Jeremia 31:1-40
31 Jehova o re: “Ka nako eo, ke tla ba Modimo wa malapa ohle a Iseraele mme ona e tla ba setjhaba sa ka.”+
2 Jehova o re:
“Batho ba phonyohileng sabole ba ile ba hauhelwa ke Modimo lefeelleng.
Baiseraele ba ya moo ba tla fumana phomolo.”
3 Jehova a hlaha ho nna a le hole a re:
“Ke o ratile ka lerato le sa feleng.
Ke ka lebaka la lerato lena ke ileng ka o tshepahalla le ho o hulela ho nna.+
4 Ke tla boela ke o hahe mme o tla ba setjhaba hape.+
Wena morwetsana wa Iseraele, o tla boela o nke meropa ya hao e menyenyaneO tjeke o thabile.*+
5 O tla boela o leme dirapa tsa morara dithabeng tsa Samaria.+
Balemi ba tla lema mme ba je ditholwana.+
6 Ho tla tla letsatsi leo balebedi dithabeng tsa Efraime ba tla hweletsa ba re:
‘Emang, re nyoloheleng Sione ho Jehova Modimo wa rona.’”+
7 Etswe Jehova o re:
“Binelang Jakobo le thabile,Hweletsang le thabile hobane le phahametse ditjhaba.+
Phatlalatsang molaetsa, le rorise Modimo le re:
‘Jehova, pholosa setjhaba sa hao, Baiseraele ba setseng.’+
8 Ke tla ba lata ho tswa naheng ya leboya.+
Ke tla ba bokella ho tswa dibakeng tse holehole tsa lefatshe.+
Hara bona ho tla ba le difofu le ba holofetseng,+Mosadi wa moimana le ya pepang, kaofela ha bona.
Ba tla kgutlela mona e le phutheho e kgolo.+
9 Ba tla kgutla ba ntse ba lla.+
Ke tla ba etella pele ba ntse ba kopa mohau.
Ke tla ba tataisetsa melatswaneng,+Tseleng e pharaletseng moo ba ke keng ba kgoptjwa.
Ke nna Ntate wa Iseraele, Efraime ke letsibolo la ka.”+
10 Utlwang lentswe la Jehova, lona ditjhaba,Le le phatlalatse hara dihlekehleke tse hole le re:+
“Ya hasantseng Iseraele o tla mo bokella,O tla mo disa jwalo ka ha modisa a disa mohlape wa hae.+
11 Jehova o tla lopolla Jakobo,+A mo pholose* letsohong la ya matla ho mo feta.+
12 Ba* tla tla, ba hweletse ka thabo hodima thaba ya Sione,+Ba tlale thabo ka lebaka la melemo e tswang ho Jehova,Ka lebaka la dijo,* veine e ntjha,+ oli,Dikonyana, dipotsanyane le manamane.+
Ba tla ba jwalo ka serapa se nosetswang hantle,+Ha ba sa tla hlola ba omella hape.”+
13 “Ka nako eo, morwetsana o tla tjeka a thabileHa mmoho le bahlankana le bo ntatemoholo.+
Ke tla fetola maswabi a bona thabo e kgaphatsehang,+Ke tla ba tshedisa, ke etse hore ba thabe ho ena le ho sarelwa.+
14 Ke tla kgotsofatsa baprista ka dijo tse ngata.*
Setjhaba sa ka se tla kgotsofatswa ke melemo e tswang ho nna,”+ ke Jehova ya tjhong.
15 “Jehova o re:
‘Lentswe le utlwahala Rama,+ seboko le sello se bohloko.
Ragele o llela bana ba hae.+
O hanne ho tshedisehaHobane bara ba hae ha ba sa le yo.’”+
16 Jehova o re:
“‘Thola o se ke wa lla le mahlo a hao a se ke a tswa meokgoHobane ho na le moputso bakeng sa mosebetsi wa hao,’ ke Jehova ya tjhong.
‘Bara ba hao ba tla kgutla naheng ya sera.’+
17 ‘Tshepo e teng bakeng sa hao,’+ ke Jehova ya tjhong.
‘Bara ba hao ba tla kgutlela habo bona.’”+
18 “Ruri ke utlwile sello sa Efraime ha a re:
‘Ke ne ke le jwalo ka pohwana e sa kwetliswang,O nkgalemetse, ka kgalemeleha.
Nkgutlisetse tseleng mme hanghang ke tla kgutlaKa ha o Jehova Modimo wa ka.
19 Ke ile ka ikwahlaya yaba ke a kgutla,+Ka mora hore o etse hore ke utlwisise, ke ile ka utlwa bohloko haholo.*
Ke ile ka hlajwa ke dihlong, ka swaba+Ka lebaka la dintho tseo ke di entseng ha ke sa le motjha.’”
20 Jehova o re: “Na Efraime ha se mora wa ka wa bohlokwa, ngwana eo ke mo ratang?+
Le hoja ke mo kgalemetse ka makgetlo a mangata, ke ntse ke mo hopola.
Ke ka hoo ke mo hlolohetsweng.*+
Ruri ke tla mo hauhela.+
21 Itlhomele matshwao a tsela,O behe matshwao.+
O ele hloko tsela e kgolo, tsela eo o lokelang ho tsamaya ka yona.+
Kgutla, wena morwetsana wa Iseraele, o kgutlele metseng ena ya hao.
22 Wena moradi ya sa tshepahaleng, o tla nne o ye kwana le kwana ho fihlela neng?
Jehova o entse ntho e ntjha lefatsheng:
Mosadi o tla batla monna.”
23 Jehova wa mabotho e leng Modimo wa Iseraele o re: “Nakong eo ke bokellang batho ba bona ba hapuweng, ba tla boela ba bue mantswe ana naheng ya Juda le metseng ya yona: ‘E se eka Jehova a ka o hlohonolofatsa, wena sebaka seo ba lokileng ba dulang ho sona,+ wena thaba e halalelang.’+
24 Juda le metse yohle ya yona e tla ba le baahi, dihwai le badisa ba tla dula teng.+
25 Etswe ke tla kgatholla motho ya kgathetseng mme ke kgorise e mong le e mong ya fokotseng ke tlala.”+
26 Yaba ke a phaphama ke bula mahlo, boroko ba ka bo ne bo nnatefetse.
27 Jehova o re: “Matsatsi a a tla ao ka ona ke tla atisa ba ntlo ya Iseraele le ba ntlo ya Juda. Ke tla atisa le diphoofolo tsa bona.”+
28 Jehova o re: “Feela jwalo ka ha ke ne ke itokiseditse ho ba fothola, ho ba ripitla, ho ba senya,+ ho ba ntsha kotsi le ho ba fedisa, ke tla itokisetsa ho ba haha le ho ba tsitsisa.+
29 Matsatsing ao, ha ba sa tla hlola ba re: ‘Bontate ba jele morara o bodila empa bara ke bona ba utlwang bodila boo.’+
30 Empa motho le ha e le ofe ya jang morara o bodila, ke yena ya tla utlwa bodila boo. Motho e mong le e mong o tla shwela phoso ya hae.”
31 Jehova o re: “Matsatsi a a tla ao ka ona ke tla etsa selekane se setjha le ba ntlo ya Iseraele le ba ntlo ya Juda.”+
32 Hape Jehova o re: “Se ke ke sa tshwana le selekane seo ke ileng ka se etsa le baholoholo ba bona letsatsing leo ke neng ke ba tshwere ka letsoho ho ba ntsha naheng ya Egepeta+ ‘e leng selekane sa ka seo ba ileng ba se fetohela,+ le hoja ke ne ke le monga bona.’”*
33 Jehova o re: “Selekane seo ke tla se etsa le ba ntlo ya Iseraele ka mora matsatsi ao ke sena: Ke tla kenya molao wa ka ka hara bona,+ ke o ngole dipelong tsa bona.+ Ke tla ba Modimo wa bona mme bona e tla ba batho ba ka.”+
34 Jehova o re: “Ba ke ke ba hlola ba ruta baahisani ba bona le bana ba bo bona ba re: ‘Tsebang Jehova’+ hobane kaofela ba tla ntseba, ho tloha ho mofutsana ho ya ho morui.+ Ke tla tshwarela diphoso tsa bona mme ha ke sa tla hlola ke hopola dibe tsa bona.”+
35 Ana ke mantswe a Jehova,Ya fanang ka letsatsi bakeng sa ho kgantsha motshehareLe ka melao ya kgwedi le dinaledi bakeng sa ho kgantsha bosiu,Ya fuduhang lewatle le ya etsang hore maqhubu a lona a lwebehlane,Eo lebitso la hae e leng Jehova wa mabotho. O re:+
36 Jehova o re: “‘Melao ena e tla hloleha ho sebetsaMohla bana ba Iseraele ba kgaotsang ho ba setjhaba ka pela ka.’”+
37 Jehova o re: “‘Feela jwalo ka ha mahodimo a ke ke a methwa le metheo ya lefatshe e ke ke ya tsejwa hantle, nke ke ka lahla bana bohle ba Iseraele ho sa tsotellehe dintho tsohle tseo ba di entseng,’ ke Jehova ya tjhong.”+
38 Jehova o re: “Matsatsi a a tla ao ka ona Jehova a tla hahelwa motse+ ho tloha Toreng ya Hananiele+ ho ya Keiting e Khoneng.+
39 Kgwele e methang+ e tla toba pele ho ya leralleng la Garebe ebe e tjekela Gowa.
40 Kgohlo* eo ho lahlelwang ditopo le molora* ho yona le masimo ohle ho ya fihla Kgohlong ya Kidrone+ le ho ya fihla sekgutlong sa Keiti ya Dipere+ ho elella botjhabela, e tla ba ntho e halalelang ho Jehova.+ E ke ke ya fediswa kapa ya senngwa hape le ka mohla.”
Dintlha tse qetellong ya sehloho
^ Kapa: “O tjeke le ba tshehang.”
^ Kapa: “lopolle.”
^ E leng Baiseraele.
^ Ka Seheberu: “monono.”
^ Kapa: “otla serope sa ka.”
^ Ka Seheberu: “mala a ka a dubehileng ka lebaka la hae.”
^ Kapa mohlomong: “monna wa bona.”
^ Kapa: “Phula.”
^ Kapa: “molora o mafura,” e leng molora o tshetsweng ke mafura a mahlabelo.
