Diketso Tsa Baapostola 12:1-25
12 Ka nako eo, Morena Heroda a sotla batho ba bang ka phuthehong.+
2 A bolaya Jakobo ngwanabo Johanne+ ka sabole.+
3 Ha a bona hore Bajuda ba thabetse ntho eo a e entseng, a tshwara Petrose. (O entse jwalo nakong ya Mokete wa Mahobe a se Nang Tomoso.)+
4 A mo kenya teronkong+ yaba o beha dihlopha tse nne tsa masole hore di tjhentjhane ka ho mo lebela. Sehlopha ka seng se ne se ena le masole a mane. O ne a rerile ho mo qosa ka pela batho ka mora Paseka.
5 Ka hoo, Petrose a nna a dula teronkong empa phutheho e ne e ntse e mo rapella ka matla ho Modimo.+
6 Bosiung ba pele Petrose a qoswa ke Heroda, Petrose o ne a robetse a tlanngwe ka diketane tse pedi dipakeng tsa masole a mabedi mme masole a mang a ne a lebetse monyako wa teronko.
7 Lengeloi la Jehova* la hlaha+ mme ha eba le kganya ka seleng. La sisinya Petrose lehlakoreng ho mo tsosa la re: “Tsoha kapele.” Diketane tse matsohong a hae tsa wa.+
8 Lengeloi la re ho yena: “Apara o be o rwale dieta.”* A etsa jwalo. Yaba le re ho yena: “Apara seaparo sa hao sa ka hodimo ebe o ntshala morao.”
9 A tswa a le setse morao empa o ne a sa tsebe hore dintho tseo lengeloi le di entseng ke tsa sebele. O ne a nahana hore ntho e etsahalang ke pono.
10 Ba feta sehlopha sa pele le sa bobedi sa masole yaba ba fihla keiting ya tshepe e tswelang motseng. Keiti eo ya ipula. Ha ba qeta ho tswa ba theosa ka seterata se seng yaba hanghang lengeloi le tloha ho yena.
11 Ha Petrose a elellwa hore na ho etsahetseng a re: “Ke a hlokomela jwale hore Jehova* o ile a romela lengeloi la hae mme a ntopolla matsohong a Heroda le ho tsohle tseo Bajuda ba neng ba lebeletse hore di etsahale.”+
12 Ka mora hore a elellwe hore na ho etsahetseng, a ya ha Maria mme wa Johanne ya neng a rehilwe Mareka.+ Batho ba bangata ba ne ba le moo ba ntse ba rapela.
13 Ha a kokota a le keiting, ngwanana wa mosebeletsi ya bitswang Roda a tla ho yena.
14 Ha a utlwa hore ke lentswe la Petrose, ho ena le hore a bule keiti, a mathela ka tlung ho ya bolella ba bang hore Petrose o eme keiting.
15 Ba re ho yena: “O a hlanya.” Empa ngwanana eo wa mosebeletsi a nna a tiisa hore e fela e le Petrose. Ba re: “E tlameha e le lengeloi la hae.”
16 Petrose yena o ne a ntse a eme keiting a kokota. Ha ba bula mme ba mo bona, ba makala.
17 A ba bontsha ka letsoho hore ba thole. Ka mora moo, a ba phetela ka moo Jehova* a ileng a mo ntsha teronkong ka teng. Qetellong a re: “Bolellang Jakobo+ le banna ba bang ditaba tsena.” Yaba o a tsamaya o ya sebakeng se seng.
18 Ha bosiu bo esa, ha eba le pherekano e kgolo hara masole hobane a ne a ipotsa hore na Petrose o nyameletse kae.
19 Heroda a mo batla hohle, yare ha a sa mo fumane, a hloma masole ao dipotso yaba o laela hore a fuwe kotlo.+ Ka mora moo, Heroda a tloha Judea a ya Sesarea mme a dula moo ka nakwana.
20 Heroda o ne a halefetse* batho ba Tire le Sidone. Ka ha naha ya bona e ne e fumana dijo ho tswa naheng ya morena Heroda, ba dumellana ho ya ho yena yaba ba kopa Blastase hore a ba thuse ho bopa kgotso le morena. Blastase o ne a okametse ntlo ya morena.*
21 Ka letsatsi le leng le kgethehileng, Heroda a apara diaparo tsa hae tsa borena yaba o dula setulong sa kahlolo o bua le setjhaba.
22 Yaba setjhaba se bokaneng se a hweletsa se re: “Ke lentswe la modimo eseng la motho!”
23 Hanghang lengeloi la Jehova* la mo otla hobane ha a ka a tlotlisa Modimo. A jewa ke diboko yaba o a shwa.
24 Lentswe la Jehova* la nna la tsebahala mme batho ba bangata ya eba badumedi.+
25 Ka mora hore Barnabase+ le Saule ba phethe mosebetsi wa bona wa ho isa diphallelo Jerusalema,+ ba kgutla le Johanne+ ya neng a bitswa Mareka.
Dintlha tse qetellong ya sehloho
^ Sheba Ntlha ya A5.
^ Ka Segerike: “meqathatso.”
^ Sheba Ntlha ya A5.
^ Sheba Ntlha ya A5.
^ Kapa: “a batla ho lwantsha.”
^ Ka Segerike: “kamore ya ho robala ya morena.”
^ Sheba Ntlha ya A5.
^ Sheba Ntlha ya A5.
