Baahlodi 4:1-24
4 Empa ka mora hore Ehude a shwe, Baiseraele ba ile ba boela ba sitelwa Jehova.+
2 Ka lebaka leo, Jehova a ba rekisetsa Jabine morena wa Kanana,+ ya neng a busa Hazore. Molaodi wa masole e ne e le Sisera mme o ne a dula Haroshethe+ ya baditjhaba.*
3 Baiseraele ba kopa thuso ho Jehova+ hobane Jabine o ne a ena le dikariki tsa ntwa tse 900 tse nang le mahare a tshepe*+ mme o ile a sotla Baiseraele+ ka dilemo tse 20.
4 Jwale moprofeta Debora,+ eo monna wa hae e neng e le Lapidothe, o ne a ahlola Iseraele ka nako eo.
5 Debora o ne a tlwaetse ho dula tlasa sefate sa hae sa palema* se pakeng tsa Rama+ le Bethele,+ sebakeng se dithaba sa Efraime. Baiseraele ba ne ba nyolohela ho yena bakeng sa kahlolo.
6 A re ho bitswe Barake+ mora wa Abinoame ya tswang Kedeshe-nefthali+ mme a re ho yena: “Jehova Modimo wa Iseraele o o file taelo e reng: ‘Eya* Thabeng ya Tabore le banna ba 10 000 ba Nefthali le ba Zabulone.
7 Ke tla tlisa Sisera ho wena e leng molaodi wa masole a Jabine ha mmoho le dikariki tsa hae tsa ntwa le masole a hae nokaneng* ya Kishone+ mme ke tla etsa hore o mo hlole.’”+
8 Yaba Barake o re ho yena: “Haeba o ya le nna, ke tla ya empa haeba o sa ye le nna, nke ke ka ya.”
9 Debora a re: “Ke tla ya le wena. Le ha ho le jwalo, ntwa eo o yang ho yona e ke ke ya o tlisetsa thoriso ka ha Jehova o tla etsa hore mosadi e be yena ya hlolang Sisera.”+ Yaba Debora o tsamaya le Barake ho ya Kedeshe.+
10 Barake a laela hore Zabulone le Nefthali+ ba tle Kedeshe mme banna ba 10 000 ba mo latela. Debora a nyoloha le yena.
11 Hebere eo e neng e le Mokene o ne a ikarotse ho Bakene+ ba bang e leng bana ba Hobabe, ntate wa mosadi wa Moshe+ mme tente ya hae e ne e le haufi le sefate se seholo se Zananime e Kedeshe.
12 Ba tlalehela Sisera hore Barake mora wa Abinoame o nyolohetse Thabeng ya Tabore.+
13 Hanghang Sisera a bokella dikariki tsohle tsa hae tsa ntwa tse 900 tse nang le mahare a tshepe* le masole ohle a neng a ena le yena ho tswa Haroshethe ya baditjhaba ho ya nokaneng ya Kishone.+
14 Jwale Debora a re ho Barake: “Ema hobane lena ke letsatsi leo ka lona Jehova a tla etsa hore o hlole Sisera. Jehova ke yena ya o etellang pele.” Barake a theoha Thabeng ya Tabore a latelwa ke banna ba 10 000.
15 Yaba Jehova o ferekanya+ Sisera le dikariki tsohle tsa hae tsa ntwa le masole ohle ka pela Barake. Qetellong Sisera a theoha kariking ya hae ya ntwa mme a baleha.
16 Barake a lelekisa dikariki tsa ntwa le masole ho ya fihla Haroshethe ya baditjhaba. Ka hoo, masole ohle a Sisera a bolawa ka sabole, ha ho le ileng la sala.+
17 Empa Sisera a balehela tenteng ya Jaele+ mosadi wa Hebere+ wa Mokene hobane ho ne ho ena le kgotso pakeng tsa Jabine+ morena wa Hazore le ba lelapa la Hebere.
18 Jwale Jaele a tswa ho ya kgahlanyetsa Sisera mme a re ho yena: “Kena morenaka, kena ka mona. O se ke wa tshoha.” Ka hoo, a kena ka tenteng ya hae yaba Jaele o mo kwahela ka kobo.
19 Yaba o re ho yena: “Ke kopa o mphe metsinyana hore ke nwe hobane ke nyorilwe.” Ka hoo, a bula lekuka* la lebese mme a mo fa lona hore a nwe.+ Ka mora moo, a mo kwahela hape ka kobo.
20 Sisera a re ho Jaele: “Ema monyako wa tente mme haeba ho ena le motho ya tlang mme a o botsa a re, ‘Na ho na le motho moo?’ O re, ‘Tjhe!’”
21 Empa Jaele mosadi wa Hebere a nka tshepe ya tente le hamore. Ha Sisera a ntse a robetse mme a kgathetse, a mo nanyetsa, a kokotella tshepe eo ditlhafunelong* tsa hae ho ya fihla fatshe yaba o a shwa.+
22 Barake a ya moo a ntse a batlana le Sisera. Jaele a tswa ho mo kgahlanyetsa mme a re: “Tloo mme ke tla o bontsha motho eo o mo batlang.” Ka hoo, a kena le yena ka tenteng yaba o fumana Sisera a shwele, tshepe e kene ditlhafunelong* tsa hae.
23 Letsatsing leo, Modimo a etsa hore Baiseraele ba hlole Jabine morena wa Kanana.+
24 Baiseraele ba nna ba lwantsha Jabine morena wa Kanana,+ ho fihlela ba mo bolaile.+
Dintlha tse qetellong ya sehloho
^ Kapa: “Haroshethe-ha-goiime.”
^ Ka Seheberu: “dikariki tsa tshepe.”
^ Ka Seheberu: “sefate sa palema sa Debora.”
^ Kapa: “Hlophisa banna ba hao.”
^ Ka Seheberu: “dikariki tsa tshepe.”
^ Mokotla wa letlalo o tshelang metsi.
^ “Ditlhafunelo” ke karolo ya hlooho e pakeng tsa phatla le tsebe.
^ “Ditlhafunelo” ke karolo ya hlooho e pakeng tsa phatla le tsebe.
