Baahlodi 12:1-15
12 Banna ba Efraime ba bitswa mme ba tshelela Zafone* yaba ba re ho Jafeta: “Ke hobaneng ha o sa ka wa re bitsa ha o ne o yo lwantsha Baamone?+ Re tla o tjheseletsa le ntlo ya hao.”
2 Empa Jafeta a re ho bona: “Nna le setjhaba sa ka re ile ra lwana ntwa e tshabehang le Baamone. Ke ile ka kopa hore le nthuse empa ha le a ka la mpholosa.
3 Ha ke bona hore le ke ke la mpholosa, ke ile ka etsa qeto ya ho beha bophelo ba ka kotsing ka hore ke yo lwantsha Baamone+ mme Jehova a nthusa hore ke ba hlole. Jwale ke hobaneng ha le tlile kajeno ho tla ntwantsha?”
4 Yaba Jafeta o bokella banna bohle ba Gileade+ mme ba lwantsha Baefraime. Banna ba Gileade ba hlola Baefraime, ba ileng ba re: “Le hoja lona Bagileade le dula naheng ya Efraime le ya Manase, le mpa le le batho ba balehileng naheng ya Efraime.”
5 Bagileade ba ile ba hapa madiboho a Jordane+ a ka pela Baefraime mme ha monna wa Moefraime a ne a leka bo baleha o ne a re: “Ke kopa ho tshela,” ebe banna ba Gileade ba a mo botsa ba re: “Na o Moefraime?” Haeba a ne a re: “Tjhe,”
6 ba ne ba re ho yena: “Re kopa o re Shibolethe.” Empa o ne a re: “Sibolethe” hobane o ne a sa kgone ho bitsa lentswe leo hantle. Jwale ba ne ba mo tshwara mme ba mo bolaela madibohong a Jordane. Ka hoo, Baefraime ba 42 000 ba ile ba bolawa ka nako eo.
7 Jafeta ya eba moahlodi wa Iseraele ka dilemo tse tsheletseng. Ka mora moo, Jafeta Mogileade a shwa mme a patelwa motseng wa habo wa Gileade.
8 Ka mora hae, Ibzane ya tswang Bethlehema ya eba moahlodi wa Iseraele.+
9 O ne a ena le bara ba 30 le baradi ba 30. O ile a tsamaisa baradi ba hae hore ba nyalwe ke banna ba tswang lelokong le leng mme o ile a tlisa basadi ba 30 hore ba tlo nyalwa ke bara ba hae. E ile ya eba moahlodi wa Iseraele ka dilemo tse supileng.
10 Yaba Ibzane o a shwa mme o patelwa Bethlehema.
11 Ka mora hae, Elone wa Mozabulone ya eba moahlodi wa Iseraele ka dilemo tse leshome.
12 Jwale Elone wa Mozabulone a shwa mme a patelwa Ajalone naheng ya Zabulone.
13 Ka mora hae, Abdone mora wa Hilele wa Mopirathone ya eba moahlodi wa Iseraele.
14 O ne a ena le bara ba 40 le ditloholo tsa bashanyana tse 30 mme e mong le e mong wa bara ba hae le ditloholo tsa hae o ne a ena le tonki ya hae. E ile ya eba moahlodi wa Iseraele ka dilemo tse robedi.
15 Jwale Abdone mora wa Hilele wa Mopirathone a shwa mme a patelwa Pirathone naheng ya Efraime, thabeng ya Moamaleke.+
Dintlha tse qetellong ya sehloho
^ Kapa mohlomong: “ba tshelela ka leboya.”
