Lengolo le Yang ho Bafilipi 2:1-30
2 Ka ha le bonngweng le Kreste, etsang sohle seo le ka se kgonang hore le kgothatsane, le tshedisane ka lerato, le tsotelle ba bang, le ba rate mme le ba utlwele bohloko.
2 Haeba le ka etsa jwalo, ke tla thaba haholo. Le be le kgotso hara lona, le ratane mme le etse dintho ha mmoho le be le nahane ka tsela e tshwanang.+
3 Le se ke la etsa ntho le ha e le efe hobane le rata diqabang+ kapa le ikgohomosa.+ Ho ena le hoo, le ikokobetse mme le nke ba bang e le ba bohlokwa ho le feta.+
4 Le se ke la ameha feela ka dintho tse le tswelang molemo+ empa le amehe le ka dintho tse tla tswela batho ba bang molemo.+
5 Dulang le nahana ka tsela e tshwanang le eo Kreste Jesu a neng a nahana ka yona.+
6 Le hoja a ne a tshwana le Modimo,+ le hanyane feela ha a ka a nahana ka hore a leke ho lekana le Modimo.+
7 O ile a tlohela dintho tsohle tseo a neng a ena le tsona, a ba jwalo ka lekgoba+ mme ya eba motho.*+
8 Ho feta moo, ha a tla e le motho,* o ile a ikokobetsa mme a mamela ho fihlela a shwa,+ a shwela palong.*+
9 Ka lebaka leo, Modimo o ile a mo fa boemo bo phahameng+ mme a mo fa lebitso le fetang mabitso a mang ohle+
10 e le hore bohle ba lehodimong, ba lefatsheng le ba ka tlasa lefatshe* ba tle ba kgumame ka lebitso la Jesu+
11 le hore bohle ba tsebe hore Jesu Kreste ke Morena+ e leng se tla tlotlisa Modimo Ntate.
12 Bana beso bao ke ba ratang, le dula le mamela eseng feela ha ke e na le lona empa haholoholo ha ke le siyo. E mong le e mong wa lona a nne a sebetse ka thata hore a tle a pholohe, a etsa jwalo ka tlhompho le ka tshabo.
13 Modimo ke yena ya le matlafatsang. O etsa hore le be le tabatabelo ebile o le fa matla a hore le etse dintho tse mo kgahlisang.
14 Le nne le etse dintho tsohle le sa korotle+ ebile le sa ngangisane+
15 e le hore le ka ba bana ba Modimo+ ba sa tshwauweng phoso le ba se nang molato hara batho ba kgopo ba mehleng ena+ ba etsang dintho tse mpe, bao hara bona le kganyang jwalo ka masedi lefatsheng.+
16 Le tshware lentswe la bophelo ka thata.+ Ha le etsa jwalo, ke tla ba le lebaka la ho thaba ka letsatsi la Kreste, ke tseba hore boiteko ba ka le mosebetsi wa ka o boima e ne e se wa lefeela.
17 Le ha nka tshollwa jwalo ka nyehelo ya seno,+ ke kenya letsoho sehlabelong seo le se etsang+ le tshebeletsong eo le e etsetsang Modimo ka botshepehi. Ka hoo, ke thabile ebile ke thaba le lona kaofela.
18 Jwale le lona le thabe le nna.
19 Ke tshepa hore Morena Jesu o tla ntumella hore ke romele Timothea+ ho lona haufinyane hore ke tle ke kgothale ha ke utlwa ka lona.
20 Ha ke na motho e mong ya tshwanang le yena ya ka le hlokomelang ka dintho tseo le di hlokang.
21 Ba bang kaofela ba nahana ka dintho tse ka tswelang bona molemo feela eseng tseo Jesu Kreste a di batlang.
22 Empa le a tseba hore yena o bontshitse hore ha a jwalo. Jwalo ka ha ngwana+ a sebetsa le ntate wa hae, o ile a sebetsa le nna ka thata ho bolela ditaba tse monate dibakeng tse ngata.
23 Ka lebaka leo, ke yena eo ke nahanneng ho mo romela ho lona hang feela ha ke bona hore na ho tla etsahalang ka nna.
24 Ke kgodisehile hore Morena o tla ntumella hore ke tle ho lona haufinyane.+
25 Empa hona jwale ke bona ho hlokahala hore ke le romelle Epafroditase eo e leng ngwaneso, mosebetsimmoho le nna, lesole la Kreste jwalo ka nna, moromuwa wa lona le mohlanka wa ka ya nthusang.+
26 O le hopotse haholo ebile o nyahame hobane le utlwile hore o ile a kula.
27 Ke nnete hore o ile a kulela lefu empa Modimo o ile a mo hauhela. Ha e le hantle, ha a ka a hauhela yena feela empa le nna o nkgauhetse e le hore ke se ke ka utlwa bohloko haholo.
28 Ka hoo, ke mo romela ho lona ka potlako e le hore le ka boela la thaba ha le mo bona le hore ke se ke ka hlola ke tshwenyeha haholo ka lona.
29 Mo amoheleng ka thabo jwalo ka ha le tlwaetse ho amohela balatedi ba Morena mme le nne le bontshe banna ba tshwanang le yena hore le a ba rata+
30 hobane o batlile a shwa ka lebaka la mosebetsi wa Kreste,* a beha bophelo ba hae kotsing ka lebaka la ka hobane le ne le sa kgone ho tla mona ho tla nthusa.+
Dintlha tse qetellong ya sehloho
^ Kapa: “a tshwana le batho.”
^ Ka Segerike: “ha a iphumana a tshwana le motho.”
^ E leng bafu ba tlang ho tsoswa.
^ Kapa mohlomong: “mosebetsi wa Morena.”
