Hosea 1:1-11
1 Jehova a bua le Hosea* mora wa Beri mehleng ya Uzia,+ Jothame,+ Akaze+ le Ezekiase+ e leng marena a Juda+ le mehleng ya Jeroboame+ mora wa Joashe,+ morena wa Iseraele.
2 Ha Jehova a qala ho bua a sebedisa Hosea, Jehova o ile a re ho yena: “Tsamaya o yo nyala mosadi eo e tla ba letekatse* le ya tla o tswalla bana ka lebaka la botekatse* ba hae hobane ka tsela e tshwanang, batho ba naha ena ba entse botekatse mme ba tlohetse ho sebeletsa Jehova.”+
3 Hosea a nyala Gomere moradi wa Diblaime. A ima yaba o mo tswalla mora.
4 Jehova a re ho Hosea: “Mo rehe Jezriele* hobane ka mora nakwana e seng kae ke tla etsa hore ba lelapa la Jehu+ ba ikarabelle ka lebaka la ho bolawa ha batho ba Jezriele ebile ke tla fedisa mmuso wa Iseraele.+
5 Letsatsing leo ke tla roba seqha sa Iseraele Kgohlong* ya Jezriele.”
6 A ima hape yaba o tswala moradi. Modimo a re ho Hosea: “Mo rehe Lo-ruhama* ka ha ha ke sa tla hlola ke hauhela+ Baiseraele* empa ke tla ba leleka.+
7 Empa ke tla hauhela setjhaba* sa Juda+ mme nna Jehova Modimo wa bona ke tla ba pholosa.+ Nke ke ka ba pholosa ka seqha, ka sabole, ka ntwa, ka dipere kapa ka bapalami ba dipere.”+
8 Ka mora ho kgwesa* Lo-ruhama, Gomere a ima mme a tswala mora.
9 Modimo a re: “Mo rehe Lo-ami* hobane ha le setjhaba sa ka ebile nke ke ka ba Modimo wa lona.
10 Baiseraele* ba tla ba bangata jwalo ka lehlabathe la lewatle le ke keng la lekanngwa kapa la balwa.+ Sebakeng seo ho sona ho ileng ha thwe ho bona, ‘Ha le setjhaba sa ka,’+ ho tla thwe ho bona, ‘Le bana ba Modimo ya phelang.’+
11 Batho ba Juda le ba Iseraele ba tla bokana ba be mmoho.+ Ba tla ikgethela moetapele mme ba tswe naheng hobane letsatsi la Jezriele+ le tla ba leholo.”
Dintlha tse qetellong ya sehloho
^ Ke kgutsufatso ya Hoshaia e bolelang “Ho Pholoswa ke Jah; Jah o Pholositse.”
^ Kapa: “boitshwaro bo bobe ba thobalano.”
^ Kapa: “ya tla etsa boitshwaro bo bobe ba thobalano.”
^ E bolelang “Modimo o Tla Jala Peo.”
^ Kapa: “Phuleng.”
^ Ka Seheberu: “ntlo ya Iseraele.”
^ E bolelang “Ha a Hauhelwa.”
^ Ka Seheberu: “ntlo.”
^ E leng ha ngwana a tlohediswa ho nyanya.
^ E bolelang “Ha le Setjhaba sa Ka.”
^ Ka Seheberu: “Bara ba Iseraele.”
