Levitike 3:1-17
3 Haeba nyehelo ya hae e le sehlabelo se kopanetsweng*+ mme e tswa mohlapeng wa dikgomo, ebang ke e tona kapa ke e tshehadi, a hlahise phoofolo e phetseng hantle ka pela Jehova.
2 A behe letsoho hloohong ya nyehelo ya hae mme e hlabelwe monyakong wa tente ya pokano. Bara ba Arone e leng baprista ba tla fafatsa madi a yona mahlakoreng ohle a aletare.
3 A hlahise ho Jehova karolo e nngwe ya sehlabelo se kopanetsweng e le nyehelo e tjheswang ka mollo+ e leng mafura+ a kwahelang mala, mafura ohle a potolohileng mala,
4 diphio tse pedi le mafura ohle a di potolohileng. A tlose le mafura a sebeteng le diphiong.+
5 Bara ba Arone ba etse hore e kubelle aletareng hodima nyehelo ya setjheso e hodima patsi e mollong.+ Ke nyehelo e tjhesetswang Jehova, e monko o monate.*+
6 Haeba nyehelo ya hae ya sehlabelo se kopanetsweng sa Jehova e tswa mohlapeng wa dinku le dipodi, a hlahise phoofolo e tona kapa e tshehadi e phetseng hantle.+
7 Haeba a fana ka ramo e nyenyane e le nyehelo ya hae, a e tlise ka pela Jehova.
8 A behe letsoho hloohong ya nyehelo ya hae mme e hlabelwe ka pela tente ya pokano. Bara ba Arone ba fafatse madi a yona mahlakoreng ohle a aletare.
9 A hlahise mafura a tswang sehlabelong se kopanetsweng e le nyehelo e tjhesetswang Jehova.+ A tlose mafura ohle a mohatleng a haufi le lesapo la mokokotlo, mafura a kwahelang mala, mafura ohle a potolohileng mala,
10 diphio tse pedi le mafura ohle a di potolohileng. A tlose le mafura a sebeteng le diphiong.+
11 Moprista a etse hore e kubelle aletareng e le dijo.* Ke nyehelo e tjhesetswang Jehova.+
12 Haeba nyehelo ya hae e le podi, a e hlahise ka pela Jehova.
13 A behe letsoho hloohong ya yona mme e hlabelwe ka pela tente ya pokano. Bara ba Arone ba fafatse madi a yona mahlakoreng ohle a aletare.
14 Karolo eo a e hlahisang e le nyehelo ya hae e tjhesetswang Jehova e be mafura a kwahelang mala, mafura ohle a potolohileng mala,+
15 diphio tse pedi le mafura a di potolohileng. A tlose le mafura a sebeteng le diphiong.
16 Moprista a etse hore di kubelle aletareng e le dijo.* Ke nyehelo e tjheswang e monko o monate.* Mafura ohle ke a Jehova.+
17 Ho hang le se ke la ja mafura kapa madi.+ Ena ke taelo e tla dula e le teng bakeng sa meloko ya lona, dibakeng tsohle tseo le dulang ho tsona.’”
Dintlha tse qetellong ya sehloho
^ Kapa: “sehlabelo sa ho etsa kgotso.”
^ Ka Seheberu: “kgathollang.”
^ Ka Seheberu: “bohobe,” e leng karolo ya sehlabelo se kopanetsweng e fuwang Modimo.
^ Ka Seheberu: “bohobe,” e leng karolo ya sehlabelo se kopanetsweng e fuwang Modimo.
^ Ka Seheberu: “kgathollang.”