Habakuke 3:1-19
3 Ena ke thapelo ya moprofeta Habakuke, ke kodiyamalla:*
2 Jehova, ke utlwile ka diketso tsa hao.
Ke tsota mesebetsi ya hao Jehova.
E se eka o ka e phetha mehleng ena ya rona,*Wa e tsebahatsa mehleng ya rona.
E se eka o ka re hopola yaba o a re hauhela nakong ya pherekano.+
3 Modimo o tlile a tswa Temane,Ya Halalelang o tlile a tswa Thabeng ya Parane.+ (Selah)*Kganya ya hae e ile ya kwahela mahodimo,+Lefatshe la tlala batho ba mo rorisang.
4 Kganya ya hae e ne eka ya letsatsi.+
Ho ne ho ena le mahlasedi a tswang letsohong la haeMoo matla a hae a neng a le hona teng.
5 Lefu la sewa le ne le mo eteletse pele,+Feberu e matla yona e mo sala morao.
6 A ema tlekelele! yaba o sisinya lefatshe.+
O ile a sheba ditjhaba yaba di a thothomela.+
Dithaba tseo esale di le teng tsa heleha,Maralla ona a wa.+
O tsamaya ditseleng tsa hae tsa kgale.
7 Ke ile ka bona mathata ka ditenteng tsa Kushane.
Ditente tsa naha ya Midiane di ile tsa tsukutleha.+
8 Jehova, na o halefetse dinoka?
Na o tuka ke bohale ka lebaka la tsona?
Kapa na o halefetse lewatle?+
O ile wa palama dipere tsa hao,+Dikariki tsa hao di ile tsa hlola.*+
9 O ntshitse seqha sa hao mme o se tjhehile.
Melamu* e fuwe mosebetsi.* (Selah)O arotse lefatshe ka dinoka.
10 Dithaba tsa o bona yaba di a reketla ke bohloko.+
Metsi a pula ya ditlwebelele a phorosela.
Bodiba ba rora,+Ba akgoletsa maqhubu a bona hodimo.
11 Letsatsi le kgwedi tsa ema tsi! hodimo mahodimong.+
Metsu ya hao ya tswa e le jwalo ka kganya,+Lerumo la hao le ne le benya jwalo ka lehadima.
12 O ile wa pholletsa le lefatshe o halefile,Wa hatakela* ditjhaba o tuka ke bohale.
13 Wa tsamaya hore o yo pholosa batho ba hao le motlotsuwa wa hao.
Wa thuhakanya moetapele* wa ntlo ya ba kgopo.
E ile ya timetswa ho tloha motheong ho ya tswa marulelong.* (Selah.)
14 O ile wa hlaba dihlooho tsa masole a hae ka dihlomo tsa hae*Ha a ne a mphutuhela hore a nqhalakanye.
A ne a thabetse ho bolaya motho ya mathateng ka lekunutu.
15 O ile wa feta hara lewatle ka dipere tsa hao,Wa phunyeletsa hara maqhubu a lona.
16 Eitse ha ke utlwa dintho tsena, ka tlala tshabo.
Molomo wa ka wa thothomela ha ke utlwa molaetsa.
Ka fellwa ke matla,*+Ka tsherema mangole.
Empa ke tla emela letsatsi la mahlomola ke kgobile matshwafo,+Etswe le tla tlela batho ba re hlaselang.
17 Le ha sefate sa feie* se ke ke sa thunyaLe difate tsa morara tsa se ke tsa beha ditholwana,Le ha sefate sa mohlwaare se ke ke sa behaLe masimo a ke ke a hlahisa dijo,Le ha mehlape e ka ba siyo sakengLe dikgomo tsa ba siyo masakeng,
18 Ha e le nna, ke tla thaba ha ke nahana ka Jehova,Ke nyakalle ha ke nahana ka Modimo ya mpholosang.+
19 Jehova Mmusi wa Dintho Tsohle o mpha matla.+
O tla etsa hore ke be lebelo jwalo ka kgama,A ntsamaise dibakeng tse phahameng.+
Dintlha tse qetellong ya sehloho
^ Kapa: “pina e binwang ka lebaka la ho utlwa bohloko.”
^ Ka Seheberu: “bohareng ba dilemo.”
^ Kapa: “pholosa.”
^ Kapa mohlomong: “Metsu.”
^ Kapa mohlomong: “dikano tsa meloko di boletswe.”
^ Ka Seheberu: “pola.”
^ Ka Seheberu: “hlooho.”
^ Ka Seheberu: “molaleng.”
^ Ka Seheberu: “melamu ya hae.”
^ Ka Seheberu: “Masapo a ka a bola.”
^ Kapa: “feiga.”
