Lengolo la Jakobo 4:1-17
4 Dintwa le diqabang tse hara lona di bakwa keng? Na ha di bakwe ke ditakatso tsa lona tse fosahetseng tse lwantshanang le ditakatso tse ntle tseo le nang le tsona?+
2 Le a lakatsa empa ha le fumane. Le dula le hloyana* le ho kgalla dintho tsa batho ba bang, le ha ho le jwalo ha le di fumane. Le dula le lwana le ho qabana.+ Ha le na letho hobane ha le kope.
3 Le ha le kopa ntho, ha le e fumane hobane le e kopela morero o fosahetseng e le hore le ka e sebedisa ho kgotsofatsa ditakatso tsa lona tse fosahetseng.
4 Lona ba sa tshepahaleng,* na ha le tsebe hore ho etsa setswalle le lefatshe ho etsa hore le be dira tsa Modimo? Ka hona, mang kapa mang ya batlang ho ba motswalle wa lefatshe, o iketsa sera sa Modimo.+
5 Lengolo le leng le re: “Ka ha re tlwaetse ho ba mona, re dula re kgalla dintho tse fapaneng.”+ Na le nahana hore le bua jwalo ho se na mabaka?
6 Empa mosa* oo Modimo a re bontshang wona o re thusa ho hlola mona oo. Ke ka lebaka leo lengolo le leng le reng: “Modimo o hanyetsa ba ikgohomosang+ empa o mosa ho ba ikokobeditseng.”+
7 Ka hona, le ikokobeletse Modimo+ empa le hanyetse Diabolose+ mme o tla le baleha.+
8 Atamelang ho Modimo mme o tla atamela ho lona.+ Tlohelang ho etsa dintho tse mpe* lona baetsadibe.+ Hlwekisang dipelo tsa lona,+ lona ba hlolehang ho etsa qeto.
9 Le tlameha le utlwe bohloko haholo le be le lle.+ Ditsheho tsa lona di fetohe dillo mme thabo ya lona e fetohe maswabi.
10 Ikokobetseng ka pela Jehova*+ mme o tla le phahamisa.+
11 Bana beso, tlohelang ho buana hampe.+ Ya buang ngwanabo hampe kapa ya mo ahlolang, o bua dintho tse mpe ka molao* ebile o a o ahlola. Ha o ahlola molao, o moahlodi mme ha o sa phetha molao.
12 Ke Modimo feela ya fanang ka molao le ya ahlolang.+ Ke yena ya kgonang ho pholosa le ho bolaya.+ Jwale wena o mang hore o ahlole moahisani wa hao?+
13 Mamelang lona ba reng: “Letsatsing lena kapa hosane re tla ya motseng o mong, re yo qeta selemo teng mme re tla qala kgwebo e le hore re be le tjhelete,”+
14 ha le tsebe hore na bophelo ba lona bo tla ba jwang hosane.+ Le mohodi o hlahang ka nako e kgutshwanyane ebe o a nyamela.+
15 Ho ena le ho bua jwalo, le lokela ho re: “Haeba Jehova* a rata,+ re tla phela ebe re etsa hona kapa hwane.”
16 Le ha ho le jwalo, le a ikgohomosa ebile le a ithorisa. Dintho tseo le ithorisang ka tsona di mpe.
17 Ka hoo, haeba motho a tseba ntho e nepahetseng empa a sa e etse, o etsa sebe.+
Dintlha tse qetellong ya sehloho
^ Ka Segerike: “bolayana.”
^ Ka Segerike: “Basadi ba bafebi.”
^ Ka Segerike: “Hlwekisang matsoho a lona.”
^ Sheba Ntlha ya A5.
^ Mona ho bonahala eka ho buuwa ka molao wa Modimo ka kakaretso.
^ Sheba Ntlha ya A5.
