Lengolo le Yang ho Bafilipi 4:1-23
4 Bana beso bao ke ba ratang le bao ke ba hopotseng, le a nthabisa ebile ho nna le jwalo ka korone.+ Baratuwa, ke le kgothaletsa hore le nne le tshepahalle+ Morena.
2 Ke kgothaletsa Evodia le Sintike e leng balatedi ba Morena hore ba rarolle diqabang tsa bona.*+
3 Le wena mosebetsimmoho le nna ya tshepahalang, ke kopa hore o nne o thuse basadi bana. Bona, Clemente le ba bang bohle ba ne ba sebetsa le nna ka thata ho bolela ditaba tse monate ebile mabitso a bona a bukeng ya bophelo.+
4 Dulang le thabile ka lebaka la Morena. Ke boetse ke re, thabang.+
5 Batho bohle ba ke ba bone hore ha le batho ba tsitlellang maikutlong a lona.+ Morena o haufi le rona.
6 Le se ke la tshwenyeha ka letho.+ Ho ena le hoo, le rapele Modimo ka mehla, le mo kope ka tiyo* hore a le tataise dinthong tsohle mme le mo lebohe ka mehla.+
7 Ha le etsa jwalo, Modimo o tla lebela dipelo tsa lona+ le menahano ya lona* ka ho le fa kgotso+ eo batho ba ke keng ba e utlwisisa, a sebedisa Kreste Jesu.
8 Qetellong bana beso, le dule le nahana ka dintho tsa nnete, tsa bohlokwa haholo, tse lokileng, tse hlwekileng, tse ratehang, tseo ho buuwang hantle ka tsona, tse molemo le tse tshwanelwang ke thoriso.+
9 Le etse dintho tseo le ileng la ithuta tsona, la di amohela, la di utlwa la ba la di bona ho nna+ mme Modimo wa kgotso o tla ba le lona.
10 Ke thabile haholo ebile ke leboha Morena hore ebe le ile la boela la bontsha hore le a ntsotella.+ Le hoja le ne le tshwenyehile ka nna, ha le a ka la fumana monyetla wa ho mpontsha seo.
11 Ha ke bue sena hobane ho na le seo ke se hlokang. Ke ithutile ho kgotsofala ho sa tsotellehe hore na maemo a ka ke afe.+
12 Ke a tseba hore na ho jwang ho ba le dintho tse seng kae+ le ho ba le dintho tse ngata. Ke ithutile seo batho ba bangata ba sa se tsebeng: Hore na ho kgora le ho lapa ho jwang le hore na ho ba le dintho tse ngata le ho hloka ho jwang.
13 Ke na le matla a ho etsa dintho tsohle ka lebaka la ya mphang matla.+
14 Le ha ho le jwalo, le entse hantle ka ho nthusa ha ke ne ke le mahlomoleng.
15 Ha e le hantle, lona Bafilipi, le a tseba hore ha ke ne ke tloha Macedonia, ha le ne le utlwa ditaba tse monate ka lekgetlo la pele, ha ho na phutheho e nngwe e ileng ya nthusa ntle le ya lona.+
16 Ha ke ne ke le Thesalonika, le ile la nthomella dintho tseo ke di hlokang eseng hanngwe feela empa habedi.
17 Ha se hore ke batla le mphe dimpho. Ke mpa feela ke batla hore le fumane moputso o tliswang ke ho fana.
18 Le ha ho le jwalo, ke na le dintho tsohle tseo ke di hlokang ebile di ngata haholo. Ke kgotsofaletse dintho tseo le nthomeletseng tsona ka Epafroditase.+ Mpho ya lona e tshwana le monko o nkgang ha monate+ ebile ke sehlabelo se thabisang Modimo.
19 Modimo wa ka ya nang le dintho tse ngata o tla le fa dintho tsohle+ tseo le di hlokang a sebedisa Kreste Jesu.
20 Modimo wa rona le Ntate wa rona o tshwanelwa ke ho fuwa kganya ka ho sa feleng. Amen.
21 Ntumedisetseng bahalaledi bohle e leng barutuwa ba Kreste Jesu. Bana beso ba nang le nna ba a le dumedisa.
22 Bahalaledi bohle ba a le dumedisa, haholoholo ba ntlo ya boreneng ya Sesare.+
23 Mosa wa Morena Jesu Kreste o ke o be le lona ka lebaka la moya o motle oo le o bontshang.
Dintlha tse qetellong ya sehloho
^ Ka Segerike: “ba be le monahano o tshwanang.”
^ Kapa: “le etse thapedi.”
^ Kapa: “dikelello tsa lona.”
