Ho Baroma 8:1-39
-
Moya o halalelang o fana ka bophelo le bolokolohi (1-11)
-
Moya wa Modimo o a re kgodisa hore re bana ba Modimo (12-17)
-
Popo ya Modimo e letetse ho fumana tokoloho jwalo ka bana ba Modimo (18-25)
-
“Moya o halalelang o a re buella” (26, 27)
-
Modimo o etsa ditlhophiso (28-30)
-
Re tla hlola hobane Modimo o a re rata (31-39)
8 Ba bonngweng le Kreste Jesu ha ba nkwe ba le molato.
2 Molao wa moya o halalelang o fanang ka bophelo o le lokolotse e le hore le ka ba bonngweng le Kreste Jesu. Molao oo o le lokolotse+ molaong wa sebe le wa lefu.
3 Molao wa Moshe o ne o se na matla a ho le lokolla+ hobane batho ke baetsadibe ebile ba a fokola.+ Ka hoo, Modimo o ile a re lokolla ka hore a romele mora wa hae+ ka sebopeho sa batho ba baetsadibe e le hore a fedise sebe.+ Ka ho etsa jwalo, o ile a ahlola sebe se ho rona
4 e le hore re ka etsa dintho tse lokileng tseo Molao o reng re di etse,+ ka hore re se ke ra dumella ditakatso tsa rona ho re laola empa re dumelle moya wa Modimo ho re laola.+
5 Batho ba laolwang ke ditakatso tsa bona ba nahana ka ditakatso tse fosahetseng+ empa batho ba laolwang ke moya wa Modimo ba nahana ka dintho tse amanang le moya wa Modimo.+
6 Batho ba dulang ba amehile ka ditakatso tse fosahetseng ba tla shwa+ empa ba dulang ba amehile ka dintho tse amanang le moya wa Modimo ba tla fumana bophelo le kgotso.+
7 Haeba re dula re amehile ka ditakatso tse fosahetseng, re iketsa dira tsa Modimo.+ Mmele e laolwang ke ditakatso tse fosahetseng ha e ikobele molao wa Modimo ebile e ke ke ya kgona.
8 Ka hoo, batho ba inehellang ditakatso tse fosahetseng ba ke ke ba kgahlisa Modimo.
9 Empa lona bana beso, ha le laolwe ke ditakatso tse fosahetseng.+ Haeba ka nnete moya wa Modimo o ho lona, le laolwa ke wona. Haeba motho a se na moya wa Kreste, motho eo ha se wa Kreste.
10 Haeba Kreste a le bonngweng le lona,+ mmele o shwele ka lebaka la sebe empa moya o etsa hore le phele hobane le lokile.
11 Moya wa Modimo o tsositse Jesu bafung. Haeba le ena le moya oo, Modimo ya tsositseng Jesu bafung+ o tla phedisa mmele ya lona e shwang+ ka moya wa hae o ho lona.
12 Ka hoo bana beso, ha re a lokela ho laolwa ke ditakatso tse fosahetseng.+
13 Haeba le itumella ho laolwa ke ditakatso tse fosahetseng, ka nnete le tla shwa.+ Empa haeba le dumella moya ho le thusa hore le bolaye ditakatso tse fosahetseng le tla phela.+
14 Bohle ba tataiswang ke moya wa Modimo ke bara ba Modimo.+
15 Ha le a fuwa moya o etsang hore le be makgoba le o etsang hore le dule le tshohile. Empa le fuwe moya o etsang hore Modimo a re nkele ka lapeng. Moya oo o etsa hore re hweletse re re: “Abba,* Ntate!”+
16 Moya wa Modimo o a re kgodisa*+ hore re bana ba Modimo.+
17 Haeba re bana ba Modimo, re boetse re majalefa a hae ebile re majalefammoho+ le Kreste ha feela re utlwa bohloko ha mmoho+ e le hore re ka boela ra tlotliswa ha mmoho.+
18 Ke nka dintho tsohle tse bohloko tse re hlahelang hona jwale e se letho ha di bapiswa le nako eo ka yona Modimo a tla bonahatsa moputso o moholo oo re tla o fumana.+
19 Popo ya Modimo e letetse ka tjantjello ho senolwa ha bara ba Modimo.+
20 Modimo o ile a tlohela popo ya hae hore e ahlolelwe+ bophelo bo se nang bokamoso le hoja e ne e sa batle. Le ha ho le jwalo, ha Modimo a phatlalatsa kahlolo eo, o ne a fana ka tshepo
21 ya hore popo ya hae e tla lokollwa+ bokgobeng ba tshenyeho mme e fumane tokoloho jwalo ka bana ba Modimo.
22 Re a tseba hore popo yohle e ntse e bobola le ho utlwa bohloko ha mmoho ho fihlela jwale.
23 Ha se popo ya Modimo feela, le rona ba fumaneng karolo ya pele ya moputso e leng moya o halalelang, re a bobola+ ha re ntse re letetse ka tjantjello ho nkelwa ka lapeng re le bara.+ Ka nako eo, re tla lopollwa mmeleng ya rona e nang le sebe ka Kreste Jesu.*
24 Ha re pholoswa re ile ra ba le tshepo empa ha motho a lebella ntho eo a seng a e fumane, hoo ha e sa le tshepo. Na ha motho a se a fumane ntho ho sa hlokahala hore a be le tshepo ya hore e a tla?
25 Empa haeba re eba le tshepo+ ya hore ntho eo re eso e fumane+ e tla fihla, re tswela pele ho e letela ka mamello.+
26 Hape moya o halalelang o ka re thusa ha re se na matla.+ Bothata ke hore re hloka ho rapela empa ha re tsebe hore na re reng. Ha re lla empa re sa tsebe hore na re reng, moya o halalelang o a re buella.
27 Modimo o hlahloba dipelo+ mme o utlwisisa seo moya o se buang hobane moya o rapella bahalaledi tumellanong le thato ya Modimo.
28 Re a tseba hore Modimo o etsa hore mesebetsi yohle ya hae e hlophisehe molemong wa ba mo ratang, ba kgethilweng ho ya ka thato ya hae.+
29 O ile a ba kgetha ho tloha qalong mme a etsa qeto esale pele ya hore ba tla tshwana le Mora wa hae+ e le hore mora e ka ba letsibolo+ hara bana babo ba bangata.+
30 O ile a bitsa bao a ba kgethileng esale pele,+ a ba nka ba lokile+ mme a ba tlotlisa.+
31 Re tla reng ka ditaba tsee? Ha Modimo a eme le rona, ke mang ya ka re lwantshang?+
32 Ha a ka a tsilatsila ho tela esita le Mora wa hae empa o ile a fana ka yena+ hore a re shwele kaofela. Ka hoo, na a ke ke a ba mosa mme a re fa le dintho tse ding tsohle?
33 Ke mang ya tla qosa ba kgethilweng ke Modimo?+ Modimo ke yena ya reng ba lokile.+
34 Ke mang ya ka ba ahlolang? Kreste Jesu ke yena ya ba shwetseng mme a tsoswa bafung. Hona jwale o ka letsohong le letona la Modimo,+ o ntse a re rapella.+
35 Ke eng e ka sitisang Kreste hore a re rate?+ Na ke mathata, mahlomola, mahloriso, tlala, tlhobolo, kotsi kapa sabole?+
36 Mangolo a re: “Re bolawa ka mehla ka lebaka la hao. Re nkwa jwalo ka dinku tse lokelang ho hlajwa.”+
37 Empa dinthong tsena tsohle re hlaha re hlotse+ ka lebaka la ya ileng a re rata.
38 Ke kgodisehile hore lefu, bophelo, mangeloi, mebuso, dintho tse teng hona jwale, dintho tse tlang, matla,+
39 bophahamo, botebo kapa dintho tse ding tsohle tse bopilweng di ke ke tsa re arohanya le lerato leo Modimo a re bontshitseng lona ka Kreste Jesu Morena wa rona.
Dintlha tse qetellong ya sehloho
^ Ke lentswe la Seheberu kapa la Searame le bolelang “Ntate!”
^ Ka Segerike: “Moya o paka le moya wa rona.”
^ Ka Segerike: “ka thekollo eo Jesu a e patetseng.”
