Lengolo la Jakobo 5:1-20
5 Mamelang lona barui, llang le bokolle ka lebaka la dintho tse bohloko tse tla le tlela.+
2 Maruo a lona a bodile mme diaparo tsa lona di jewe ke tshwele.*+
3 Kgauta ya lona le silevera di rusitse. Rusi ya tsona e tla ba bopaki ba hore le molato mme e tla le ja. Dintho tseo le di bolokileng di tla ba jwalo ka mollo matsatsing a ho qetela.+
4 Basebetsi ba kotutseng masimo a lona ba a lla hobane ha le ba patale mme Jehova* wa mabotho o utlwile sello sa bona ha ba kopa thuso.+
5 Le dutse mabothobothong hape le inehella menate ya lefatshe. Dipelo tsa lona di tshwana le diphoofolo tse nontshetswang letsatsi la ho hlajwa.+
6 Le ahlotse le ho bolaya ya lokileng. Na ha a* le hanyetse?
7 Bana beso, mamellang ho fihlela Morena a eba teng.+ Motho ya lemang, o dula a letetse hore ditholwana tsa hae tse ntle di hlahe masimong. O a mamella ho fihlela ho na pula ya selemo le ya hwetla.+
8 Le lona le be le mamello,+ le tiise dipelo tsa lona hobane Morena o haufi le ho ba teng.+
9 Bana beso, e mong a se ke a tletleba ka e mong e le hore le se ke la ahlolwa.+ Moahlodi o tla ahlola haufinyane.*
10 Bana beso, latelang mohlala wa baprofeta ba neng ba bua lebitsong la Jehova.*+ Ba ile ba utlwiswa bohloko ka ditsela tse ngata+ empa ba ile ba mamella.+
11 Re nka batho ba mameletseng mathata ba thabile.*+ Le utlwile hore Jobo+ o ile a mamella mme ka lebaka la seo Jehova* a mo etseditseng sona,+ re ithutile hore Jehova* o lerato* hape o mohau.+
12 Ka hodima dintho tsohle bana beso, le kgaotse ho ikana ka eng kapa eng e lehodimong, e lefatsheng kapa ka ntho le ha e le efe. Haeba ho ena le ntho eo le itseng le tla e etsa, le e etse. Hape haeba ho ena le ntho eo le itseng le ke ke la e etsa, le se ke la e etsa+ e le hore Modimo a se ke a le ahlola.
13 Haeba ho ena le ya nang le mathata hara lona, a ke a dule a rapela.+ Haeba ho ena le ya thabileng, a ke a binele Modimo dipina tsa thoriso.*+
14 Haeba ho ena le ya kulang* hara lona, a ke a bitse baholo+ ba phutheho mme ba tla mo rapella ba be ba mo tlotse ka oli+ ka lebitso la Jehova.*
15 Thapelo e etswang ka tumelo e tla etsa hore ya kulang a fole. Jehova* o tla mo thusa hore a be matla hape. Haeba a entse dibe, o tla tshwarelwa.
16 Ka hoo, le bolellane dibe tsa lona+ mme le rapellane e le hore le ka fodiswa. Thapedi ya motho ya lokileng e matla haholo.+
17 Elia e ne e le motho jwalo ka rona. Le ha ho le jwalo, ha a ne a rapela ka matla a kopa hore pula e se ke ya na, ha e a ka ya na ka dilemo tse tharo le dikgwedi tse tsheletseng.+
18 O ile a rapela hape, pula ya na yaba naha e beha ditholwana.+
19 Haeba e mong hara lona a kgeloswa tumelong ya nnete mme e mong a mo kgutlisetsa ho yona,
20 le tsebe hore ya thusang motho ya entseng sebe ho tlohela dintho tse mpe tseo a di entseng,+ o tla pholosa bophelo ba motho eo mme Modimo o tla tshwarela dibe tsa hae tse ngata.+
Dintlha tse qetellong ya sehloho
^ Kapa: “mmoto.”
^ Sheba Ntlha ya A5.
^ E ka nna yaba ho buuwa ka Modimo kapa Jesu ha a se a tsositswe bafung.
^ Ka Segerike: “o se a le monyako.”
^ Sheba Ntlha ya A5.
^ Kapa: “o na le kutlwelobohloko.”
^ Sheba Ntlha ya A5.
^ Sheba Ntlha ya A5.
^ Kapa: “ba hlohonolofetse.”
^ Ka Segerike: “dipesaleme.”
^ Sheba Ntlha ya A5.
^ Mona ho bolelwa motho eo tumelo ya hae e seng e fokola.
^ Sheba Ntlha ya A5.
