Diketso Tsa Baapostola 7:1-60
7 Moprista ya phahameng a re ho Setefane: “Na ditaba tsee ke nnete?”
2 Setefane a re: “Bontate, bana beso, ke kopa le mmamele. Modimo ya hlomphehang o ile a hlaha ho moholoholo wa rona Abrahama ha a ntse a le Mesopotamia pele a dula Harane,+
3 a re ho yena: ‘Tloha naheng ya heno, ho ba leloko la hao, o ye naheng eo ke tla o bontsha yona.’+
4 A tloha naheng ya Bakalde a ya dula Harane. Ka mora hore ntate wa hae a shwe,+ Modimo a re a fallele naheng ena eo le dulang ho yona hona jwale.+
5 Ha a le moo, Modimo ha a ka a mo fa lefa ho hang, le ha e se e le sebakanyana sa hore a behe leoto. Empa a tshepisa ho fana ka naha eo e le lefa ho bana* ba hae+ le hoja a ne a eso be le bana ka nako eo.
6 Modimo o ile a boela a mo bolella hore bana* ba hae e tla ba baditjhaba naheng eo e seng ya bona le hore batho ba tla ba etsa makgoba mme ba ba hlorise ka dilemo tse 400.+
7 Hape a re: ‘Ke tla ahlola setjhaba seo bana ba hao e tla ba makgoba a sona.+ Ka mora moo, ba tla tloha naheng eo ebe ba ntshebeletsa sebakeng sena.’+
8 Modimo a boela a etsa selekane sa lebollo+ le Abrahama yaba Abrahama o tswala Isaka+ mme o mo bolotsa letsatsing la borobedi.+ Isaka a tswala* Jakobo, Jakobo yena a tswala dihlooho tsa malapa tse 12.
9 Dihlooho tsa malapa tsa monela Josefa+ yaba di mo rekisetsa Baegepeta.+ Empa Modimo o ne a ena le yena,+
10 a mo lopolla mahlomoleng ohle a hae, a mo fa bohlale a ba a etsa hore Faro morena wa Egepeta a mo rate. Faro a mo kgetha hore a buse Egepeta le ntlo yohle ya hae.+
11 Tlala ya eba teng hohle Kanana le Egepeta, ya baka mahlomola a maholo mme baholoholo ba rona ba hloka dijo.+
12 Ha Jakobo a utlwa hore dijo di teng Egepeta, a romela baholoholo ba rona ka lekgetlo la pele.+
13 Ha a ba roma ka lekgetlo la bobedi, Josefa a itsebisa bana babo mme Faro a tseba lelapa la bo Josefa.+
14 Josefa a romela molaetsa ho ntate wa hae Jakobo le beng ka yena kaofela hore ba tle,+ kaofela e ne e le batho ba 75.+
15 Jakobo a fallela Egepeta+ a ba a shwella teng+ mmoho le baholoholo ba rona.+
16 Ba iswa Shikeme yaba ba patelwa lebitleng leo Abrahama a neng a le rekile ka tjhelete ya silevera ho bara ba Hamore ha a le Shikeme.+
17 Ha nako e atamela ya hore tshepiso eo Modimo a e boleletseng Abrahama e phethahale, Baiseraele ba eketseha Egepeta.
18 Yaba ho ba le morena e motjha Egepeta ya neng a sa tsebe Josefa.+
19 O ile a etsetsa batho ba habo rona bolotsana, a ba tshwara hampe a ba a ba qobella ho lahla masea a bona e le hore a shwe.+
20 Moshe a tswalwa nakong eo mme o ne a le motle haholo.* A hodisetswa lelapeng la ntate wa hae ka dikgwedi tse tharo.+
21 Batswadi ba hae ba ile ba qobelleha ho mo lahla+ yaba moradi wa Faro o a mo nka o mo hodisa e le mora wa hae.+
22 Moshe o ile a fumana thuto ya boleng bo phahameng ka ho fetisisa* Egepeta. E ne e le kgeleke a bile a etsa mesebetsi e meholo.+
23 Ha a le dilemo di 40, a etsa qeto ya* ho etela* bana babo ba Baiseraele.+
24 Ha a bona Moegepeta a tshwara e mong wa bana babo hampe, a mo lwanela yaba o bolaya Moegepeta eo.
25 O ne a nahana hore bana babo ba tla nka hore Modimo o ba pholosa ka yena empa ha ba a ka ba nahana jwalo.
26 Ka le hlahlamang, a fumana ba bang ba bana babo ba ntse ba lwana yaba o leka ho ba thusa hore ba bope kgotso. A re ho bona: ‘Bana beso, le bana ba motho. Ke hobaneng ha le lwantshana?’
27 Ya neng a le molato a sutumetsa Moshe yaba o re ho yena: ‘Ke mang ya o entseng morena le moahlodi wa rona?
28 Na o batla ho mpolaya jwalo ka ha o bolaile Moegepeta elwa maobane?’
29 Ha Moshe a utlwa a tjho jwalo, a baleha a ya dula Midiane. Ha a le moo, o ile a ba le bara ba babedi.+
30 Ka mora dilemo tse 40, lengeloi la hlaha ho yena lefeelleng la Thaba ya Sinai le le lelakabeng la mollo hara sehlahla se meutlwa.+
31 Moshe a makatswa ke ntho eo a e bonang. Yare ha a atamela a yo shebisisa, a utlwa lentswe la Jehova* le re:
32 ‘Ke nna Modimo wa baholoholo ba hao, Modimo wa Abrahama, Isaka le Jakobo.’+ Moshe a thothomela ke letswalo yaba ha a sa shebisisa ho ya pele.
33 Jehova* a re ho yena: ‘Rola dieta* tsa hao hobane sebaka seo o emeng ho sona se a halalela.
34 Ke bone ka moo batho ba ka ba hateletsweng ka teng Egepeta. Ke utlwile sello sa bona+ ebile ke a theoha ho ya ba pholosa. Tloo ke o rome Egepeta.’
35 Moshe enwa eo ba ileng ba mo latola ba re: ‘Ke mang ya o entseng morena le moahlodi wa rona?’+ ke yena eo Modimo a ileng a mo roma+ e le mmusi le molopolli ka lengeloi le ileng la hlaha ho yena sehlahleng se meutlwa.
36 O ile a ba ntsha Egepeta,+ a etsa mehlolo naheng eo+ le Lewatleng le Lefubedu+ le ha ba le lefeelleng ka dilemo tse 40.+
37 Moshe ke yena ya ileng a re ho Baiseraele: ‘Modimo o tla le kgethela moprofeta ya tshwanang le nna hara bana ba bo lona.’+
38 Ke yena ya neng a ena le phutheho lefeelleng ha lengeloi+ le bua le yena+ ha mmoho le baholoholo ba rona Thabeng ya Sinai. O ile a fuwa diphatlalatso tse halalelang le tse tshwarellang e le hore a re bolelle tsona.+
39 Baholoholo ba rona ba ile ba hana ho mo mamela, ba mo qhelela ka thoko+ yaba dipelo tsa bona di kgutlela Egepeta.+
40 Ba re ho Arone: ‘Re etsetse medimo e tla re etella pele hobane ha re tsebe hore na ho etsahetseng ka Moshe enwa ya re eteletseng pele ho tswa naheng ya Egepeta.’+
41 Ba etsa setshwantsho sa namane, ba se etsetsa sehlabelo mme ba ithabisa ka lebaka la namane eo ba e entseng.+
42 Modimo a ba furalla mme a ba tlohela hore ba rapele tsohle tse mahodimong+ feela jwalo ka ha ho ngodilwe bukeng ya Baprofeta ha e re: ‘Lona Baiseraele, ha le ne le etsa dinyehelo le mahlabelo ka dilemo tse 40 tseo le di qetileng lefeelleng, le ne le sa etsetse nna.
43 Le ile la jara tente ya Moloke+ le setshwantsho sa naledi ya modimo Refane e leng ditshwantsho tseo le ileng la di etsa e le hore le di rapele. Ka hoo, ke tla le isa ka nqane ho Babilona le le batshwaruwa.’+
44 Modimo o ile a laela Moshe ho etsa tabernakele* ka tsela eo a neng a mo bontshitse mme baholoholo ba rona ba ne ba ena le yona lefeelleng.+
45 Baholoholo ba rona ba ile ba e nka yaba ba tsamaya le Joshua ho ya naheng ya ditjhaba+ tseo Modimo a ileng a di leleka molemong wa baholoholo ba rona.+ E dutse mona ho fihlela mehleng ya Davida.
46 Modimo wa Jakobo o ile a mo rata. Davida a kopa ho fuwa monyetla o ikgethang wa ho hahela Modimo ntlo.+
47 Empa Solomone ke yena ya mo hahetseng ntlo.+
48 Le ha ho le jwalo, Ya Phahameng ka ho Fetisisa ha a dule ka matlung a entsweng ka matsoho+ jwalo ka ha moprofeta a boletse a re:
49 ‘Jehova* o re: “Lehodimo ke terone ya ka+ mme lefatshe ke setulwana sa maoto a ka.+ Le tla nkahela ntlo ya mofuta ofe kapa ke phomole hokae?
50 Letsoho la ka le entse dintho tsena tsohle.”’+
51 Lona banna ba manganga, ba dipelo di thata le ba sa utlwisiseng, ka mehla le hanyetsa moya o halalelang jwalo ka baholoholo ba lona.+
52 Ke moprofeta ofe eo baholoholo ba lona ba sa mo hlorisang?+ Ba bolaile batho ba profetileng ho tla ha motho ya lokileng,+ eo lona le mo rekisitseng* le ho mo bolaya.+
53 Modimo o le file Molao a sebedisa mangeloi+ empa ha le a o mamela.”
54 Ha ba utlwa a tjho jwalo, ba tuka ke bohale* mme ba batla ho mo ntsha kotsi.
55 Setefane a tlala moya o halalelang yaba o sheba lehodimong mme o bona kganya ya Modimo le ya Jesu a eme ka letsohong le letona la Modimo.+
56 A re: “Ke bona mahodimo a bulehile le Mora motho+ a eme ka letsohong le letona la Modimo.”+
57 Ha ba utlwa mantswe ao ba hweletsa, ba ithiba ditsebe yaba ba a mo kgorohela.
58 Ba mo lahlela ka ntle ho motse yaba ba mo tlepetsa ka majwe.+ Dipaki+ tse mo qositseng tsa beha diaparo tsa tsona tsa ka hodimo maotong a mohlankana ya bitswang Saule.+
59 Ha ba ntse ba tlepetsa Setefane ka majwe, Setefane a re: “Morena Jesu, ke kopa o amohele bophelo* ba ka.”
60 Qetellong a kgumama a hweletsa a re: “Jehova,* o se ke wa ba balla sebe sena.”+ Ka mora hore a bue mantswe ana a robala lefung.
Dintlha tse qetellong ya sehloho
^ Ka Segerike: “peo.”
^ Ka Segerike: “peo.”
^ Kapa mohlomong: “a etsa ntho e tshwanang ka.”
^ Kapa: “o ne a le motle ho Modimo.”
^ Ka Segerike: “a rupelwa ka bohlale bohle ba Baegepeta.”
^ Kapa: “hlahloba.”
^ Kapa: “ha fihla pelong ya hae.”
^ Sheba Ntlha ya A5.
^ Sheba Ntlha ya A5.
^ Ka Segerike: “meqathatso.”
^ Ka Segerike: “tente ya bopaki.”
^ Sheba Ntlha ya A5.
^ Kapa: “ekileng.”
^ Kapa: “ba hlabeha.”
^ Ka Segerike: “moya.”
^ Sheba Ntlha ya A5.
