Kosepele ya Luka 3:1-38
3 Ka selemo sa bo15 sa puso ya Tiberiuse Sesare, Ponse Pilato e ne e le mmusisi wa Judea. Heroda*+ e ne e le mmusi wa setereke wa Galilea, Filipi ngwanabo e le mmusi wa setereke wa naha ya Iturea le Trakonitise, Lisaniase yena e le mmusi wa setereke wa Abilene.
2 E ne e le mehleng ya Kaifase+ le moprista e moholo Anase. Ka nako eo, ha Johanne+ mora wa Zakaria a le lefeelleng,+ Modimo a bua le yena.
3 Johanne a ya metseng yohle e potolohileng Jordane, a bolella batho hore ba kolobetswe ho bontsha hore ba bakile e le hore ba tshwarelwe dibe+
4 jwalo ka ha ho ngotswe mantswe ana bukeng ya moprofeta Esaia: “Ho na le motho ya hweletsang lefeelleng a re: ‘Lokisang tsela ya Jehova,* otlollang ditsela tsa hae.+
5 Kgohlo e nngwe le e nngwe e katwe, thaba e nngwe le e nngwe le leralla di batalatswe, ditsela tse sa otlolohang di otlollwe le tse mpe di lokiswe
6 mme bohle ba tla bona tsela eo Modimo a tla pholosa batho ka yona.’”+
7 Ha letshwele le tla ho yena hore le tlo kolobetswa, a re ho lona: “Madinyane a dinoha tsa marabe, ke mang ya le hlokomedisitseng hore le balehe bohale bo tlang?+
8 Qalang pele ka hore le bontshe* hore le bakile. Le se ke la re Abrahama ke ntate wa lona hobane Modimo a ka mo hlahisetsa bana le ka majwe ana.
9 Ke a le bolella hore selepe se se se le metsong ya difate. Sefate se seng le se seng se sa beheng ditholwana tse ntle se tla rengwa mme se lahlelwe mollong.”+
10 Letshwele le ile la re ho yena: “Jwale re etseng?”
11 A re ho bona: “Motho ya nang le diaparo tse pedi* a arolelane le ya se nang letho, ya nang le dijo le yena a fe ya se nang tsona.”+
12 Le babokelli ba lekgetho ba ile ba tla hore ba kolobetswe+ yaba ba re ho yena: “Mosuwe, re etse jwang?”
13 A re ho bona: “Le se ke la patadisa batho ho feta ka moo le lokelang ho ba patadisa ka teng.”+
14 Masole le ona a ile a re: “Rona re etseng?” Yaba o re: “Le se ke la hlekefetsa mang kapa mang kapa la qosa motho ka diqoso tsa bohata+ empa le kgotsofalle moputso wa lona.”
15 Ka ha batho ba ne ba lebeletse Kreste, ba ne ba ipotsa hore na ebe Johanne ke yena Kreste.+
16 Johanne a re ho bona kaofela: “Nna ke le kolobetsa ka metsi empa ho na le ya matla ho mpheta ya tlang, eo ke sa tshwaneleheng ho fasolla marapo a dieta* tsa hae.+ O tla le kolobetsa ka moya o halalelang le ka mollo.+
17 O tshwere kgarafu ya hae e olosang. O tla hlwekisa seotlo sa hae ka ho felletseng, a bokelle koro ka setorong sa hae empa o tla tjhesa mmoko ka mollo o ke keng wa tima.”
18 Yaba o ba eletsa ka ditsela tse ngata le ho ba bolella ditaba tse monate tsa Mmuso wa Modimo.
19 Johanne o ne a ile a kgalemela Heroda mmusi wa setereke, a mo kgalemella Herodiase mosadi wa abuti wa hae le dintho tse mpe tseo a di entseng
20 yaba Heroda o etsa ntho e nngwe hape e mpe ka hore a kwalle Johanne teronkong.+
21 Jesu le yena a kolobetswa ha batho ba bang bohle ba kolobetswa.+ Ha a ntse a rapela, lehodimo la buleha,+
22 moya o halalelang wa theohela hodima hae o le jwalo ka leeba yaba lentswe le tswa lehodimong le re: “O Mora wa ka eo ke mo ratang, ya nkgahlisang.”+
23 Ha Jesu+ a qala mosebetsi wa hae o ne a ka ba dilemo di 30.+ O ne a tsebahala e le morawa Josefa,+mora wa Heli,
24 mora wa Mathate,mora wa Levi,mora wa Melki,mora wa Jannai,mora wa Josefa,
25 mora wa Matathiase,mora wa Amose,mora wa Nahume,mora wa Esli,mora wa Nagai,
26 mora wa Maathe,mora wa Matathiase,mora wa Semeine,mora wa Joseke,mora wa Joda,
27 mora wa Joanane,mora wa Resa,mora wa Zorobabele,+mora wa Shalatiele,+mora wa Neri,
28 mora wa Melki,mora wa Adi,mora wa Kosame,mora wa Elmadame,mora wa Ere,
29 mora wa Jesu,mora wa Eliezere,mora wa Jorime,mora wa Mathate,mora wa Levi,
30 mora wa Simeone,mora wa Judase,mora wa Josefa,mora wa Jonama,mora wa Eliakime,
31 mora wa Melea,mora wa Mena,mora wa Matatha,mora wa Nathane,+mora wa Davida,+
32 mora wa Jese,+mora wa Obede,+mora wa Boase,+mora wa Salmone,+mora wa Nashone,+
33 mora wa Aminadabe,mora wa Arni,mora wa Hezrone,mora wa Pereze,+mora wa Juda,+
34 mora wa Jakobo,+mora wa Isaka,+mora wa Abrahama,+mora wa Tera,+mora wa Nakore,+
35 mora wa Seruge,+mora wa Reu,+mora wa Pelege,+mora wa Ebere,+mora wa Shela,+
36 mora wa Kainane,mora wa Arpakshade,+mora wa Sema,+mora wa Noe,+mora wa Lameke,+
37 mora wa Methusela,+mora wa Enoke,mora wa Jarede,+mora wa Mahalaliele,+mora wa Kainane,+
38 mora wa Enoshe,+mora wa Setha,+mora wa Adama,+mora wa Modimo.
Dintlha tse qetellong ya sehloho
^ Sheba Ntlha ya A5.
^ Ka Segerike: “hlahise ditholwana tse bontshang.”
^ Kapa: “seaparo sa bobedi.”
^ Ka Segerike: “meqathatso.”
