Baahlodi 8:1-35
8 Jwale banna ba Efraime ba re ho Gideone: “Ke hobaneng ha o re entse tjee? Ke hobaneng ha o sa re bitsa ha o yo lwantsha Bamidiane?”+ Yaba ba phehisana kgang le yena.+
2 Empa a re ho bona: “Seo ke se entseng ha se letho ha se bapiswa le seo le se entseng. Na morara o thonakilweng ke Efraime+ ha o molemo ho feta morara o kotutsweng ke Abi-ezere?+
3 Modimo o entse hore le hlole dikgosana tsa Midiane e leng Orebe le Zebe.+ Nna ha ke a etsa letho ha ke bapiswa le lona.” Ha a qeta ho bua mantswe ana, ba tlohela ho halefa.
4 Yaba Gideone le banna ba 300 ba tshela noka ya Jordane mme ba nna ba lelekisa dira tsa bona le hoja ba ne ba kgathetse.
5 Jwale a re ho banna ba Sukothe: “Ke kopa hore le fe banna bana ba tsamayang le nna bohobe ka ha ba kgathetse mme re ntse re lelekisa marena a Midiane e leng Zeba le Zalmuna.”
6 Empa dikgosana tsa Sukothe tsa re: “Ke hobaneng ha re lokela ho fa masole bohobe? Na o se o hlotse Zeba le Zalmuna?”
7 Yaba Gideone o re: “Ka ha le buile mantswe ana, ke tla le shapa ka meutlwa le dihlahla tse hlabang tsa lefeelleng+ ha Jehova a nthusa hore ke hlole Zeba le Zalmuna.”
8 Ha a tloha moo, a nyolohela Penuele mme a kopela masole a hae bohobe empa banna ba Penuele ba mo araba ka tsela e tshwanang le ya banna ba Sukothe.
9 Ka hoo, a boela a re ho banna ba Penuele: “Ha ke kgutla ke hlotse, ke tlo diha tora ena.”+
10 Jwale Zeba le Zalmuna ba ne ba le Karkore le masole a bona e leng banna ba ka bang 15 000. E ne e le banna bohle ba setseng ho tswa lebothong la sesole la batho ba Botjhabela+ ka ha banna ba 120 000 ba neng ba nkile disabole ba ne ba shwele.
11 Gideone a nna a nyoloha ka tsela ya ba dulang ditenteng ka botjhabela ho Noba le Jogbeha+ mme a ba hlasela ba sa lebella.
12 Ha marena a mabedi a Midiane e leng Zeba le Zalmuna a baleha, Gideone a a lelekisa mme a a tshwara. Batho bohle ba dulang ditenteng ba tshoha.
13 Jwale Gideone mora wa Joashe a kgutla ntweng ka tsela e pakeng tsa dithaba e nyolohelang Herese.
14 Ha a le tseleng a tshwara mohlankana ya tswang Sukothe yaba o mo hloma dipotso. Ka hoo, mohlankana eo a mo ngolla mabitso a dikgosana le banna ba baholo ba Sukothe, e ne e le banna ba 77.
15 Yaba o ya ho banna ba Sukothe mme o re: “Zeba le Zalmuna bao le neng le ntshoma ka bona ke bana, le re, ‘Na o se o hlotse Zeba le Zalmuna hoo re lokelang ho fa banna ba hao ba kgathetseng bohobe?’”+
16 Jwale a nka banna ba baholo ba motse wa Sukothe a ba shapa ka meutlwa le dihlahla tse hlabang tsa lefeelleng, a ba kenya tseleng.+
17 A diha tora ya Penuele+ mme a bolaya banna ba motse.
18 A re ho Zeba le Zalmuna: “Le bolaile banna ba mofuta ofe Tabore?” Yaba ba re: “Ba ne ba tshwana le wena, e mong le e mong a tshwana le mora wa morena.”
19 Yaba o re: “Ke bana beso, bara ba mme. Ke hlapanya ka Jehova Modimo ya phelang hore haeba le ne le sa ba bolaya, ke ne nke ke ka le bolaya.”
20 Jwale a re ho Jethere mora wa hae wa letsibolo: “Ema, o ba bolaye.” Empa Jethere a se ke a ntsha sabole ya hae. O ne a tshohile hobane o ne a sa le monyenyane.
21 Yaba Zeba le Zalmuna ba re: “Ema mme o re bolaye ka ha monna o bonahala ka matla a hae.” Ka hoo, Gideone a ema mme a bolaya Zeba le Zalmuna+ yaba o nka mekgabiso e bopehileng jwalo ka kgwedi e neng e le melaleng ya dikamele tsa bona.
22 Ha morao banna ba Iseraele ba re ho Gideone: “Re buse, wena le mora wa hao ha mmoho le setloholo sa hao ka ha o re pholositse ho Bamidiane.”+
23 Empa Gideone a re ho bona: “Nke ke ka le busa, le mora wa ka a ke ke a le busa. Jehova ke yena ya tla le busa.”+
24 Gideone a tswela pele ho re: “Ereng ke le kope ntho e le nngwe feela: E mong le e mong wa lona a mphe lesale la nko ho tswa dinthong tseo a di hapileng.” (Ka ha setjhaba seo ba se hlotseng se ne se ena le masale a kgauta a nko hobane e ne e le Baishmaele.)+
25 Jwale ba re: “Re tla fana ka ona.” Yaba ba ala seaparo mme e mong le e mong o lahlela lesale la nko ho sona.
26 Masale a nko a kgauta ao a neng a a kopile a ne a le boima bo ka etsang dikhilokramo tse 19,* ntle ho mekgabiso e bopehileng jwalo ka kgwedi, masale, diaparo tsa boya bo pherese tse neng di aparwa ke marena a Midiane le difaha tse neng di le melaleng ya dikamele.+
27 Gideone a etsa efoda*+ ka kgauta eo, a e beha motseng wa hae wa Ofra+ yaba Baiseraele bohle ba e rapela*+ moo mme e ile ya ba leraba ho Gideone le ho ba lelapa la hae.+
28 Ka hoo, Baiseraele ba hlola Bamidiane+ mme ha ba a ka ba hlola ba tshwenya Baiseraele* hape. Ho ile ha eba le kgotso naheng ka dilemo tse 40 mehleng eo ya Gideone.+
29 Yaba Jerubaale+ mora wa Joashe o kgutlela ha hae mme o dula teng.
30 Gideone a ba le bara ba 70* ka ha o ne a ena le basadi ba bangata.
31 Serethe* sa hae se neng se dula Shikeme le sona sa mo tswalla mora mme a mo reha Abimeleke.+
32 Gideone mora wa Joashe a shwa a tsofetse haholo mme a patwa lebitleng la ntate wa hae Joashe le neng le le Ofra ya Baabi-ezere.+
33 Hang ha Gideone a qeta ho shwa, Baiseraele ba boela ba rapela* medimo ya Baale+ mme ba kgetha Baale-berithe hore e be modimo wa bona.+
34 Baiseraele ha ba a ka ba hopola Jehova Modimo wa bona,+ ya neng a ba pholositse ho dira tsohle tsa bona tse neng di ba potolohile.+
35 Ho sa tsotellehe melemo yohle eo Jerubaale e leng Gideone a ileng a e etsetsa Baiseraele, ha ba a ka ba tshepahalla* ba lelapa la hae.+
Dintlha tse qetellong ya sehloho
^ Ka Seheberu: “dishekele tsa kgauta tse 1 700.” Shekele e lekana le dikramo tse 11,4. Sheba Ntlha ya B14.
^ Ho ka etsahala hore ebe ho buuwa ka seaparo sa baprista se kang foreskoto e nang le karolo e ka pele le e ka morao.
^ Ka Seheberu: “ha ba a ka ba hlola ba phahamisetsa Baiseraele hlooho.”
^ Ka Seheberu: “a ba le bara ba 70 ba tswileng thekeng la hae.”
