Ho Baroma 11:1-36
11 Jwale, na Modimo o ile a lahla batho ba hae?+ Ho hang! Etswe le nna ke Moiseraele wa leloko la Benjamine, ke setloholo sa Abrahama.
2 Modimo ha a ka a lahla batho ba hae bao a ileng a ba kgetha pele.+ Na ha le tsebe seo Mangolo a se buang ka Elia, ha a ne a tletleba ho Modimo ka lebaka la Baiseraele? O ile a re:
3 “Jehova,* ba bolaile baprofeta ba hao, ba sentse dialetare tsa hao mme ke setse ke le mong, jwale le nna ba batla ho mpolaya.”+
4 Modimo o ile a reng ha a mo araba? O ile a re: “Ho ntse ho ena le banna ba 7 000 ba sa kang ba kgumamela Baale.”+
5 Ka tsela e tshwanang, le hona jwale ho ntse ho ena le sehlopha se senyenyane+ sa ba kgethilweng hara Bajuda ka lebaka la mosa* wa Modimo.
6 E leng hore o ba kgethile ka lebaka la mosa wa hae+ eseng hobane ho ena le ntho eo ba e entseng.+ E ne e tla be e se e se mosa haeba a ne a ba kgethile ka lebaka la dintho tseo ba di entseng.
7 Jwale re reng? Ntho eo Baiseraele ba neng ba hlile ba e batla ha ba a ka ba e fumana. Ba seng bakae ba kgethilweng ba ile ba e fumana.+ Ba bang bohle ha ba a ka ba mamela.+
8 Etswe Mangolo a re: “Modimo o ba robaditse boroko bo tebileng+ e le hore mahlo a bona a se ke a bona le ditsebe tsa bona di se ke tsa utlwa ho tla fihlela letsatsing lena.”+
9 Hape Davida o re: “E se eka tafole ya bona e ka ba leraba le sefi e le hore ba we mme ba fumane kotlo.
10 Mahlo a bona a fifale e le hore ba se ke ba bona mme o etse hore bophelo ba bona bo be boima.”*+
11 Na Bajuda ba ile ba kgoptjwa le ho wela hoo ba sa kang ba kgona ho ema? Ha ho jwalo. Empa ka ha ba ile ba etsa sebe mme batho ba ditjhaba tse ding ba bolokwa, ba ile ba ba mona.+
12 Jwale haeba ho tlola molao ha Bajuda ho tliselitse lefatshe lohle tlhohonolofatso, le ho fokotseha ha bona ho tliseditse batho ba ditjhaba tse ding tlhohonolofatso,+ tlhohonolofatso e tla ba kgolo hakae ha Bajuda le batho ba ditjhaba ba kopantswe kaofela?
13 Ke bua le lona batho ba ditjhaba hobane ke moapostola ya ronngweng ho lona+ mme ke nka mosebetsi oo ke o etsetsang Modimo o le bohlokwa.+
14 Ke tshepa hore ka tsela e itseng ke tla etsa hore batho ba heso ba be mona mme ke pholose ba bang ba bona.
15 Haeba ho lahlwa ha bona+ ho thusitse ba bang lefatsheng hore e be metswalle ya Modimo, ho tla ba jwang ha ba se ba amohelwa hape? E tla ba jwalo ka ha eka ba tsoswa bafung.
16 Ho feta moo, haeba karolo ya hlama e nkwang e le ditholwana tsa pele e halalela, hlama yohle e a halalela. Hape haeba motso wa sefate o halalela le makala a sona a a halalela.
17 Le ha ho le jwalo, a mang a makala a sefate a ile a kgaolwa yaba wena o nyadiswa le sefate seo mme o fumana molemo motsong wa sona le hoja o le lekala la sefate sa mohlwaare sa naheng.
18 O se ke wa ikgohomosetsa makala a kgaotsweng. Haeba o ikgohomosetsa ona,+ o hopole hore ha o fepe motso empa motso ke wona o o fepang.
19 Empa o tla re: “Makala a mang a ile a kgaolwa e le hore nka nyadiswa le sefate seo.”+
20 Ke nnete. A ile a kgaolwa hobane a ne a se na tumelo+ empa ka ha wena o na le tumelo, ha o a tloswa.+ Ka hoo, o se ke wa ikgohomosa empa o be hlokolosi.
21 Etswe haeba Modimo ha a ka a qenehela makala a sefate seo le wena a ke ke a o qenehela.
22 O a bona hore Modimo o mosa+ empa hape o bohale. O ile a halefela ba ileng ba wa hobane ba ne ba se na tumelo+ empa o tla ba mosa ho wena haeba o tshwaneleha hore o ka fumana mosa wa hae. Ho seng jwalo le wena o tla o kgaola.
23 Le bona haeba ba bontsha tumelo ho Modimo, o tla ba nyadisa le sefate+ hape hobane a ka kgona.
24 O ile wa kgaolwa sefateng sa mohlwaare sa naheng mme wa nyadiswa le sefate sa mohlwaare se lenngweng jareteng, e leng ntho e sa tlwaelehang. Ka hoo, ho tla ba bonolo le ho feta hore makala a sefate sa mohlwaare se lenngweng jareteng a neng a kgaotswe a kgutlisetswe ho sona.
25 Bana beso, ke batla hore le tsebe lekunutu lena le halalelang+ e le hore le se ke la nahana hore le bohlale: Karolo e itseng ya Iseraele e tla ba manganga ho fihlela palo ya baditjhaba e fella.
26 Mangolo a a bontsha hore Iseraele+ e tla pholoswa ka tsela ena ha a re: “Ho tla hlaha mopholosi Sione+ mme o tla thusa ditloholo tsa Jakobo hore di tlohele ho etsa dintho tse mpe.
27 Sena ke selekane sa ka le tsona+ ha ke tlosa dibe tsa tsona.”+
28 Ke nnete hore ba bang ba Bajuda ba hloile ditaba tse monate empa ho le tswela molemo. Le ha ho le jwalo, Modimo o ile a ba kgetha mme a ba rata ka lebaka la baholoholo ba bona.+
29 Modimo a ke ke a ikwahlaela hore ebe o fane ka dimpho tseo a faneng ka tsona kapa a ikwahlaela ho bitsa bao a ba kgethileng.
30 Pele le ne le sa mamele Modimo+ empa kajeno le hauhetswe+ ka lebaka la ho se mamele ha Bajuda.+
31 Ka hoo, o bile mosa ho lona ka lebaka la ho se mamele ha Bajuda e leng hore o ntse a ka ba mosa le ho bona.
32 Etswe Modimo o ba tlohetse e le batshwaruwa kaofela hobane ba sa mamele+ e le hore a ka ba mosa ho bona kaofela.+
33 Ditlhohonolofatso tsa Modimo di ngata hakaakang! Bohlale ba hae le dintho tseo a di tsebang di ke ke tsa lekanngwa. Dikahlolo tsa hae di ke ke tsa utlwisiswa ka ho feletseng hape re ke ke ra tseba ditsela tsa hae kaofela.
34 Etswe “ke mang ya ka tsebang menahano ya Jehova* kapa ke mang ya ka mo eletsang?”+
35 Kapa “ke mang ya kileng a fa Modimo ho hong e le hore Modimo a ka mo buseletsa?”+
36 Dintho tsohle di tswa ho yena, di teng ka lebaka la hae ebile ke tsa hae. O tshwanelwa ke thoriso ka ho sa feleng. Amen.
Dintlha tse qetellong ya sehloho
^ Sheba Ntlha ya A5.
^ Kapa: “o kotlobanye mekokotlo ya bona.”
^ Sheba Ntlha ya A5.
