Numere 24:1-25
24 Ha Balame a bona hore Jehova o ne a batla* ho hlohonolofatsa Iseraele, ha a ka a tloha hape ho ya batla hore na ho na le ntho e mpe*+ e tla hlahela Iseraele empa o ile a sheba lefeelleng.
2 Ha Balame a phahamisa mahlo mme a bona Baiseraele ba hlomme ditente ho ya ka maloko a bona,+ moya wa Modimo wa eba hodima hae.+
3 Yaba o bua maele ana a reng:+
“Ana ke mantswe a Balame mora wa Beore,Mantswe a monna eo mahlo a hae a butsweng,
4 Mantswe a ya utlwang lentswe la Modimo,Ya boneng pono ya Ya Matla Ohle,Ya itihetseng fatshe a ntse a butse mahlo:+
5 Ditente tsa hao di ntle hakaakang, wena Jakobo,Ditabernakele tsa hao, wena Iseraele.+
6 Di nametse sebakeng se selelele jwalo ka dikgohlo,*+Jwalo ka dirapa tse pela noka,Jwalo ka lekgala leo Jehova a le lemmeng,Jwalo ka dikedare tse pela metsi.
7 Metsi a ntse a rotha dinkgong tsa hae tse pedi tsa matlalo.Peo* ya hae e lenngwe pela metsi a mangata.+
Le morena wa hae+ o tla ba moholo ho feta Agage,+Mmuso wa hae o tla phahamiswa.+
8 Modimo o mo ntsha Egepeta.O jwalo ka manaka a poho e hlaha bakeng sa hae.
O tla fedisa ditjhaba, bahatelli ba hae,+O tla phuphura masapo a tsona mme o tla di fedisa ka marumo a hae.
9 O bothile, o robetse fatshe jwalo ka tau,Ke mang ya ka itetang sefuba mme a mo qala?
Ba o hlohonolofatsang ba hlohonolofetse,Ba o lakaletsang bomadimabe ba tla lakaletswa bomadimabe.”+
10 Yaba Balake o halefela Balame. Balake a opa diatla a halefile yaba o re ho Balame: “Ke o bitseditse hore o bitsetse dira tsa ka bomadimabe+ empa wena o di hlohonolofaditse ka makgetlo ana a mararo.
11 Jwale eya hae hona jwale. Ke ne ke ikemiseditse ho o putsa haholo+ empa Jehova o o thibetse hore o fumane moputso.”
12 Balame a araba Balake a re: “Ke boleletse baromuwa ba hao ka re,
13 ‘Le haeba Balake a ka mpha ntlo ya hae e tletseng silevera le kgauta, nke ke ka etsa ntho le ha e le efe eo ke e ratang* e hanyetsanang le taelo ya Jehova ebang e molemo kapa e mpe. Ke tla bua feela seo Jehova a tla mpolella sona.’+
14 Jwale ke ya ho batho ba heso. Empa ere ke o bolelle hore na setjhaba sena se tla etsang ho batho ba heno nakong e tlang.”*
15 Ka hoo a bua maele ana a reng:+
“Ana ke mantswe a Balame mora wa Beore,Mantswe a monna eo mahlo a hae a butsweng,+
16 Mantswe a ya utlwang lentswe la ModimoLe ya nang le tsebo ya Ya Phahameng ka ho Fetisisa.O bone pono ya Ya Matla Ohle,Ha a itihela fatshe a ntse a butse mahlo:
17 Ke tla mo bona empa eseng hona jwale,Ke tla mo bona empa eseng haufinyane.
Naledi+ e tla tswa ho JakoboMme molamu wa borena+ o hlahe ho Iseraele.+
O tla pshatla phatla ya Moabe+Le mahata a bara bohle ba morusu.
18 Edomo o tla haptjwa,+Seire+ o tla haptjwa ke dira tsa hae,+Ha Iseraele a bontsha hore o sebete.
19 E mong o tla qala ho busa a tswa ho Jakobo+Mme o tla fedisa mophonyohi le ha e le ofe motseng.”
20 Ha a bona Amaleke, a tswela pele ho bua maele a reng:
“Amaleke e bile wa pele ditjhabeng+Empa qetellong o tla fediswa.”+
21 Ha a bona Bakene,+ a tswela pele ho bua maele a reng:
“Lehae la hao le tsitsitse mme sebaka sa hao sa bodulo se behilwe lefikeng.
22 Empa ho na le ya tla tjhesa Kaine.
Ho tla nka nako e kae pele Asiria e o isa botlamuweng?”
23 A boela a bua maele a reng:
“Jo! Ebe ke mang ya tla pholoha ha Modimo a etsa jwalo?
24 Dikepe di tla tla di tswa lebopong la Kitime+Mme di tla hlorisa Asiria.+Di tla hlorisa Ebere.
Empa le yena o tla fediswa tu!”
25 Ka mora moo, Balame+ a ema yaba o a tsamaya o kgutlela hae. Balake le yena a tsamaya.
Dintlha tse qetellong ya sehloho
^ Ka Seheberu: “ho batla dipontsho tsa bomadimabe bo tlang.”
^ Ka Seheberu: “hore ho hotle mahlong a Jehova.”
^ Kapa: “diphula.”
^ Kapa: “ditloholo.”
^ Ka Seheberu: “e tswang pelong ya ka.”
^ Kapa: “qetellong ya matsatsi.”
