Ho Bagalata 3:1-29
-
Ba latelang Molao ba bapiswa le ba nang le tumelo (1-14)
-
Ya lokileng o tla phela hobane a ena le tumelo (11)
-
-
Tshepiso e filweng Abrahama ha e tswe Molaong (15-18)
-
Kreste ke ngwana wa Abrahama (16)
-
-
Qalo ya Molao le bohlokwa ba wona (19-25)
-
Le bana ba Modimo ka lebaka la tumelo (26-29)
-
Bana ba Abrahama ke balatedi ba Kreste (29)
-
3 Lona Bagalata ba se nang kelello, ke mang ya le susumeditseng hore le etse dintho tsee tse mpe+ le hoja le ile la hlalosetswa hantle lebaka leo Jesu Kreste a ileng a kgokgothelwa palong ka lona?+
2 Ke batla ho le botsa potso e le nngwe feela: Na le ile la fuwa moya o halalelang hobane le mamela molao kapa hobane le dumela dintho tseo le di utlwileng?+
3 Na le nka hantle? Qalong le ne le tshepile moya o halalelang empa na jwale qetellong le se le mamela dithuto tsa batho?+
4 Na le ile la mamella mathata a mangata hakaale mahala? Ha ke kgolwe.
5 Ka lebaka leo, na motho ya le fang moya o halalelang le ya etsang mesebetsi e matla+ hara lona o etsa jwalo hobane le mamela molao kapa hobane le dumela dinthong tseo le di utlwileng?
6 Abrahama le yena o ile “a bontsha tumelo ho Jehova* yaba o nkwa e le motho ya lokileng.”+
7 Le a tseba hore batho ba nang le tumelo ke bona bana ba Abrahama.+
8 Mehleng ya kgale, Modimo o ile a bua ka lentsweng la hae a re o ne a tla re batho ba ditjhaba tsohle ba lokile hobane ba ena le tumelo. Ka hoo, o ile a bolella Abrahama ditaba tse monate esale pele a re: “Ditjhaba tsohle di tla hlohonolofatswa ka lebaka la hao.”+
9 Batho ba nang le tumelo ba hlohonolofatswa ha mmoho le Abrahama ya neng a ena le tumelo.+
10 Batho bohle ba tshepileng molao ba madimabe hobane Mangolo a re: “Batho bohle ba sa mameleng le ba sa etseng dintho tsohle tse ngotsweng ka moqolong wa Molao ba madimabe.”+
11 Ho hlakile hore Modimo ha a nke motho a lokile hobane feela a mamela molao+ empa o mo nka a lokile hobane Mangolo a re, “ya lokileng o tla phela hobane a ena le tumelo.”+
12 Molao ha o a itshetleha ka tumelo. Empa “motho ya etsang dintho tse nepahetseng ho ya ka Molao o tla phela.”+
13 Kreste o re lopolotse+ thohakong ya Molao ka hore ho rohakwe yena eseng rona hobane Mangolo a re: “Ho rohakwe motho e mong le e mong ya fanyehwang palong.”+
14 Sena se ile sa etsahala e le hore tlhohonolofatso eo Modimo a neng a e tshepisitse Abrahama e ka tlela ditjhaba tsohle ka Kreste Jesu+ le hore re fumane moya o halalelang+ ka lebaka la tumelo ya rona.
15 Bana beso, ke etsa mohlala oo batho ba ka o utlwisisang: Ha ho entswe selekane, ha ho na motho ya ka se fetolang kapa a se eketsa.
16 Ditshepiso tseo di ile tsa etsetswa Abrahama le ngwana* wa hae.+ Mangolo a re: “Le ngwana* wa hao,” se bolelang motho a le mong e leng Kreste empa ha ho na moo a reng “le bana* ba hao” jwalo ka ha eka ho buuwa ka batho ba bangata.+
17 Ke boetse ke re: Molao o bileng teng ka mora dilemo tse 430+ ha o hlakole selekane seo Modimo a se entseng kgale ebile ha o fedise le tshepiso eo a e entseng.
18 Haeba Modimo a fa batho lefa hobane ba mamela molao, o tla be a sa fane ka lona hobane a tshepisitse. Le ha ho le jwalo, Modimo o ile a ba mosa yaba o fa Abrahama lefa leo a neng a mo tshepisitse lona.+
19 Jwale ke hobaneng ha Molao o bile teng? O bile teng ho senola dibe tsa batho+ ho fihlela leloko* leo le neng le filwe tshepiso eo le fihla.+ Modimo o ile a fa mangeloi+ molao mme ona a o fetisetsa ho batho a sebedisa mmuelli.+
20 Ka ha Modimo o entse tshepiso a le mong, ha ho hlokahale mmuelli.
21 Na see se bolela hore Molao ha o dumellane le ditshepiso tsa Modimo? Ha ho jwalo hobane haeba batho ba ne ba filwe molao o kgonang ho ba phedisa, ho ne ho tla thwe ba lokile hobane ba ne ba mamela molao.
22 Empa Mangolo a bontsha hore batho ba laolwa ke sebe e le hore batho ba nang le tumelo ba ka fuwa ditshepiso tse fumanwang ke batho ba bontshang tumelo ho Jesu Kreste.
23 Le ha ho le jwalo, pele re dumela ho Kreste re ne re laolwa ke molao, re emetse seo Modimo a tla se senola.+
24 Ka lebaka leo, Molao o ile wa re tataisetsa* ho Kreste+ e le hore ho ka thwe re lokile ka lebaka la tumelo.+
25 Empa ka ha re na le tumelo ho Kreste,+ ha re sa hloka molao hore o re tataise.*+
26 Kaofela ha lona le bana ba Modimo+ hobane le dumela ho Kreste Jesu.+
27 Lona bohle ba ileng ba kolobetswa mme la ba bonngweng le Kreste, le se le ena le makgabane a tshwanang le a hae.+
28 Kaofela ha lona le bonngweng le Kreste Jesu.+ Ka hoo, ha ho sa na Mojuda kapa Mogerike,+ lekgoba kapa motho ya lokolohileng+ ebile ha ho sa na motho e motona kapa e motshehadi.+
29 Hape, haeba le le balatedi ba Kreste, le bana* ba Abrahama.+
Dintlha tse qetellong ya sehloho
^ Sheba Ntlha ya A5.
^ Ka Segerike: “peo.”
^ Ka Segerike: “peo.”
^ Ka Segerike: “peo.”
^ Ka Segerike: “peo.”
^ Kapa: “ruta ka.”
^ Kapa: “rute.”
^ Ka Segerike: “peo.”
