bakanana ba ile ba nna ba dula hara bona Gezere.+
30 Bazabulone ha ba a ka ba leleka baahi ba Kiterone le baahi ba Nahalole.+ Bakanana ba ile ba nna ba dula hara bona mme ba etsa mosebetsi o boima.+
31 Ashere ha a ka a leleka baahi ba Ako, ba Sidone,+ ba Alabe, ba Akzibe,+ ba Helba, ba Afike+ le ba Rehobe.+
32 Ka hoo, Baashere ba nna ba dula hara Bakanana ba naheng eo hobane ha ba a ka ba leleka Bakanana.
33 Banefthali ha ba a ka ba leleka baahi ba Bethe-shemeshe le ba Bethe-anathe+ empa ba ile ba dula hara Bakanana ba naheng eo.+ Baahi ba Bethe-shemeshe le ba Bethe-anathe ya eba basebeletsi ba bona ba etsang mosebetsi o boima.
34 Baamore ba ile ba qobella Badane hore ba dule sebakeng se dithaba, ha ba a ka ba ba dumella ho theohela kgohlong.*+
35 Ka hoo, Baamore ba hana ho tloha Thabeng ya Herese, Ajalone+ le Shalbime.+ Empa ha matla* a ba lelapa la Josefa a eketseha,* Baamore ba ile ba qobellwa ho etsa mosebetsi o boima.
36 Naha ya Baamore e ne e tloha moepeng wa Akrabime+ le ho tloha Sela ho ya hodimo.
Dintlha tse qetellong ya sehloho
^ Ka Seheberu: “bara ba Iseraele.”
^ Kapa: “ke fane.”
^ Ka Seheberu: “lothong ya ka.”
^ Kapa mohlomong: “a opa diatla a ntse a palame tonki.”
^ Kapa: “Negebe.”
^ E bolelang “Dikotlolo Tsa Metsi.”
^ E leng Jeriko.
^ E bolelang “Ho Fediswa.”
^ Kapa: “phuleng.”
^ Kapa: “mosebetsi o qobellwang.”
^ Kapa: “phuleng.”
^ Ka Seheberu: “letsoho.”
^ Ka Seheberu: “ha lelapa la Josefa le eba boima.”
