Ho Bagalata 4:1-31
4 Ke re: Ha feela mojalefa e ntse e le ngwana, ha ho na moo a fapaneng teng le lekgoba le hoja ntho e nngwe le e nngwe e ikarabella ho yena.
2 Empa ho na le batho ba hlokomelang yena le ntlo ya hae ho fihlela letsatsi leo ntate wa hae a mo behetseng lona le fihla.
3 Ka tsela e tshwanang, le rona ha re ne re le bana re ne re nahana ebile re etsa dintho jwalo ka batho ba lefatshe lena.+
4 Empa ha nako e behilweng e fihla, Modimo o ile a romela Mora wa hae ya ileng a tswalwa ke mosadi+ le ya neng a mamela molao+
5 hore a tlo lokolla batho ba neng ba mamela molao+ e le hore Modimo a ka re nka re be bana ba hae.+
6 Ka ha re bana ba hae, Modimo o kentse moya o halalelang+ oo Mora wa hae a nang le wona ka dipelong tsa rona+ mme o re susumeletsa hore re hweletse re re: “Abba,* Ntate!”+
7 Ka hoo, ha le sa le makgoba empa le bana ba Modimo mme haeba le bana ba Modimo, le boetse le majalefa.+
8 Ha le ne le sa tsebe Modimo, le ne le le makgoba a medimo ya bohata.
9 Jwale ke hobaneng ha le kgutlela dinthong tse se nang thuso+ tsa lefatshe lee ebile le batla ho ba makgoba a tsona hape+ le hoja le se le tseba Modimo mme le yena a le tseba?
10 Le nka matsatsi, dikgwedi,+ dinako tsa selemo le dilemo tse itseng di le bohlokwa mme le a di keteka.
11 Ke le utlwela bohloko hobane ke bona eka ke sentse matla a ka ke le thusa.
12 Bana beso, ke kopa hore le tshwane le nna hobane le nna nkile ka ba jwalo ka lona.+ Ha le a nketsa letho le lebe.
13 Empa le a tseba hore ho kula ho ile ha mpha monyetla wa hore ke qale ho le bolella ditaba tse monate.
14 Le hoja ho kula ha ka ho ne ho le imetsa, ha le a ka la ntshwara hampe kapa la ntlhoya* empa le ile la ntlhokomela jwalo ka lengeloi la Modimo, jwalo ka Kreste Jesu.
15 Ke hobaneng ha le se le sa thaba jwalo ka pele? Ke kgodisehile hore ha ho ne ho kgoneha, le ka be le ile la ntsha mahlo a lona la mpha ona.+
16 Na jwale le ntlhoile hobane ke le bolella nnete?
17 Banna bao ha ba etse dintho tsena ka morero o motle empa ba leka ka hohle ho le arohanya le nna e le hore le ba latele.
18 Le ha ho le jwalo, ha se ntho e mpe hore motho a batle hore le mo latele ha feela a etsa seo ka morero o motle ebile e se ha ke le teng feela.
19 Bana ba ka ba banyenyane,+ le nkutlwisa bohloko bo tshwanang le boo mosadi a bo utlwang ha a beleha. Ke tla nne ke utlwe bohloko bona ho fihlela le eba le makgabane a tshwanang le a Kreste.
20 Ke ne nka rata ho ba le lona hona jwale mme ke bua le lona ka tsela e fapaneng hobane ha ke tsebe hore na ke etseng ka lona.
21 Mpolelleng lona ba batlang ho mamela molao. Na le a tseba hore na Molao o reng?
22 Ka mohlala, Mangolo a re Abrahama o ne a ena le bara ba babedi, e mong o bile le yena le mosadi wa lekgoba*+ mme e mong a ba le yena le mosadi eo eseng lekgoba.+
23 Empa mora eo a bileng le yena le mosadi eo wa lekgoba, o ile a tswalwa jwalo ka bana ba bang+ mme mora eo a bileng le yena le mosadi eo eseng lekgoba, o ne a tshepisitswe hore o tla ba le yena.+
24 Dintho tsena ke papiso. Basadi bao ba babedi ba tshwantshetsa dilekane tse pedi, se seng se entswe Thabeng ya Sinai+ mme se tswala bana hore e be makgoba. Selekane sena ke Hagare.
25 Hagare o tshwantshetsa Sinai+ e leng thaba e Arabia, mehleng ena o tshwantshetsa Jerusalema hobane o bokgobeng le bana ba hae.
26 Empa Jerusalema e lehodimong e lokolohile mme ke mme wa rona.
27 Mangolo a re: “Thaba wena mosadi ya sa beng le bana. Hweletsa o thabile wena mosadi ya sa beng le mahlaba a pelehi hobane bana ba mosadi ya lahlilweng ba bangata ho feta ba ya nang le monna.”+
28 Bana beso, rona re tshwana le Isaka, re bana ba tshepisitsweng.+
29 Mehleng eo, mora ya tswetsweng jwalo ka bana ba bang o ile a hlorisa mora ya tswetsweng ka moya o halalelang.+ Ho jwalo le mehleng ena.+
30 Le ha ho le jwalo, Mangolo a boetse a re: “Leleka mosadi enwa wa mosebeletsi le mora wa hae hobane mora wa hae a ke ke a ja lefa le mora wa mosadi eo eseng lekgoba.”+
31 Ka lebaka leo bana beso, re bana ba mosadi ya lokolohileng eseng ba mosadi wa lekgoba.
Dintlha tse qetellong ya sehloho
^ Lentswe la Searame le bolelang “Ntate!”
^ Kapa: “ntshwela ka mathe.”
^ Kapa: “mosebeletsi.”
