Daniele 9:1-27
9 Ka selemo sa pele sa puso ya Dariuse+ mora wa Asueruse e leng setloholo sa Bamede, ya ileng a etswa morena mmusong wa Bakalde,+
2 ha ke ntse ke bala dibuka* selemong seo, ke ile ka hlokomela hore Jerusalema+ e ne e tla dula e se na baahi ka dilemo tse 70+ jwalo ka ha Jehova a ne a boleletse moprofeta Jeremia.
3 Ka mora moo, ka kopa thuso ho Jehova Modimo wa nnete, ka rapela, ka itima dijo,+ ka apara lesela le hwashang* mme ka itshela ka molora.
4 Ka rapela Jehova Modimo wa ka, ka bolela dibe tsa rona ka re:
“Jehova Modimo wa nnete, Modimo e moholo le ya hlomphehang,* ya bolokang selekane sa hae le ya ratang batho ba mo ratang+ le ba mamelang ditaelo tsa hae,+
5 re entse sebe, ra o fosetsa, ra etsa dintho tse kgopo le ho o fetohela.+ Ha re a latela ditaelo le dikahlolo tsa hao.
6 Ha re a mamela bahlanka ba hao e leng baprofeta,+ ba ileng ba bua ka lebitso la hao ho marena a rona, dikgosana tsa rona, baholoholo ba rona le ho batho bohle ba naha ya rona.
7 Jehova, o Modimo ya lokileng. Empa kaofela ha rona, ho akarelletsa le batho ba Juda, baahi ba Jerusalema, Baiseraele bohle ba dulang haufi le ba dulang hole, ba dulang dinaheng tsohle tseo o ba hasantseng ho tsona, re hlabilwe ke dihlong jwalo ka ha ho le jwalo kajeno hobane ha re a o tshepahalla.+
8 Jehova, rona, marena a rona, dikgosana tsa rona le baholoholo ba rona, re hlajwa ke dihlong hobane re o sitetswe.
9 Jehova Modimo wa rona o mohau ebile o a tshwarela+ empa rona re o fetohetse.+
10 Ha re a o mamela Jehova Modimo wa rona hobane ha re a latela melao ya hao eo o re fileng yona ka bahlanka ba hao e leng baprofeta.+
11 Baiseraele bohle ba tlotse molao wa hao ebile ba o fetohetse ka hore ba se ke ba mamela lentswe la hao. Ka lebaka leo, o ile wa re tlisetsa thohako ho ya ka kano e ngotsweng Molaong wa Moshe mohlanka wa hao+ hobane re o sitetswe.
12 O phethahaditse seo o ileng wa se bua ka rona+ le ka babusi ba rona* ka ho re tlisetsa tlokotsi e kgolo. Mahlomola a bileng teng Jerusalema ha a eso ka a eba teng lefatsheng lohle.+
13 Mahlomola ana ohle a re etsahaletse+ jwalo ka ha ho ngotswe Molaong wa Moshe. Le ha ho le jwalo, ha re eso o kope hore o re hauhele Jehova Modimo wa rona ka hore re bakele diphoso tsa rona+ le ho bontsha hore re a utlwisisa hore o a tshepahala.
14 Jehova, o ne o ntse o re shebile yaba o re tlisetsa tlokotsi. Jehova Modimo wa rona, dintho tsohle tseo o di entseng di lokile. Le ha ho le jwalo, ha re a ka ra o mamela.+
15 Jehova Modimo wa rona, wena ya ntshitseng batho ba hao naheng ya Egepeta ka matla a hao+ mme wa etsa hore lebitso la hao le tsebahale ho fihlela letsatsing lena,+ re entse sebe le bokgopo.
16 Jehova hle, re kopa o kgaotse ho halefela motse wa hao Jerusalema e leng thaba ya hao e halalelang hobane o dula o etsa dintho tse lokileng.+ Jerusalema le batho ba hao ba songwa ke batho bohle ba ba potolohileng+ ka lebaka la dibe tsa rona le diphoso tsa baholoholo ba rona.
17 Modimo wa rona, e se eka o ka mamela thapelo ya ka le dikopo tsa ka. Jehova, etsa dintho tse ntle bakeng sa sebaka sa hao se halalelang+ se sentsweng+ e le hore o tlotliswe.
18 Mamela hle Modimo wa ka mme o utlwe. Bula mahlo a hao mme o bone boemo ba rona bo otlang pelo le motse o bitswang ka lebitso la hao. Ha re o kope hobane re le batho ba lokileng empa re o kopa hobane o le Modimo ya mohau.+
19 Re mamele hle Jehova. Jehova re tshwarele.+ Re utlwe hle Jehova. Modimo wa ka, o se ke wa dieha molemong wa lebitso la hao hobane motse wa hao le batho ba hao ba bitswa ka lebitso la hao.”+
20 Ha ke ntse ke bua, ke rapela, ke bolela dibe tsa ka le tsa setjhaba sa heso sa Iseraele ebile ke kopa hore Jehova Modimo wa ka a hauhele thaba ya hae e halalelang,+
21 ha ke ntse ke rapela, Gabariele+ e leng monna eo ke ileng ka mo bona pele ponong,+ a tla ho nna ke kgathetse haholo, hoo e ka bang ka nako ya ho nyehela mpho ya mantsiboya.
22 A nthusa hore ke utlwisise dintho tse tlo etsahala. A re:
“Daniele, ke tlile ho tla o thusa hore o lemohe o be o utlwisise dintho tsena.
23 Ha o ne o qala ho rapela, ke ile ka fumana molaetsa o tswang ho Modimo mme ke tlile ho tla o bolella wona hobane o motho ya ratwang haholo.*+ Ka hoo, nahana ka taba ena mme o utlwisise pono eo o e boneng.
24 Batho ba heno le motse wa heno o halalelang+ o behetswe dibeke* tse 70 e le hore ho fediswe molato, ho tloswe sebe,+ ho etswe sehlabelo sa tshwarelo ya dibe,+ ho be le ho loka ka ho sa feleng,+ ho tiiswe pono le boprofeta*+ le hore ho tlotswe Sehalalelo sa Dihalalelo.*
25 O tsebe o be o utlwisise hore ho tloha ha ho phatlalatswa hore Jerusalema e tsosoloswe+ ho fihlela Mesia*+ Moetapele+ a hlahella, e tla ba dibeke tse supileng le dibeke tse 62.+ E tla tsosoloswa e be le lebala la motse le foro e thibellang empa ka nako eo ho tla be ho le thata.
26 Ka mora dibeke tse 62, Mesia o tla bolawa+ ho se na letho leo a setseng ka lona.+
Moetapele o tla tla le masole a hae mme ba fedise motse oo le sebaka se halalelang+ mme timetso e tla tla ka morwallo. Ho tla ba le ntwa ho fihlela bofelong. Modimo o entse qeto ya hore ho fediswe motse oo.+
27 O tla etsa hore selekane se dule se le teng molemong wa ba bangata ka beke e le nngwe. Halofong ya beke eo, o tla fedisa sehlabelo le nyehelo ya mpho.+
Ya senyang o tla tla a le lepheong la dintho tse nyonyehang.+ Qeto eo Modimo a e entseng e tla tshollelwa hodima ya setseng a le mong ho fihlela a fediswa.”
Dintlha tse qetellong ya sehloho
^ E leng dibuka tse halalelang.
^ Kapa: “tshabehang.”
^ Ka Seheberu: “baahlodi ba rona ba ileng ba re ahlola.”
^ Kapa: “ya kgahlehang haholo.”
^ Mona beke e le nngwe ke dilemo tse supileng.
^ Kapa: “Sehalaledisiso.”
^ Ka Seheberu: “moprofeta.”
^ Kapa: “Motlotsuwa.”
