Dipesaleme 104:1-35
104 Ke tla rorisa Jehova.+
Jehova Modimo wa ka, o moholo haholo.+
O apere kganya* le ho hlompheha.+
2 O apere lesedi+ jwalo ka ha eka ke seaparo.
O otlolla mahodimo jwalo ka lesela la tente.+
3 O haha dikamore tsa hae tse ka hodimo hodima maru.*+
O etsa maru koloi ya hae ya ntwa,+O tsamaya ka mapheo a moya.+
4 O etsa hore mangeloi a hae a be matla.*O etsa hore basebeletsi ba hae e be mollo o timetsang.+
5 O tiisitse lefatshe metheong ya lona.+
Le ka mohla le ke ke la suthiswa sebakeng sa lona* ka ho sa feleng.+
6 O le kwahetse ka metsi a tebileng jwalo ka ha eka ke ka seaparo.+
Metsi ao a ile a kwahela dithaba.
7 A ile a baleha ha o a kgalemela.+
A baleha a tshohile ha a utlwa modumo wa seaduma sa hao,
8 A ya sebakeng sa ona seo o se lokisitseng.
Dithaba tsa nyoloha+ mme dikgohlo tsa theoha.
9 O ile wa behela metsi ao moedi hore a se ke a o tlola+Hore a se ke a hlola a kwahela lefatshe.
10 O romela didiba dikgohlong.*
Di phalla hara dithaba.
11 Dibata tsohle tsa naha di fumana metsi ho tsonaLe ditonki tsa naha tse nyorilweng di nwa metsi ho tsona.
12 Dinonyana di haha dihlaha tsa tsona difateng tse haufi le metsi ao.
Di bina di le hara makgasi a teteaneng.
13 O nosetsa dithaba a le dikamoreng tsa hae tse hodimo.+
Lefatshe le tletse ditholwana tsa mesebetsi ya hao.+
14 O medisetsa dikgomo jwang,O medisetsa le batho dijalo hore di ba tswele molemo+Ho lema dijo lefatsheng:
15 Veine e thabisang pelo ya motho,+Oli e etsang hore sefahleho se be borelediLe bohobe bo etsang hore motho a be matla.+
16 Difate tsa Jehova di noseditswe hantle,Difate tsa kedare tsa Lebanone tseo a di lemmeng,
17 Moo dinonyana di etsang dihlaha.
Mokotatsie+ o dula difateng tsa junipere.
18 Dipodi tsa thaba di dula dithabeng tse phahameng.+
Dipela di balehela mafikeng.+
19 O entse hore kgwedi e tshwaye dinako tsa selemo.
Letsatsi le tseba hantle hore na le dikela neng.+
20 O etsa hore ho be lefifi mme eba bosiu+E leng nako eo diphoofolo tse hlaha tse dulang morung di sollang ka yona.
21 Ditawana di a puruma ha di ntse di tsoma,+Di batla dijo tsa tsona ho Modimo.+
22 Ha letsatsi le tjhaba,Di a kgutla ebe di botha moo di dulang teng.
23 Motho o ya mosebetsingEbe o sebetsa ho fihlela bosiu.
24 Jehova, dintho tseo o di entseng di ngata haholo.+
Kaofela ha tsona o di entse ka bohlale.+
Lefatshe le tletse dintho tseo o di entseng.
25 Lewatle le leholo ebile le pharaletse,Le tletse dintho tse ngata tse phelang, tse kgolo le tse nyenyane.+
26 Dikepe di tsamaya ho lonaLe Leviathane*+ eo o e etseditseng hore e bapalle ka hara lona.
27 Kaofela ha tsona di a o emelaHore o di fe dijo ka nako ya tsona.+
28 Di ja dintho tseo o di fang tsona.+
Di thabela dintho tse molemo tseo o di fang tsona.*+
29 Ha o di furalla, di a kgathatseha.
Ha o nka matla a tsona a bophelo,* di a shwa ebe di kgutlela leroleng.+
30 Ha o romela moya wa hao o halalelang, di a boptjwa.+
O ntjhafatsa lefatshe.
31 Kganya ya Jehova e tla dula e le teng.
Jehova o tla thabela mesebetsi ya hae.+
32 O sheba lefatshe ebe le a thothomela.
O ama dithaba ebe di kubella mosi.+
33 Ke tla binela Jehova+ bophelo bohle ba ka.
Ke tla binela Modimo wa ka dithoriso ha feela ke ntse ke phela.+
34 Dintho tseo ke di nahanang di ke di mo kgahlise.*
Ke tla thaba ka lebaka la Jehova.
35 Baetsadibe ba tla fediswa lefatsheng,Ba kgopo ha ba sa tla hlola ba eba teng.+
Ke tla rorisa Jehova. Rorisang Jah!*
Dintlha tse qetellong ya sehloho
^ Kapa: “seriti.”
^ Ka Seheberu: “ka metsing.”
^ Ka Seheberu: “meya e matla.”
^ Kapa: “la sisinngwa.”
^ Kapa: “diphuleng.”
^ Ka Seheberu: “ha o bula seatla sa hao.”
^ Kapa mohlomong: “Dintho tseo ke di nahanisisang ka yena e ke e be tse kgahlisang.”
^ Kapa: “Halelujah!” “Jah” ke kgutsufatso ya lebitso Jehova.
