Lengolo la Jakobo 2:1-26
2 Bana beso, ho tla jwang hore ebe le ntse le kgetholla batho ba bang le ha le se le ena le tumelo ho Morena wa rona Jesu Kreste ya phahamisitsweng?+
2 Ha motho ya rwetseng direng tsa kgauta, ya apereng diaparo tse ntle haholo a tla sebakeng seo le kopanetseng ho sona ebe hape ho tla mofutsana ya apereng diaparo tse ditshila,
3 na le tla re ho ya apereng diaparo tse ntle, “Dula mona setulong se setle,” ebe le re ho ya futsanehileng, “Wena o nne o eme jwalo” kapa “Dula fatshe pela maoto a ka”?+
4 Na ha le etsa jwalo ha le kgethollane+ ebile na ha le fetohe baahlodi ba etsang diqeto tse kgopo?+
5 Mamelang bana beso bao ke ba ratang. Modimo o kgethile batho bao lefatshe le ba nkang ba futsanehile hore e be barui tumelong+ le hore e be majalefa a Mmuso wa hae oo a o tshepisitseng batho ba mo ratang.+
6 Le tlotlolotse bafutsana. Na barui ha se bona ba le hatellang+ le ba le isang makgotleng?
7 Na ha se bona ba nyefolang lebitso le hlomphehang leo le bitswang ka lona?
8 Haeba le mamela molao o moholo wa Morena o reng, “O rate moahisani wa hao jwalo ka ha o ithata,”+ le etsa hantle.
9 Haeba le tswela pele ho kgetholla batho ba bang,+ le etsa sebe, le molao o a paka hore le molato.*+
10 Ha motho a mamela Molao wohle empa a tlola taelo e le nngwe feela, o tlotse Molao wohle.+
11 Ya behileng molao o reng, “O se ke wa feba,”+ o ile a boela a re, “O se ke wa bolaya.”+ Le haeba o sa febe empa o bolaya, o tlola molao.
12 Le dule le bua le ho etsa dintho jwalo ka batho ba tlo ahlolwa ka molao o fang batho bolokolohi.+
13 Motho ya se nang mohau a ke ke a hauhelwa ha a ahlolwa.+ Mohau o moholo ho feta kahlolo.
14 Bana beso, ho thusang hore motho a re o na le tumelo empa a sa e bontshe ka diketso?+ Na tumelo e jwalo e ka mo pholosa?+
15 Haeba ho ena le bana ba bo lona ba se nang diaparo kapa letsatsi le leng le le leng ba se na dijo tse lekaneng
16 ebe e mong wa lona o re ho bona, “Tsamayang ka kgotso le futhumale mme le kgore,” ho thusang haeba a sa ba fe dintho tseo ba di hlokang?+
17 Ho a tshwana le ka tumelo, ha e sa bontshwe ka diketso e shwele.+
18 Le ha ho le jwalo, motho e mong o tla re: “O na le tumelo, nna ke na le mesebetsi. Mpontshe tumelo ya hao e se nang mesebetsi, nna ke tla o bontsha tumelo ya ka ka mesebetsi ya ka.”
19 O a dumela hore ho na le Modimo a le mong akere? O etsa hantle. Empa le bademona ba a dumela hore ho jwalo ebile ba a mo tshaba.+
20 Wena motho ya se nang kelello, na ha o tsebe hore tumelo e se nang mesebetsi ha e na thuso?
21 Ntate wa rona Abrahama o ile a nkwa a lokile ka lebaka la mesebetsi ya hae, ka mora hore a behe mora wa hae Isaka aletareng.+
22 O ile a bontsha ka diketso hore o na le tumelo, diketso tsa hae di ile tsa bontsha hore tumelo ya hae ke ya nnete.+
23 Lengolo le ile la phethahala le reng: “Abrahama o ile a bontsha tumelo ho Jehova* mme o ile a nkwa e le motho ya lokileng”+ yaba o bitswa “motswalle wa Jehova.”*+
24 Ka hoo, motho o nkwa a lokile ka lebaka la diketso tsa hae eseng ka lebaka la tumelo feela.
25 Rahaba wa letekatse le yena o ile a nkwa a lokile ka lebaka la diketso tsa hae ka mora hore a amohele baromuwa ha hae le ho ba thusa hore ba balehe.+
26 Feela jwalo ka ha mmele o se nang moya* o shwele,+ le tumelo e se nang mesebetsi e shwele.+
Dintlha tse qetellong ya sehloho
^ Kapa: “o a le kgalemela.”
^ Sheba Ntlha ya A5.
^ Sheba Ntlha ya A5.
^ Kapa: “phefumoloho.”
