Ho Baefese 3:1-21
3 Nna Pauluse, ke kentswe teronkong+ ka lebaka la ho ba morutuwa wa Kreste Jesu hape ke kentswe teronkong molemong wa lona batho ba ditjhaba.
2 Ka nnete le utlwile hore ke fumane boikarabelo+ ba ho le thusa e le hore mosa* wa Modimo o ka le tswela molemo.
3 Modimo o ile a ntshenolela lekunutu le halalelang. Ke sa tswa le ngolla hakgutshwanyane ka lekunutu leo.
4 Ha le bala ditaba tsena, le tla bona hore ke utlwisisa lekunutu le halalelang+ la Kreste.
5 Modimo ha a ka a tsebisa batho ba meloko e fetileng lekunutu leo ka tsela e hlakileng. Hona jwale o le senoletse baapostola ba halalelang le baprofeta ka tsela e hlakileng a sebedisa moya o halalelang.+
6 Lekunutu leo ke lena: Ka mora hore batho ba ditjhaba ba amohele ditaba tse monate mme e be barutuwa ba Kreste Jesu, e tla ba majalefammoho le rona. Re tla ba ditho tsa sehlopha se le seng* le bona+ hape ba tla fumana dintho tse tshwanang le tseo Modimo a re tshepisitseng tsona.
7 Ke ile ka le thusa ho utlwisisa* lekunutu leo ka lebaka la mpho ya mosa eo Modimo a mphileng yona e le ho bontsha hore o matla.+
8 Nna ya tlase ka ho fetisisa hara badumedi* bohle,+ ke ile ka bontshwa mosa+ oo e le hore ke bolelle batho ba ditjhaba ditaba tse monate tse mabapi le maruo a Kreste a ke keng a bapiswa le letho.
9 Hape ke ile ka bontshwa mosa e le hore ke bontshe batho tsela eo lekunutu le halalelang+ le sebetsang ka yona. Lekunutu leo le ne le patilwe ka nako e telele ke Modimo ya bopileng dintho tsohle.
10 Dintho tsena di etsahetse e le hore hona jwale Modimo a sebedise phutheho+ ho bontsha mebuso le balaodi ba lehodimong bohlale ba hae bo bonahetseng ka ditsela tse ngata.+
11 Taba ena e dumellana le morero wa hae o dulang o le teng ka ho sa feleng oo a ileng a o etsa, o amanang le Kreste+ Jesu Morena wa rona.
12 Ke ka Kreste re nang le bolokolohi ba ho bua le ho atamela Modimo+ re mo tshepile ka lebaka la tumelo eo re nang le yona ho Kreste.
13 Ka hoo, ke kopa hore le se ke la nyahama ka lebaka la mathata a ntlhahetseng hobane ke le thusa empa le ithorise ka ona.+
14 Ka lebaka leo ke kgumamela Ntate,
15 eo lelapa le leng le le leng lehodimong le lefatsheng le leng teng ka lebaka la hae.
16 Ke rapella hore Modimo ya hlomphehang haholo a le matlafatse*+ a sebedisa matla a moya wa hae.
17 Hape ke rapella hore Kreste a dule ka dipelong tsa lona le hore le dule le ena le lerato ka dipelong tsa lona+ ka lebaka la tumelo eo le nang le yona. E se eka le ka ema le tiile+ hodima motheo wa tumelo jwalo ka sefate se metseng ka metso+
18 e le hore lona ha mmoho le badumedi* bohle le ka kgona ho utlwisisa hantle bophara, bolelele, bophahamo le botebo ba dintho tsa Modimo
19 le hore le tsebe lerato la Kreste+ le leng bohlokwa ho feta tsebo e le hore Modimo a le fe ntho e nngwe le e nngwe e molemo.
20 Modimo o kgona ho sebedisa matla a hae ao a re fileng ona+ ho etsa dintho tse fetang hole tsohle tseo re ka di kopang kapa tseo re ka di nahanang.+
21 E se eka a ka roriswa melokong yohle ka phutheho le ka Kreste Jesu ka ho sa feleng. Amen.
Dintlha tse qetellong ya sehloho
^ Kapa: “mmele o le mong.”
^ Ka Segerike: “Ke ile ka ba mosebeletsi wa.”
^ Ka Segerike: “bahalaledi.”
^ Kapa: “a matlafatse motho eo le leng yena ka hare.”
^ Ka Segerike: “bahalaledi.”
