Ho Baroma 7:1-25
7 Na ha le tsebe, bana beso, hore Molao o laola motho ha feela a ntse a phela? (Ke bua le lona ba tsebang molao.)
2 Ka mohlala, mosadi ya nyetsweng o tlameletswe ke molao ho monna wa hae ha a sa ntse a phela empa haeba monna wa hae a shwa, o lokolohile molaong wa monna wa hae.+
3 Haeba a nyalwa ke monna e mong empa monna wa hae a ntse a phela, o tla be a feba.+ Empa haeba monna wa hae a shwa, o lokolohile molaong wa hae, e leng hore o tla be a sa febe haeba a nyalwa ke monna e mong.+
4 Ka tsela e tshwanang bana beso, le lokolotswe Molaong ka mmele wa Kreste ya ileng a tsoswa bafung+ e le hore le ka ba ba hae.+ Hona jwale re se re ka kgona ho sebeletsa Modimo.*+
5 Ha re ne re phela ho ya ka ditakatso tsa boetsadibe, Molao o ile wa re bontsha hore ditakatso tsa rona tse fosahetseng ke tsona tse neng di etsa hore re etse sebe ka mmele ya rona. Ka hoo, sebe seo se etsa hore re shwe.+
6 Jwale re se re lokolotswe Molaong+ hobane ha o sa na matla ho rona mme re bahlanka ba Modimo ba laolwang ke moya o halalelang+ eseng molao o ngotsweng.+
7 Na jwale re re Molao ke sebe? Ho hang! Nka be ke sa tsebe hore na hantle sebe keng hoja ha se ka Molao.+ Ka mohlala, nka be ke sa tsebe hore ke phoso ho lakatsa dintho tsa motho e mong hoja Molao ha o a ka wa re: “O se ke wa lakatsa dintho tsa motho e mong.”+
8 Empa sebe se ile sa nka monyetla ka molao ona mme sa hlahisa ka hare ho nna ditakatso tsohle tsa boithati. Sebe se ne se se na matla ha molao o le siyo.+
9 Ha e le hantle, ke ne ke phela pele molao o fihla. Eitse ha molao o fihla, sebe se ile sa boela sa phela empa nna ka shwa.+
10 Ke ile ka hlokomela hore molao o neng o lokela ho ntlisetsa bophelo,+ o ntliselitse lefu.
11 Sebe se ile sa nka monyetla ka molao ona mme sa nthetsa le ho mpolaya.
12 Ho ntse ho le jwalo, Molao o a halalela le dintho tseo o di buang di a halalela, di lokile ebile di molemo.+
13 Na taba ee e bolela hore lefu la ka le bakilwe ke ntho e molemo? Ha ho jwalo! Ke sebe se mpolaileng. Molao o lokile empa o ile wa hlakisa hore sebe ke sona se mpolayang.+ Ka hoo, molao o bontshitse hore na sebe ke ntho e mpe hakae.+
14 Re a tseba hore Molao o tswa ho Modimo* empa nna ke motho ya sa phethahalang,* ya rekisitsweng hore e be lekgoba la sebe.+
15 Ha ke utlwisise hore na hobaneng ha ke etsa dintho tseo ke di etsang. Ho ena le hore ke etse dintho tseo ke batlang ho di etsa, ke etsa tseo ke di hloileng.
16 Ke a dumela hore Molao o lokile empa ke ntse ke etsa dintho tseo ke sa batleng ho di etsa.
17 Ka hoo, ha se nna ya etsang dintho tsena tse mpe empa ke sebe se ho nna.+
18 Ke a tseba hore ha ho letho le lokileng ho nna, ke hore mmeleng wa ka. Ke lakatsa ho etsa dintho tse nepahetseng empa ha ke kgone.+
19 Ho ena le hore ke etse dintho tse ntle tseo ke batlang ho di etsa, ke etsa dintho tse mpe tseo ke sa batleng ho di etsa.
20 Ka hoo, haeba ke etsa dintho tseo ke sa batleng ho di etsa, ha se nna ya di etsang empa ke sebe se ho nna se di etsang.
21 Ke fumana hore taba ena ke nnete boemong ba ka: Ha ke batla ho etsa dintho tse nepahetseng, tse mpe di teng ho nna.+
22 Ke rata molao wa Modimo ho tloha botebong ba pelo ya ka.+
23 Empa mmeleng wa ka ke bona molao o mong o lwantshang molao wa kelello+ ya ka ebile o nketsa motshwaruwa wa molao wa sebe+ o mmeleng wa ka.
24 Ka nnete ke otla pelo! Ke mang ya tla mpholosa mmeleng oo o nkisang lefung?
25 Ke leboha Modimo hobane o mpholosa ka Jesu Kreste Morena wa rona. Ka hoo, ke lekgoba la molao wa Modimo ka kelello ya ka empa ke lekgoba la molao wa sebe ka mmele wa ka.+
Dintlha tse qetellong ya sehloho
^ Ka Segerike: “behela Modimo ditholwana.”
^ Ka Segerike: “ke wa moya.”
^ Ka Segerike: “wa nama.”
