Jeremia 28:1-17
-
Jeremia le Hanania moprofeta wa bohata (1-17)
28 Selemong sona seo, qalong ya puso ya Morena Tsedekia+ wa Juda, ka selemo sa bone kgweding ya bohlano, moprofeta Hanania mora wa Azure, ya tswang Gibeone+ a re ho Jeremia ka tlung ya Jehova ka pela baprista le setjhaba sohle:
2 “Jehova wa mabotho, Modimo wa Iseraele o re: ‘Ke tla roba joko ya morena wa Babilona.+
3 Pele dilemo tse pedi di fela, ke tla kgutlisetsa disebediswa tsohle tsa ntlo ya Jehova mona, disebediswa tseo Morena Nebukadnezare wa Babilona a di nkileng mona a di isa Babilona.+
4 Ke tla lata Jekonia+ mora wa Jojakime,+ morena wa Juda le Bajuda bohle ba hapuweng ba ileng Babilona,+ ke ba kgutlisetse mona hobane ke tla roba joko ya morena wa Babilona,’ ke Jehova ya tjhong.”
5 Yaba moprofeta Jeremia o bua le moprofeta Hanania ka pela baprista le setjhaba sohle se neng se eme ka tlung ya Jehova.
6 Moprofeta Jeremia a re: “Amen!* E se eka Jehova a ka etsa jwalo! E se eka Jehova a ka phethahatsa mantswe a hao ao o a profetileng ka hore a late disebediswa tsa ntlo ya Jehova Babilona. A late le batho bohle ba hapuweng ba isitsweng moo a ba kgutlisetse mona.
7 Le ha ho le jwalo, ka kopo, utlwa molaetsa ona oo ke o fetisang moo o ntseng o utlwa le moo setjhaba sohle se ntseng se utlwa.
8 Mehleng ya kgale, baprofeta ba tlileng pele ho nna le wena ba ne ba tlwaetse ho profeta ka dinaha tse ngata le mebuso e meholo, ba profeta ntwa, tlokotsi le lefu la sewa.
9 Haeba moprofeta a profeta kgotso mme lentswe la hae le phethahala, ho tla tsebahala hore o fela a rometswe ke Jehova.”
10 Yaba moprofeta Hanania o tlosa joko molaleng wa Jeremia mme o a e roba.+
11 Moprofeta Hanania a re ka pela setjhaba sohle: “Jehova o re: ‘Joko eo Nebukadnezare morena wa Babilona a e behileng molaleng wa ditjhaba tsohle, ke tla e roba ka tsela ena, pele dilemo tse pedi di fela.’”+ Yaba moprofeta Jeremia o a itsamaela.
12 Ka mora hore moprofeta Hanania a robe joko molaleng wa moprofeta Jeremia, Jehova a fa Jeremia molaetsa ona o reng:
13 “E ya, o re ho Hanania: ‘Jehova o re: “O robile dijoko tsa lepolanka+ empa sebakeng sa tsona o tla etsa dijoko tsa tshepe.”
14 Etswe Jehova wa mabotho, Modimo wa Iseraele o re: “Ke tla beha joko ya tshepe melaleng ya ditjhaba tsena tsohle hore di sebeletse Morena Nebukadnezare wa Babilona mme di tla mo sebeletsa.+ Ke tla mo fa esita le dibata tsa naha.”’”+
15 Moprofeta Jeremia a re ho moprofeta Hanania:+ “Ke kopa o mamele wena Hanania! Jehova ha a o roma empa o entse hore setjhaba sena se dumele leshano.+
16 Ka hona, Jehova o re: ‘Bona, ke tla o fedisa lefatsheng. O tla shwa selemong sena hobane o kgothaleditse batho hore ba fetohele Jehova.’”+
17 Ka hoo, moprofeta Hanania a shwa selemong seo, ka kgwedi ya bosupa.
Dintlha tse qetellong ya sehloho
^ Kapa: “Ha ho be jwalo.”
