Deuteronoma 34:1-12
34 Jwale Moshe a tloha lehwatateng la Moabe a nyolohela Thabeng ya Nebo+ ka hodima Pisga,+ e shebaneng le Jeriko.+ Yaba Jehova o mo bontsha naha yohle, ho tloha Gileade ho ya fihla Dane,+
2 Nefthali yohle le naha ya Efraime le Manase le naha yohle ya Juda ho ya fihla lewatleng le ka bophirimela.*+
3 A mo bontsha le Negebe+ le Setereke+ sa Jordane le thota ya Jeriko e leng motse o nang le difate tsa dipalema le ho ya fihla Zoware.+
4 Yaba Jehova o re ho yena: “Ena ke naha eo ke e hlapanyeditseng Abrahama, Isaka le Jakobo ka re, ‘Ke tla e fa ditloholo* tsa hao.’+ Ke o dumelletse hore o e bone empa o ke ke wa tshelela ho yona.”+
5 Ka mora moo, Moshe mohlanka wa Jehova a shwella moo naheng ya Moabe feela jwalo ka ha Jehova a buile.+
6 O ile a mo pata kgohlong e naheng ya Moabe ka pela Bethe-peore mme ha ho na motho ya tsebang hore na lebitla la hae le hokae ho fihlela letsatsing lena.+
7 Moshe o ne a le dilemo di 120 ha a shwa.+ Ka nako eo, o ne a ntse a bona hantle ebile a le matla.
8 Setjhaba sa Iseraele sa llela Moshe lehwatateng la Moabe ka matsatsi a 30.+ Yaba matsatsi a ho llela Moshe a fela.
9 Joshua mora wa Nune o ne a le bohlale haholo* hobane Moshe o ne a mo kgethile.*+ Baiseraele ba qala ho mo mamela mme ba etsa feela jwalo ka ha Jehova a ne a laetse Moshe.+
10 Empa ha ho eso ka ho eba le moprofeta ya kang Moshe Iseraele,+ eo Jehova a neng a mo tseba hantle.*+
11 Moshe o ile a etsa dipontsho tsohle le mehlolo eo Jehova a ileng a mo romela hore a e etse naheng ya Egepeta ho Faro le ho bahlanka bohle ba hae le ho naha yohle ya hae+
12 ka letsoho le matla le diketso tse makatsang ka pela mahlo a Baiseraele bohle.+
Dintlha tse qetellong ya sehloho
^ E leng Lewatle le Leholo la Mediterranean.
^ Ka Seheberu: “peo.”
^ Kapa: “bohlale boo matla a Modimo a mo fileng bona.”
^ Ka Seheberu: “a mo behile matsoho.”
^ Ka Seheberu: “eo Jehova a neng a mo tseba difahleho di tadimane.”
